મારી નાંખશે મોંઘવારી! / કોમર્શિયલ ગેસ સિલિન્ડરના ભાવમાં એક ઝાટકે 250 રૂપિયાનો વધારો, જાણો હવે કેટલામાં પડશે

• જનતા પર વધુ એક મોંઘવારીનો માર
• પેટ્રોલ-ડીઝલ બાદ હવે LPG સિલિન્ડરનાં ભાવમાં વધારો
• કોમર્શિયલ ગેસ સિલિન્ડરના ભાવમાં એક ઝાટકે 250નો વધારો

ભારતમાં વધી રહેલી મોંઘવારી અટકવાનું નામ નથી લઈ રહી. ત્યારે જાહેર ક્ષેત્રની ઓઇલ માર્કેટિંગ કંપનીઓ સામાન્ય ગ્રાહકોને શ્વાસ નથી લેવા દેતી. આ કંપનીઓ ક્યારેક પેટ્રોલ-ડીઝલના ભાવમાં વધારો કરે છે તો ક્યારેક એલપીજીના ભાવ વધારીને લોકોના ખિસ્સા લૂંટે છે. 1 એપ્રિલ, શુક્રવારના રોજ સરકારી ઓઇલ માર્કેટિંગ કંપનીઓએ પેટ્રોલ-ડીઝલના ભાવમાં વધારો કર્યો નથી, પરંતુ એલપીજી સિલિન્ડરના ભાવમાં વધારો કર્યો છે. જેના કારણે સામાન્ય ગ્રાહકો માટે રાંધવાનું ભોજન મોંઘું થઈ ગયું છે.

જાણો કેટલો થયો ભાવવધારો?

સરકારી ઓઈલ માર્કેટિંગ કંપનીઓ દ્વારા જાહેર કરાયેલા નવા દરો અનુસાર શુક્રવારે એલપીજી સિલિન્ડરની કિંમતમાં 250 રૂપિયાનો વધારો કરવામાં આવ્યો છે. આ વધારો ઓઇલ માર્કેટિંગ કંપનીઓએ ઘરેલુ એલપીજી સિલિન્ડર પર નહીં, પરંતુ હોટેલ અને રેસ્ટોરન્ટમાં વપરાતા કોમર્શિયલ સિલિન્ડર પર કર્યો છે. તેનાથી ઘરેલુ સિલિન્ડરનો ઉપયોગ કરતા સામાન્ય ગ્રાહકોને રાહત મળી છે. ઓઈલ માર્કેટિંગ કંપનીઓએ હાલમાં જ લગભગ 10 દિવસ પહેલા ઘરેલુ એલપીજી સિલિન્ડરના ભાવમાં વધારો કર્યો હતો, જ્યારે આ કંપનીઓએ 22 માર્ચે કોમર્શિયલ સિલિન્ડરના ભાવમાં ઘટાડો કર્યો હતો.

22 માર્ચે સ્થાનિક એલપીજીના ભાવમાં વધારો

તમને જણાવી દઈએ કે, ભારતના પાંચ રાજ્યોમાં વિધાનસભા ચૂંટણી દરમિયાન ઓઇલ માર્કેટિંગ કંપનીઓએ 137 દિવસ બાદ 22 માર્ચથી ફરીથી પેટ્રોલ-ડીઝલના ભાવમાં વધારો કરવાનું શરૂ કરી દીધું. આ જ 22 માર્ચે ઓઇલ માર્કેટિંગ કંપનીઓએ બિન-સબસિડીવાળા ઘરેલુ એલપીજી સિલિન્ડરની કિંમતમાં લગભગ 50 રૂપિયાનો વધારો કર્યો હતો. જો કે, 6 ઓક્ટોબર 2021 બાદ ઘરેલુ એલપીજી સિલિન્ડરના દરમાં કોઈ ફેરફાર નથી થયો.

જાણો કયા શહેરમાં કેટલી કિંમત?

નવા નાણાકીય વર્ષ 2022-23ના પહેલાં દિવસે પણ સ્થાનિક એલપીજી સિલિન્ડર દિલ્હીમાં 949.50 રૂપિયા, કોલકાતામાં 976 રૂપિયા, મુંબઈમાં 949.50 રૂપિયા અને ચેન્નાઈમાં 965.50 રૂપિયામાં વેચાઈ રહ્યાં છે. આ સાથે જ દિલ્હીમાં 1લી માર્ચે 19 કિલોનાં એલપીજી સિલિન્ડરને 2012 રૂપિયામાં રિફિલ કરવામાં આવતું હતું. 22 માર્ચે તે ઘટીને 2003 રૂપિયા થઈ ગયું હતું, પરંતુ આજથી તેને દિલ્હીમાં રિફિલ કરાવવા માટે 2253 રૂપિયાનો ખર્ચ થશે. આ સાથે કોલકાતામાં 2087 રૂપિયાને બદલે હવે 2351 રૂપિયા અને મુંબઈમાં 1955ને બદલે 2205 રૂપિયા આજથી ખર્ચવા પડશે. ચેન્નાઈમાં હવે તેની કિંમત 2138 રૂપિયાને બદલે 2406 રૂપિયા થશે.

આ રીતે ચેક કરો LPGની કિંમત

રસોઇ ગેસ સિલિન્ડરની કિંમત ચેક કરવા માટે તમારે સરકારી ઓઇલ કંપની IOC ની વેબસાઇટ પર જવું પડશે. અહીંયા કંપનીઓ દર મહિને નવા ભાવ જાહેર કરે છે. એ માટે આ https://iocl.com/pages/indane-cooking-gas-overview પર તમે તમારા શહેરનાં ગેસનાં ભાવ જાણી શકો છો.