માવઠું / ખેડૂતોને ચિંતામાં મુકી દે તેવી હવામાન નિષ્ણાંત અંબાલાલ પટેલે કરી આગાહી, આ તારીખે પડશે 'આફતનો વરસાદ'

• રાજ્યમાં ફરી કમોસમી વરસાદની આગાહી
• હવામાન નિષ્ણાત અંબાલાલ પટેલે કરી આગાહી
• "જાન્યુઆરીમાં ઠંડી અને કમોસમી વરસાદની ગતિવિધિ ચાલુ રહેશે"

રાજ્યમાં અચાનક વાતાવરણમાં પલટો આવતા આજે ઘણા વિસ્તારોમાં આફતનો વરસાદ વરસ્યો છે. ત્યારે હવામાન નિષ્ણાત અંબાલાલ પટેલે વધુ એક આગાહી કરી છે. અંબાલાલના વરતારા મુજબ વેસ્ટર્ન ડિસ્ટર્બન્સના કારણે ફરી વાતાવરણમાં પલટો આવશે. 

4થી 11 જાન્યુઆરી વચ્ચે કમોસમી વરસાદ: અંબાલાલ પટેલ
જાન્યુઆરી મહિનામાં ફરી માવઠાની આગાહી કરવામાં આવતા ખેડૂતોના જીવ તાળવે ચોટયા છે. હવામાન નિષ્ણાત અંબાલાલ પટેલના જણાવ્યા અનુસાર 4થી 11 જાન્યુઆરી વચ્ચે કમોસમી વરસાદની શક્યતા છે. જેમાં ખાસ કરીને કચ્છ, પશ્ચિમ સૌરાષ્ટ્રના વિસ્તારોમાં વરસાદી ઝાપટા પડશે. તેમજ 21 જાન્યુઆરી સુધીમાં હવામાનમાં ઘણા પલટા આવશે જેથી ઠંડી અને કમોસમી વરસાદની ગતિવિધિ ચાલુ રહેશે.

વડોદરા, ખેડા, રાજકોટ શહેરમાં પણ માવઠું
હવામાન વિભાગે 28 ડિસેમ્બરના રોજ કમોસમી વરસાદની આગાહી કરી હતી.. જે અનુસાર વડોદરામાં કમોસમી વરસાદ પડ્યો. વડોદરામાં સવારથી વાદળછાયા વાતાવરણની વચ્ચે વરસાદ પડતા ખેડૂતોમાં ચિંતામાં મૂકાયા. શિયાળુ પાકને નુકસાન જતા ખેડૂતોને રડવાનો વારો આવ્યો. વડોદરા શહેરના અનેક વિસ્તારમાં કમોસમી વરસાદ પડતા ઠંડીનુ જોર પણ વધ્યું.ખેડામાં વાદળછાયા વાતાવરણ વચ્ચે યાત્રાધામ ડાકોરમાં વહેલી સવારથી માવઠું પડ્યું છે. અહી તમાકુ, શાકભાજી સહિતના ઉભા પાકને નુકસાનની ભીતિ છે. જો રાજકોટની વાત કરીએ તો ઢેબર રોડ, ગોંડલ રોડ, ગોંડલ ચોકડી સહિતના વિસ્તારમાં વરસાદી ઝાપટા પડ્યા છે. 

મોરબી, પાટણ, બનાસકાંઠા, કચ્છના ઘણા વિસ્તારોમાં વરસાદ
મોરબી શહેર અને હળવદના ગ્રામ્ય વિસ્તારમાં હળવો વરસાદ વરસ્યો છે.પાટણ, સાંતલપુર, વારાહી તેમજ સરસ્વતી તાલુકા વિસ્તારમાં વરસાદ પડયો છે.ઉત્તર ગુજરાતની વાત કરીએ તો બનાસકાંઠા જીલ્લામાં પણ વરસાદ જોવા મળ્યો. હવામાન વિભાગની આગાહી પ્રમાણે કમોસમી વરસાદ વરસ્યો છે. ત્યારે  ખેડૂતોની મુશ્કેલી વધી ગઈ છે કમોસમી વરસાદના કારણે ખેતીના પાકને નુકસાનની ભીતિ ઉભી થઇ રહી છે. બનાસકાંઠામાં અંબાજી પંથકમાં પણ વાતાવરણમા પલટો જોવા મળ્યો છે. અહીં પણ વરસાદ વરસતા રસ્તા પર પાણી છવાઈ ગયા છે જ્યારે મોરબી, કચ્છમાં અંજાર-માંડવી, મુન્દ્રા શહેરમાં વરસાદ પડ્યો છે કચ્છમાં હજુ હવામાન વિભાગ 5 દિવસ સામાન્ય વરસાદની આગાહી કહેવામાં આવી છે.

રાજ્યમાં 2 દિવસ ઠંડીમાંથી મળશે આંશિક રાહત
અમદાવાદમાં પણ મોડી રાત્રે વાતાવરણમાં પલટો જોવા મળ્યો હતો. વેસ્ટર્ન ડિસ્ટર્બન્સની અસરના કારણે અચાનક વરસાદી માહોલ છવાઈ ગયો હતો.  આ તરફ ગાંધીનગર અને ઉત્તર ગુજરાતના પણ કેટલાક વિસ્તારોમાં મોડી રાત્રે વરસાદ પડતા ખેડૂતો ચિંતિત બન્યા છે. માવઠાને કારણે ખેડૂતોના પાકને નુકસાન જવાની ભીતિ સેવાઈ રહી છે. કચ્છના રાપર સહિત ખેંગારપર, કુડા ,રામવાવ અને જામપર, સુવઇ સહિતના વિસ્તારમાં વરસાદ વરસ્યો છે વરસાદ બાદ વાતાવરણમાં ઠંડક પ્રસરી ગઈ છે જેના કારણે સામાન્ય ઠંડીમાં પણ વધારો જોવા મળી રહ્યો છે.