ટંકારાના પૂર્વ ધારાસભ્ય લલિત કગથરાએ ભાજપના ધારાસભ્યના ચૂંટણી ફોર્મ પર વાંધો ઉઠાવીને હાઈકોર્ટમાં અરજી કરી છે. તેના વિશે આજે તેમણે પ્રેસ કોન્ફરન્સ યોજી વિગતવાર માહિતી આપી છે.
ટંકારાના ધારાસભ્ય વિરુદ્ધ લલિત કગથરાએ હાઇકોર્ટમાં કરી રીટ
ભાજપ ઉમેદવારનું ફોર્મ માન્ય રાખવા મુદ્દે HCમાં ગયા લલિત કગથરા
દુર્લભજીભાઇના ફોર્મમાં ઘણી ભૂલો છેઃ લલિત કગથરા
ઇરાદાપૂર્વક મિલકત નથી બતાવવામાં આવી: લલિત કગથરા
ગુજરાત વિધાનસભાની ચૂંટણીના પરિણામો બાદ ટંકારા વિધાનસભા બેઠક પરથી ચૂંટણી હારેલા કોંગ્રેસના ઉમેદવાર લલિત કગથરાએ હાઈકોર્ટમાં પિટિશન ફાઈલ કરી ભાજપના વિજેતા ઉમેદવાર દુર્લભજી દેથરીયાએ ચૂંટણીપંચ સમક્ષ અનેક વિગતો છુપાવી હોવાનો આરોપ લગાવ્યો છે. આજે રાજકોટમાં એક પ્રેસ કોન્ફરન્સ યોજી પડધરી-ટંકારાના પૂર્વ ધારાસભ્ય લલિત કગથરાએ ભાજપના ધારાસભ્ય દુર્લભજીભાઈ પર ગંભીર આક્ષેપો કર્યા હતા.
ચૂંટણી પ્રક્રિયા વખતે જ મેં વાંધો ઉઠાવ્યો હતોઃ લલિત કગથરા
આ તકે લલિત કગથરાએ જણાવ્યું હતું કે, પડધરી-ટંકારા ધારાસભા મત વિસ્તારમાં ફોર્મ ભર્યા બાદ ફોર્મ ચકાસણીના દિવસે મને જાણવા મળ્યું કે મારી સામેના ઉમેદવાર દુર્લભજીભાઈ દેથરિયાના સોંગદનામામાં અને ફોર્મમાં ઘણી બધી ભૂલો છે અને ઘણી બધી વસ્તુઓ છુપાવવામાં આવી છે. એટલે જે તે સમયે મેં વાંધો ઉઠાવ્યો હતો.
રાજકીય પ્રેશરથી ફોર્મ મંજૂર કરાવ્યુંઃ કગથરા
તેમણે કહ્યું હતું કે, RO (રિટર્નિંગ ઓફિસર)એ મારા વાંધાની સામે જવાબ આપવા દુર્લભજીભાઈના પ્રતિનિધિને 2 કલાકનો સમય આપ્યો. ROએ કહ્યું હતું કે, લલિતભાઈએ તમારા ફોર્મની સામે જે વાંધો લીધો તેનો જવાબ આપો. તેમના વકીલ આવ્યા, ભાજપના ઉમેદવાર દુર્લભજીભાઈ આવ્યા. જે બાદ રાજકીય પ્રેશર આપીને રિટર્નિંગ ઓફિસર પાસે ફોર્મ મંજૂર કરાવ્યું અને આ ચૂંટણી થઈ.
ફોર્મમાં ઘણી વિગતો છુપાવવામાં આવી છેઃ લલિત કગથરા
તેમણે વધુમાં જણાવ્યું હતું કે, 'ઉમેદવારી ફોર્મ ભરતી વખતે રજૂ કરાયેલા સોંગદનામામાં ભાજપના ઉમેદવાર દુર્લભજીભાઈએ ઘણી વિગતો છુપાવી છે. તમામ પ્રકારની મિલકતો દુર્લભજીભાઈએ છુપાવી છે. આ તમામ પુરવાઓ લઈને મેં હાઈકોર્ટમાં પિટીશન દાખલ કરી છે. દુર્લભજીભાઈએ અનમુવેબલ પ્રોપર્ટીમાં તેમની પાસે ઈનોવા કાર છે અને આરસી બુક પણ તેમના નામે છે એ ઈનોવા કારને ચૂંટણી દરમિયાન ભરવામાં આવેલા ફોર્મમાં બતાવી નથી.એવી જ રીતે ચાર કંપનીઓમાં તેઓ પાર્ટનરશીપ ધરાવે છે. તે તમામ કંપનીના પુરાવા સાથે મેં પિટીશન દાખલ કરી છે. મને હાઇકોર્ટ પર વિશ્વાસ છે કે હાઈકોર્ટ મને ન્યાય આપશે.
વિધાનસભાની ચૂંટણી હારેલા ઉમેદવારો હાઇકોર્ટના શરણે
અત્રે ઉલ્લેખનીય છે કે, વિધાનસભાની ચૂંટણી હારેલા ભાજપ-કોંગ્રેસના ચાર ઉમેદવારો હર્ષદ રિબડીયા, લલિત કથગરા, રઘુ દેસાઈ અને હિતેશ વસાવાએ હાઈકોર્ટમાં અરજી કરી છે, તેમણે આક્ષેપ કર્યો છે કે, વિજેતા ઉમેદવારોના ફોર્મમાં ભૂલ હોવા છતાં ફોર્મ સ્વીકારવામાં આવ્યાં છે. સોગંદનામાની વિગતોમાં ભૂલ તેમજ પરિણામોના સર્ટિફિકેટ સહિતના કારણો તેમણે અરજીમાં દર્શાવ્યા છે. અરજીમાં ચૂંટણીપંચ સહિત રિટર્નીગ ઓફિસરને પક્ષકાર બનાવાયા છે. વિજેતા ઉમેદવારોના ફોર્મમાં ભૂલ હોવા છતાં ફોર્મ સ્વીકાર્યા હોવાનો પણ તેમણે અરજીમાં આક્ષેપ કર્યો છે.