ચસકો / જેલમાં લોકો શું ખાતા હશે! જાણવું હોય તો હવે તમે ઓનલાઇન મંગાવી શકશો જેલનું ભોજન

તમને કોઈ જેલનું ભોજન ખાવા આમંત્રિત કરે તો તમે એ પાર્ટીમાં જશો ખરા? તમારે ડરવાની બિલકુલ જરૂર નથી. જેલના ભોજનનો સ્વાદ માણવા માટે તમારે જેલમાં જવાની કે ત્યાં કેદીઓ વચ્ચે રહેવાની કોઈ જરૂર નથી. માનવામાં ન આવતી આ વાત હકીકત છે. કોઈ તમને કહે કે, દેશની કોઈ જેલ રોજ 30 હજાર રોટલી, 600 કિલો ચિકન અને 300 કિલો શાક વેચે છે તો પણ તમને આંચકો જ લાગશે, પણ આ સત્ય છે.

કેરળના ત્રિસુર સ્થિત વૈયૂર સેન્ટ્રલ જેલમાં કેદ કેદીઓ રોજ નિયમિત રીતે આટલી રોટલી અને ચિકન રાંધે છે. આ ઉપરાંત 300 કિલો શાક પણ બનાવવામાં આવે છે. ચિકન કરી પણ બનાવાય છે. આ બધું બોજન જેલમાં સજા ભોગવી રહેલા 100 કેદીઓ સાથે મળીને તૈયાર કરે છે. સૌથી રસપ્રદ વાત એ છે કે, જેલમાં કેદ કેદીઓ ભોજન બનાવી શકે તે માટે 50 લાખ રૂપિયા ખર્ચીને એક આધુનિક કિચન પણ તૈયાર કરવામાં આવ્યું છે.

અહીં જ આ તમામ ભોજન તૈયાર કરવામાં આવ્યું છે. કેરળના કક્કનાડ જેલથી પહેલા ત્રિસૂરની વૈયૂર જેલમાં પણ ઑનલાઈન ફૂડ સપ્લાયની પહેલ કરવામાં આવી હતી. જેલની અંદર વિભિન્ન આરોપો હેઠળ સજા ભોગવી રહેલા કેદીઓ જ આ ભોજન બનાવે છે અને ત્યાર બાદ તેને ઑર્ડર પ્રમાણે સપ્લાય કરવામાં આવે છે. ઑનલાઈન ભોજન મંગાવવા ઉપરાંત લોકો જેલના આફટલેટથી જ સીધું પાર્સલ લઈ જઈ શકે તેવી સુવિધા પણ ઊભી કરવામાં આવી છે.

તમામ ખાનગી કંપનીઓની જેમ જ આ જેલે પણ ઑનલાઈન ફૂડ સપ્લાય કરવાની દિશામાં પગલાં માંડ્યા છે. જેલના ભોજનને ‘ફ્રીડમ ફૂડ ફેક્ટરી’ના નામથી ઑનલાઈન વેચવામાં આવશે. જેલના કેદીઓને સ્વરોજગાર આપવા કૂકિંગ અને ફૂડ પેકેજિંગનું કામ શીખવવામાં આવી રહ્યું છે. સૌથી ખાસ વાત એ છે કે, આ ઑનલાઈન ભોજનની થાળીમાં ચિકન બિરયાની, પાંચ રોટલી, ચિકન કરી અને એક બોટલ મિનરલ વોટર પણ આપવામાં આવે છે અને હાલના તબક્કે તેની કિંમત ફક્ત રૂ.125 રાખવામાં આવી છે.