આગાહી / વરસાદની આગાહી: ગુજરાતમાં આજે કચ્છ, નવસારી, અમદાવાદ સહિતના જિલ્લાઓમાં મેઘરાજા કરશે બેટિંગ

• રાજ્યમાં વરસાદની આગાહી 
• હવામાન વિભાગે આપી આગાહી 
• હળવાથી મધ્યમ વરસાદની શક્યતા 

ગુજરાતમાં વરસાદની આગાહીઃ બંગાળની ખાડીમાં લો પ્રેશર સિસ્ટમ સક્રિય થતાં ગુજરાતમાં વરસાદની આગાહી કરવામાં આવી છે. લાંબા વિરામ બાદ ગઈકાલે અમદાવાદ, વડોદરા, મોરબી સહિતના વિસ્તારોમાં હળવો વરસાદ નોંધ્યા હતો. ત્યારે આજે પણ ગુજરાતમાં વરસાદની આગાહી કરવામાં આવી છે. હવામાન વિભાગના જણાવ્યા અનુસાર આજે રાજ્યના કેટલાક વિસ્તારોમાં હળવોથી મધ્યમ વરસાદ વરસી શકે છે.

આ વિસ્તારોમાં વરસાદ પડવાની સંભાવના
આજે ગુજરાતના જે વિસ્તારોમાં વરસાદની આગાહી કરવામાં આવી છે. તેમાં કચ્છ, બોટાદ, ગીર સોમનાથ, જૂનાગઢ, સુરેન્દ્રનગર, દમણ, દાદરાનગર હવેલી, તાપી, વલસાડ, નવસારી, ડાંગ, મહીસાગર, વડોદરા, અમદાવાદ, અરવલ્લી, ગાંધીનગર, સાબરકાંઠા અને પાટણનો સમાવેશ થાય છે. તો રાજ્યના કેટલાક વિસ્તારોમાં 30થી 40ની ઝડપે પવન ફૂંકાવાની પણ આગાહી કરવામાં આવી છે. 

હળવાથી મધ્યમ વરસાદની સંભાવના 
હવામાન વિભાગના જણાવ્યા અનુસાર, આજે વરસાદ દક્ષિણ ગુજરાત અને દક્ષિણ સૌરાષ્ટ્ર સુધી સિમિત રહેશે. દક્ષિણના તમામ જિલ્લાઓમાં હળવાથી મધ્યમ વરસાદની સંભાવના છે.

હવામાન નિષ્ણાંતોએ પણ કરી છે આગાહી
હવામાન વિભાગ ઉપરાંત કેટલાક હવામાન નિષ્ણાંતોએ પણ રાજ્યમાં વરસાદની આગાહી કરી છે. હવામાન નિષ્ણાંત પરેશ ગોસ્વામીએ કહ્યું હતું કે, બંગાળની ખાડીમાં બનેલું લોપ્રેશર મધ્યપ્રદેશ સુધી પહોંચ્યું છે. આ લોપ્રેશર ઉતર તરફ ગતિ કરતા ગુજરાત ઉપર સીયર ઝોન સર્જાયો છે. 20, 21, 22 ઓગસ્ટે રાજ્યમાં ઠેર-ઠેર વરસાદની શક્યતા છે. દક્ષિણ ગુજરાતમાં છૂટાછવાયા વરસાદની શક્યતા છે. સાથે જ સૌરાષ્ટ્ર-કચ્છમાં છૂટાછવાયા વરસાદની શક્યતા છે. 

અમદાવાદમાં સારા વરસાદની શક્યતા
તેઓએ જણાવ્યું છે કે, મધ્ય ગુજરાતમાં પણ સારા વરસાદની શક્યતા છે. છોટુ ઉદેપુર, નર્મદા, દાહોદ, પંચમહાલ, વડોદરા, મહીસાગર, ગાંધીનગર, ખેડા અને અમદાવાદમાં સારા વરસાદની શક્યતા છે. 23 તારીખથી રાજ્યમાં મોનસૂન બ્રેક આવશે. એ પછી રાજ્યમાં વરસાદની શક્યતાઓ ઓછી છે.