ક્રિકેટર કૃણાલ પંડ્યાએ પોતાના નાના ભાઇ અને ટીમ ઇન્ડિયાના સ્ટાર ઑલરાઉન્ડર હાર્દિક પંડ્યાને 40 વર્ષ સુધી લગ્ન ન કરવાની સલાહ આપી છે. બંને ભાઇઓ IPLની ટીમ મુંબઇ ઇન્ડિયન્સ માટે રમે છે. કૃણાલે ભાઇ હાર્દિકને સલાહ આપતા કહ્યુ કે ''તું હમણાં લગ્ન ન કર તું 40 વર્ષે પણ લગ્ન કરી જ શકે છે. ત્યાં સુધી તું બસ એને જોતો રહે.'' જોકે બાદ તેણે આ વાતને માત્ર હળવી મજાક ગણાવી હતી.
ઉલ્લેખનીય છે કે કૃણાલે 2017માં પંખુડી શર્મા સાથે લગ્ન કર્યા હતા અને હાલમાં તે પોતાના નાના ભાઈના લગ્ન બાબતે કોઈ ઉતાવળમાં ન હોય તેવું લાગી રહ્યું છે.
હાર્દિક પંડ્યાએ કહ્યુ કે ''હું તેને ખૂબ હેરાન કરું છું. ક્યારેક તો મારાથી એટલો કંટાળી જાય છે કે કલાકો સુધી રૂમમાં આવતો નથી.'' કૃણાલે જણાવ્યું કે ''હાર્દિક જ્યારે નાનો હતો ત્યારે તે ભારતીય કરતા કેરેબિયન વધારે લાગતો હતો. જોકે હું થોડો ઓછો આફ્રિકન લાગતો હતો. હું તેને કાયમ વેસ્ટઈન્ડિયન કહેતો હતો. પણ જો હાર્દિકને કોઈ કાળો (બ્લેક) કહી દે તો અમારી મા તેની સાથે ઝઘડો કરતી અને હું હંમેશા કહેતો હતો કે મા તું ઝઘડો કેમ કરી રહી છે? તારો દિકરો બ્લેક છે અને જો કોઇ આવું કહી રહ્યુ છે તે ખોટું નથી.''
મુંબઈ ઈન્ડિયન્સની ટીમના પ્લેયર કેરોન પોલાર્ડ અને હાર્દિક પંડ્યા વચ્ચે ગાઢ મિત્રતા છે. ટીમ ઈન્ડિયાના ઑલરાઉન્ડરે કહ્યું હતું કે પોલાર્ડ તેના માટે ભાઈ જેવો છે જેને બીજી માએ જન્મ આપ્યો છે. જોકે એ પણ હકીકત છે કે માત્ર હાર્દિક જ નહીં કૃણાલ પણ વેસ્ટઈન્ડિઝના પ્લેયર્સથી પ્રભાવિત છે. બંને બાળપણથી જ વેસ્ટઈન્ડિઝના ખેલાડીઓને ફૉલો કરે છે. કૃણાલે કહ્યું કે 2003માં કેટલાક લોકોએ હાર્દિકને કેન્યાનો પ્લેયર સમજીને તેનો ઑટોગ્રાફ પણ લીધો હતો.