રાજ્યમાં અવારનવાર અકસ્માત થયાની ઘટનાઓ સામે આવતી રહે છે. ત્યારે આજ રોજ નડિયાદ-ખેડા બાયપાસ હાઈવે પર રતનપુર નજીક ગમખ્વાર અકસ્માત સર્જાયો જેમાં 4નાં મોત થયા છે.
નડિયાદ-ખેડા બાયપાસ હાઈવે પર ગંભીર અકસ્માત
ચાર અમદાવાદી યુવકોના કમકમાટીભર્યા મોત
કન્ટેનર પાછળ બાઇક ઘૂસી જતા 4નાં મોત
આજ રોજ આ લોકો માટે સોમવાર ગોઝારો સાબિત થયો છે. ખેડા જિલ્લામાં નડિયાદ-ખેડા બાયપાસ હાઈવે પર સોખડા પાટીયા વેસ્ટર્ન હોટલના પાર્કિંગમાં ઉભેલા એક કન્ટેનર પાછળ પૂરઝડપે આવતું એક બાઈક ધડામ દઇને અથડાયું. જેમાં બાઈક પર સવાર 4 યુવકોના મોત નિપજ્યાં છે. આ ચારેય મૃતક યુવકો અમદાવાદના રહેવાસી હોવાનું જાણવા મળી રહ્યું છે.
મૃતક ચારેય યુવાનો અમદાવાદના રહેવાસી હોવાનું સામે આવ્યું
જો કે આ સમગ્ર ઘટનાની જાણ થતા જ પોલીસે તુરંત ઘટનાસ્થળે પહોંચી ગઇ હતી. હાલમાં આ મામલે પોલીસ દ્વારા વધુ તપાસ હાથ ધરવામાં આવી રહી છે. આ ચારેય યુવકો અમદાવાદના અમરાઈવાડી અને સીટીએમ વિસ્તારના રહેવાસી હોવાનું જાણવા મળ્યું છે. તેઓની ઓવરસ્પીડના કારણે આ અકસ્માત સર્જાયો હોવાનું પ્રાથમિક અનુમાન લગાવાઇ રહ્યું છે.
ઓવરસ્પીડના કારણે અકસ્માત સર્જાયો હોવાનું પ્રાથમિક અનુમાન
હાલમાં મૃતકોના મૃતદેહને માતર સામૂહિક આરોગ્ય કેન્દ્રમાં પીએમ માટે લઈ જવામાં આવ્યાં છે. આ ગંભીર અકસ્માતના કારણે હાઈ-વે પર લોકોના ટોળેટોળાં ઉમટી પડ્યા હતાં. હાઈ-વે પર કન્ટેનર પાછળ બાઈક અથડાયા બાદ ચારેય યુવકોના મૃતદેહ રસ્તા પર ખરાબ હાલતમાં પડ્યા હતાં. સ્થાનિક લોકોએ આ ઘટનાની જાણ માતર પોલીસ સ્ટેશનને કરતા જ માતર પીએસઆઈ સહિત પોલીસનો કાફલો ઘટના સ્થળે પહોંચી ગયો હતો. જેમાં ઓવરસ્પીડના કારણે આ ગંભીર અકસ્માત સર્જાયો હોવાનું પ્રાથમિક અનુમાન લગવાઇ રહ્યું છે. તેમ છતા અકસ્માતનું ચોક્કસ કારણ જાણવા માટે પોલીસે વધુ તપાસ હાથ ધરી છે.