ICC Test Rankings / ICC ટેસ્ટ રેન્કિંગમાં ટીમ ઈન્ડિયાનો દબદબો, 3 ખેલાડીનો ટોપ 5 ઓલરાઉન્ડરમાં સમાવેશ, એક ગુજરાતી પણ ચમક્યો

• ICC ટેસ્ટ રેન્કિંગમાં ભારતીય ખેલાડીઓનું વર્ચસ્વ યથાવત
• ટોપ-5માં ત્રણ ભારતીય ખેલાડીઓનો સમાવેશ
• રવિન્દ્ર જાડેજા નંબર-1 ટેસ્ટ ઓલરાઉન્ડર છે

ટોપ-5માં ત્રણ ભારતીય ખેલાડીઓનો સમાવેશ

આઈસીસી દ્વારા 22 ફેબ્રુઆરીએ નવા ટેસ્ટ રેન્કિંગની જાહેરાત કરવામાં આવી. આઈસીસીના ઑલરાઉન્ડર રેન્કિંગને જોઈએ તો ટોપ-5માં ત્રણ ભારતીય ખેલાડીઓનો સમાવેશ થાય છે. રવિન્દ્ર જાડેજા નંબર-1 ટેસ્ટ ઓલરાઉન્ડર છે, ત્યારબાદ રવિચંદ્રન અશ્વિન છે, જે બીજા નંબરે છે. આ લિસ્ટમાં લેટેસ્ટ એન્ટ્રી અક્ષર પટેલની થઇ છે અને તે રેન્કિંગમાં નંબર-5 પર પહોંચી ગયા છે. બોર્ડર-ગાવસ્કર ટ્રોફીમાં અક્ષરની બેટીંગે ધૂમ મચાવી છે. 

બોલર્સના રેન્કિંગમાં પણ ફેરફાર

દિલ્હી ટેસ્ટ બાદ બોલર્સના રેન્કિંગમાં પણ ફેરફાર થયો છે. ઓસ્ટ્રેલિયાના કેપ્ટન પેટ કમિન્સ હવે દુનિયાના નંબર-1 ટેસ્ટ બોલર નથી, તેમની જગ્યા ઈંગ્લેન્ડના જેમ્સ એન્ડરસને લઇ લીધી છે, જે ન્યુઝીલેન્ડ સામે સારું પ્રદર્શન કરી ચૂક્યા છે. ભારતીય ટીમના રવિચંદ્રન અશ્વિનને પણ ફાયદો થયો છે અને તેઓ હવે ટેસ્ટ રેન્કિંગમાં બીજા નંબરે આવી ગયા છે. 

ટોપ-10માં ત્રણ ભારતીય બોલર સામેલ

બોલર્સની રેન્કિંગ જોઈએ તો ટોપ-10માં ત્રણ ભારતીય બોલર સામેલ છે. રવિચંદ્રન અશ્વિન બીજા નંબરે છે, જ્યારે જસપ્રીત બુમરાહ પાંચમા નંબરે છે. તો રવિન્દ્ર જાડેજાની એન્ટ્રી હવે બોલર્સના ટોપ-10 રેન્કિંગમાં થઇ ગઇ છે અને તેઓ 9મા નંબરે છે. બેટરોની રેન્કિંગ પહેલાની જેમ જ છે અને ભારતના રિષભ પંત છઠ્ઠા નંબરે, રોહિત શર્મા 7મા નંબરે યથાવત છે.