મોટા સમાચાર / 2024ની ચૂંટણી પહેલા ખેડૂતો માટે સૌથી મોટું એલાન કરવાની તૈયારીમાં મોદી સરકાર, હજારો કરોડની વ્યવસ્થામાં લાગ્યું નાણામંત્રાલય

• નાના ખેડૂતોને મોટી ભેટ આપવા જઈ રહી છે મોદી સરકાર 
• PM કિસાનની રકમ 6000 રૂપિયાથી વધારીને 8000 રૂપિયા કરી શકે
• આ યોજનાથી સરકારને 20,000 કરોડ રૂપિયાનો વધારાનો ખર્ચ થશે

PM Kisan Scheme : મોદી સરકાર નાના ખેડૂતોને મોટી ભેટ આપવા જઈ રહી છે. વાત જાણે એમ છે કે, 2024ની ચૂંટણીને ધ્યાનમાં રાખીને વડાપ્રધાન નરેન્દ્ર મોદી PM કિસાનની રકમ 6000 રૂપિયાથી વધારીને 8000 રૂપિયા કરી શકે છે. આ બાબતથી વાકેફ બે અધિકારીઓના જણાવ્યા અનુસાર સરકાર નાના ખેડૂતોને વર્ષમાં ત્રણ હપ્તામાં આપવામાં આવતી PM કિસાન સન્માન નિધિની રકમ 6,000 રૂપિયાથી વધારીને 8,000 રૂપિયા કરવાના વિકલ્પો પર વિચાર કરી રહી છે.

PM કિસાન સન્માન નિધિમાં આ અપડેટ પર નામ ન આપવાની શરતે આ અધિકારીઓએ એક ખાનગી મીડિયા હાઉસને કહ્યું કે, આ મામલો હજી વિચારણા હેઠળ છે. જો તે મંજૂર થાય છે તો આ યોજનાથી સરકારને 20,000 કરોડ રૂપિયાનો વધારાનો ખર્ચ થશે. આ ચાલુ નાણાકીય વર્ષમાં માર્ચ 2024 સુધીના કાર્યક્રમ માટે 60,000 કરોડ રૂપિયાના બજેટ ઉપરાંત હશે. જોકે નાણા મંત્રાલયના પ્રવક્તા નાનુ ભસીને આ અંગે ટિપ્પણી કરવાનો ઇનકાર કર્યો હતો.

ભારતમાં છેલ્લા પાંચ વર્ષમાં સૌથી નબળો ચોમાસાનો વરસાદ નોંધાયો છે, જેના કારણે આ વર્ષે મુખ્ય પાકોનું નબળું ઉત્પાદન થઈ શકે છે. ડિસેમ્બર 2018માં સબસિડી કાર્યક્રમ શરૂ થયા બાદથી મોદી સરકારે 11 કરોડ લાભાર્થીઓને કુલ 2.42 લાખ કરોડ રૂપિયા આપ્યા છે.

LPG સબસિડી બાદ હવે ગરીબ પરિવારોને રાહત આપવા.... 
અધિકારીઓ હવે DBT પ્રોગ્રામ હેઠળ વધુ ખેડૂતોને સામેલ કરવા નિયમો હળવા કરવાની ચર્ચા કરી રહ્યા છે. તેમણે કહ્યું કે, આ દરખાસ્તો પર અંતિમ નિર્ણય લેવાનો બાકી છે. સરકાર ગરીબ પરિવારોને રાહત આપવા માટે અન્ય પગલાં પણ લઈ રહી છે, જેમ કે આવતા વર્ષે મફત અનાજ કાર્યક્રમનો વિસ્તાર કરવો અને નાના શહેરી આવાસ માટે સબસિડીવાળી લોન પર વિચારણા કરવી.