ગોંડલ / ગોંડલ વિવાદ મામલે સમાધાન અંગે કોઈએ કોમેન્ટ ન કરવાનું કહી જયરાજસિંહએ આપ્યું મોટું નિવેદન

• હું એક અઠવાડિયામાં સમાજના લોકોનું સંમેલન બોલાવીશઃ જયરાજસિંહ 
• સમાજ સમાજની રીતે છેઃ જયરાજસિંહ જાડેજા
• સમાજને જયરાજ કે અનિરુદ્ધની જરૂર નથીઃ જયરાજસિંહ

ગોંડલના જયરાજસિંહ જાડેજા અને રીબડાના અનિરુદ્ધસિંહ જાડેજા વચ્ચે વિવાદ વધતા હવે ક્ષત્રિય સમાજના આગેવાન પી.ટી જાડેજાએ સમાધાનની પહેલ કરી છે. રીબડા જૂથ સાથે સમાધાનની વાત પર જયરાજસિંહ જાડેજાના પુત્ર ગણેશસિંહ ઉર્ફે જ્યોતિરાદિત્યસિંહે બળાપો કાઢ્યો છે. તેમણે જણાવ્યું કે, હવે સમાજને જાગવામાં મોડુ થઇ ગયું છે, અમારા ટેકેદારોને હેરાન કરશે તો અમે તેમને જડબાતોડ જવાબ આપીશું. ત્યારે સમાધાનની વાતો વચ્ચે જયરાજસિંહ જાડેજા  સમાજનુ સંમેલન બોલાવશે. જેમણે રાજકોટમાં એક સમાજના કાર્યક્રમમાં નિવેદન આપ્યું હતું.

સમાધાન બાબતે કોઈએ કૉમેન્ટ કરવી નહિઃ જયરાજસિંહ

જયરાજસિંહ જાડેજાએ કહ્યું હતું કે સમાજ સમાજની રીતે છે.સમાજને જયરાજ કે અનિરૂદ્ધની જરૂર નથી. એક અઠવાડિયામાં સમાજના લોકોનું સંમેલન બોલાવીશ અને સમેલનમાં મારા પ્રશ્નોના ચોકસાઇ પૂર્વક જવાબ જોઈશે. તેવું પણ કહ્યું હતું. વધુમાં જયરાજસિંહએ ઉમેર્યું કે સમાધાન બાબતે કોઈએ કોમેન્ટ કરવી નહી અને સમાધાના બાબતે કોઈ ઓડિયો-વીડિયો વાયરલ કરે નહી. મહત્વનું છે કે  રાજપૂત સમાજના પી.ટી.જાડેજાએ બંને વચ્ચે સમાધાન બાબતની વાત કહી હતી. એટલું જ નહીં જરૂર પડશે તો ઉપવાસ પર ઉતરવાની કરી હતી વાત

'અમારી વિરુદ્ઘ સંમેલન કર્યુ ત્યારે સમાજ ક્યાં હતો?'
જ્યોતિરાદિત્યસિંહ જાડેજાએ જણાવ્યું કે, હાલ જે પરિસ્થિતિ ચાલી રહી છે તે બાબતે જો સમાજને વાકેફ કરી તો આજથી ત્રણ-ચાર મહિના પહેલા ગોંડલમાં યુદ્ધ એજ કલ્યાણ ગ્રુપ દ્વારા જે કાર્યક્રમ કરવામાં આવ્યો હતો, જે કાર્યક્રમ જયરાજસિંહ જાડેજાને નુકસાન પહોંચાડવા માટે કરવામાં આવ્યો હતો. એ કાર્યક્રમના મુખ્ય આયોજક રીબડાના અનિરુદ્ધસિંહ  જાડેજા હતા. ત્યારે હું સમાજને કહેવા માંગુ છું કે આ સમયે સમાજ ક્યાં હતો? સમગ્ર સૌરાષ્ટ્ર કે ગુજરાતના સમાજના આગેવાનો કે સમાજના સંગઠનોએ અનિરુદ્ધસિંહ જાડેજાને એવું નહોતું કહ્યું કે આ કાર્યક્રમ તમારાથી ન થાય, આવા કાર્યક્રમ તમારે ન કરવા જોઈએ. હું સ્પષ્ટ પણે માનું છે કે ત્યારે સમાજ સૂતો હતો. સમાજને જાગવામાં ઘણું મોડું થઈ ગયું  છે. એટલા માટે આ પરિસ્થિતિ અહીં સુધી પહોંચી છે

સમાધાન માટે ક્ષત્રિય આગેવાનો મેદાને પડ્યા

આપને જણાવી દઈએ કે, આવતા દિવસોમાં વિવાદ વધુ ન વકરે તે માટે ગુજરાતભરના ક્ષત્રિય આગેવાનો પ્રયાસ કરી રહ્યા છે. જયરાજસિંહ-અનિરુદ્ધસિંહ વચ્ચે સમાધાનના પ્રયાસ માટે હવે ક્ષત્રિય આગેવાનો મેદાને પડ્યા છે. આંતરરાષ્ટ્રીય રાજપૂત સમાજના પ્રમુખ પી.ટી જાડેજાએ નિવેદન આપતા જણાવ્યું હતું કે, બંને આગેવાનો ગુજરાતના ક્ષત્રિય સમાજનું ઘરેણું છે. તેઓ વડીલ તરીકે મારી વાત નહીં માને તો અચોક્કસ મુદતના ઉપવાસ કરીશ. મહત્વનું છે કે, પીટી જાડેજા એ સોશિયલ મીડિયામાં અલગ અલગ 5 વીડિયો પોસ્ટ કર્યા છે. જો કે, આ બધા વચ્ચે જયરાજસિંહ જાડેજાના પુત્રએ સમાજને વચ્ચે ન આવવા જણાવ્યું છે.