પ્રેરણા / અકસ્માત બાદ પગ કાપવો પડ્યો છતાં વર્લ્ડ ચેમ્પિયન બની આ ગુજરાતની દિકરી

માનસી જોશીની કહાણી એ લોકો માટે એક પ્રેરણા સમાન છે, જે મુશ્કેલ પરિસ્થિતિઓમાં ડરી જઈને હાર સ્વીકારી લે છે. કેવી મુશ્કેલ પરિસ્થિતિઓનો સામનો કરીને ચેમ્પિયન બનાય છે એના માટે માનસી જોશીની એ દર્દનાક કહાણી જાણવી જરૂરી છે.

માનસી વર્ષ ૨૦૧૯માં ચર્ચામાં આવી હતી, જ્યારે તેણે સ્વિટ્ઝર્લેન્ડમાં યોજાયેલી પેરા વર્લ્ડ બેડમિન્ટન ચેમ્પિયનશિપમાં ગોલ્ડ મેડલ જીત્યો. જોકે માનસીની ચેમ્પિયન બનવાની કહાણીમાં એક એવું દર્દ છુપાયેલું છે, જે બહુ ઓછા લોકો જાણે છે.

Wanted to share my new progress and personal achievement with you guys. I'm re learning this skill of running which I had forgotten. I know nobody forgets running, but running on a blade is nothing like running on legs. You need to learn the technicalities of it- / pic.twitter.com/odRGxDLI51

— Manasi G. Joshi (@joshimanasi11) August 30, 2020

વાત છે ૨૦૧૧ની, જ્યારે માનસી એક રોડ અકસ્માતનો શિકાર બની હતી. તે પોતાની સ્કૂટી પર જઈ રહી હતી એ દરમિયાન એક ટ્રકની અડફેટમાં આવી ગઈ. અકસ્માતમાં માનસીએ પોતાનો પગ ગુમાવ્યો. માત્ર નવ વર્ષની ઉંમરથી બેડમિન્ટન રમી રહેલી માનસીની આખી કરિયર દાવ પર લાગી ગઈ. જોકે માનસીએ હાર સ્વીકારી નહીં. માનસી ૫૦ દિવસ હોસ્પિટલમાં રહી અને તેણે હિંમત દાખવીને ફરીથી રમવાનું શરૂ કર્યું.

માનસીએ પોતાનાં સપનાં જીવિત રાખવાનો નિર્ણય કર્યો અને પછી તે હૈદરાબાદ ખાતે પુલેલા ગોપીચંદ એકેડેમીમાં પ્રેક્ટિસ કરવા માંડી. માનસીએ એક ઇન્ટરવ્યૂમાં જણાવ્યું, ''એ સમયે હું એ જ વિચારતી હતી કે મેેં માત્ર એક જ પગ ગુમાવ્યો છે. ચાર મહિના બાદ હું કૃત્રિમ પગ લગાવીને મેદાનમાં ઊતરી.''

માનસી વર્ષ ૨૦૧૪માં પ્રોફેશનલ ખેલાડી બની અને પછી વર્ષે તેણે ઈંગ્લેન્ડમાં યોજાયેલી પેરા વર્લ્ડ બેડમિન્ટન ચેમ્પિયનશિપમાં મિક્સ્ડ ડબલ્સનો સિલ્વર મેડલ જીત્યો. એ માનસીનો પ્રથમ મોટો મેડલ હતો. ત્યાર બાદ માનસીએ પોતાની કરિયરની સૌથી મોટી સિદ્ધિ ૨૦૧૯માં પેરા વર્લ્ડ બેડમિન્ટન ચેમ્પિયનશિપમાં ગોલ્ડ મેડલ જીતીને હાંસલ કરી. 

માનસીનો એક પગ નહોતો છતાં તે દિવસમાં ત્રણ પ્રેક્ટિસ સેશનમાં ભાગ લેતી હતી. માનસીએ પોતાની ફિટનેસ પર ઘણું કામ કર્યું. સખત મહેનતથી માનસીના મસલ્સ મજબૂત થયા અને સપ્તાહમાં છ જિમ સેશને માનસીને એક મજબૂત ખેલાડી બનાવી દીધી.