આનંદો / ગેસ પર જમવાનું બનાવવાની સાથે મોબાઇલ પણ ચાર્જ થશે

• લખનૌની વિદ્યાર્થી પ્રાંજલે કર્યું સંશોધન
• જમવાનું બનાવવાની સાથે ચાર્જ થશે મોબાઈલ
• એનર્જી અર્નર નામથી થર્મો ઇલેક્ટ્રિક સ્ટવ જનરટર તૈયાર કર્યું

આ સંશોધનને આંતરરાષ્ટ્રીય પુરસ્કારથી નવાજવામાં આવ્યું છે. નેશનલ ઇન્સ્પાયર એવોર્ડ માપદંડમાં પણ આ સંશોધન પુરસ્કૃત થયું છે. લખનૌના વિદ્યાર્થી પ્રાંજલ શ્રીવાસ્તવે એનર્જી અર્નર નામથી થર્મો ઇલેક્ટ્રિક સ્ટવ જનરટર તૈયાર કર્યું છે. આ ઉપકરણ બર્નરની આંચને બરબાદ નહીં થવા દે. આ મોડલે તાજેતરમાં એશિયન ઇન્ડિયા ગ્રાસરૂટ ઇનોવેશન ફોરમમાં પ્રથમ પુરસ્કાર મેળવ્યો છે. લખનૌના જી.ડી. ગોયન્કા પબ્લિક સ્કૂલના વિદ્યાર્થી પ્રાંજલ આ પુરસ્કાર જીતીને ફિલિપાઇન્સથી પાછો ફર્યો છે.

મહિલાઓને મળશે આ સંશોધનથી મોટી મદદ

પ્રાંજલે જણાવ્યું કે આ સાધન જમવાનું બનાવતી વખતે વેસ્ટ જતી આંચને એકઠી કરવાનું કામ કરે છે અને તેને ઇલેક્ટ્રિક એનર્જીમાં બદલે છે. હવે તે આની પેટન્ટ કરાવવાની તૈયારીમાં છે. લખનૌમાં તહેનાત ફૂડ સેફ્ટી ઓફિસર પિતા શૈલેન્દ્ર શ્રીવાસ્તવ અને ગૃહિણી નીમા શ્રીવાસ્તવના પુત્ર પ્રાંજલને આ સંશોધનની પ્રેરણા ત્યારે મળી જ્યારે તે બે વર્ષ પહેલાં પોતાના મઉ સ્થિત ગામ ઢડવલ ગયો હતો. અહીં હંમેશાં વીજળી ગુલ રહેતી. મહિલાઓ જમવાનું બનાવતી તે વખતે બર્નરની કિનારીમાંથી નીકળતી આંચ જોઇને તેના મનમાં આ ખ્યાલ આવ્યો હતો.

૪૦૦ રૂપિયાની કિંમતમાં આ ડિવાઇસ તૈયાર થયું

પ્રાંજલ કહે છે કે મેં ઇન્ટરનેટની સાથે સાથે સ્કૂલની લાઇબ્રેરીમાં પણ ઘણું સંશોધન કર્યું ત્યારે મને સી બેક થિયરી અંગે જાણવા મળ્યું. તેનો મતલબ એ છે કે જો કોઇ ધાતુ એક તરફ ગરમ થઇ જાય અને બીજી બાજુ ઠંડી હોય તો આ પ્રક્રિયામાં ઇલેક્ટ્રોન ગરમ ભાગથી ઠંડા ભાગ તરફ ઝડપથી વહેલા લાગે છે. તેની આ ગતિથી વીજળી ઉત્પન્ન થાય છે. મેં આ સિદ્ધાંત પર મારું થર્મો ઇલેક્ટ્રિક સ્ટવ જનરેટર તૈયાર કર્યું. માત્ર ૪૦૦ રૂપિયાની કિંમતમાં આ ડિવાઇસ તૈયાર થયું.