તબિયત લથડી / ધરપકડ થતાં જ બોલિવૂડના 'વિવાદિત ખાન'ને છાતીમાં દુ:ખાવો ઉપડ્યો, હોસ્પિટલમાં દાખલ

• કમાલ આર ખાનને મુંબઈની હોસ્પિટલમાં દાખલ કરવામાં આવ્યો
• જ્યુડિશિયલ કસ્ટડીમાં મોકલ્યા બાદ હાર્ટમાં દુ:ખાવાની કરી હતી ફરિયાદ
• કમાલ આર ખાનની મંગળવારે મુંબઈ પોલીસે ધરપકડ કરી હતી 

કેઆરકેએ હાર્ટમાં દુ:ખાવાની કરી હતી ફરિયાદ

કમાલ આર ખાનની મંગળવારે મુંબઈ પોલીસે ધરપકડ કરી હતી. ત્યારબાદ તેને બોરીવલી કોર્ટમાં રજૂ કરવામાં આવ્યો. કોર્ટમાં સુનાવણી બાદ તેને 14 દિવસની જ્યુડિશિયલ કસ્ટડીમાં મોકલવામાં આવ્યો હતો. ત્યારબાદ કેઆરકેએ મંગળવારે સાંજે હાર્ટમાં દુ:ખાવાની ફરિયાદ કરી અને ત્યારબાદ તેને મુંબઈની એક હોસ્પિટલમાં લઇ જવામાં આવ્યો. કેઆરકેની 2020માં દિવંગત અભિનેતા ઋષિ કપૂર અને ઈરફાન ખાન પર અપમાનજનક ટ્વિટને લઇને ધરપકડ કરવામાં આવી. 

ઋષિ કપૂર અને ઈરફાન ખાન પર અપમાનજનક ટ્વિટ પોસ્ટ કર્યા હતા

કેઆરકેને મંગળવારે સવારે મુંબઈ એરપોર્ટ પરથી પકડવામાં આવ્યો. તેની સામે 2020માં એક એફઆઈઆર નોંધવામાં આવી હતી અને ત્યારબાદ તેની સામે લુકઆઉટ નોટીસ જાહેર કરવામાં આવી હતી. કેઆરકેએ દિવંગત અભિનેતા ઋષિ કપૂર અને ઈરફાન ખાન પર અપમાનજનક ટ્વિટ પોસ્ટ કરવામાં આવ્યાં હતા. બંનેના 2020માં મૃત્યુ થયા હતા. જો કે, કેઆરકેએ બાદમાં આ ટ્વિટસને હટાવી દીધા હતા.

કેઆરકેની ધરપકડ આઈટી એક્ટ હેઠળ થઇ છે 

ન્યુઝ એજન્સી એએનઆઈ મુજબ હાર્ટમાં દુ:ખાવાની ફરિયાદ બાદ મંગળવારે સાંજે મુંબઈના કાંદિવલી વિસ્તારની શતાબ્દી હોસ્પિટલમાં કેઆરકેને લઇ જવામાં આવ્યો. આની પહેલા ડીસીપી વિશાલ ઠાકુરે નિવેદનમાં જણાવ્યું કે કેઆરકેની ધરપકડ આઈટી એક્ટ હેઠળ થઇ છે અને ઘણા વર્ષોથી પોલીસ તેની તલાશ કરી રહી હતી. તે વિદેશમાં હતો અને જેવો તે મુંબઈ પહોંચ્યો કે તરત જ તેની ધરપકડ કરવામાં આવી.