- રશિયા અને યુક્રેન વચ્ચે જંગ
- ઈંડિયન ઓયલે કરી મોટી ડીલ
- ભારતીયોને મળશે ખુશખબર
રશિયા અને યુક્રેન વચ્ચે ચાલી રહેલા જંગ દરમિયાન ઈંડિયન ઓયલે સોમવારે વાયટોલ સાથે 3 મિલિયન રશિયાઈ તેલનો કરાર કર્યો છે. જેની આયાત મે મહિનામાં થશે. સૂત્રોનું કહેવુ છે કે, ફેબ્રુઆરીમાં યુક્રેન પર રશિયાના હુમલા બાદ આ પ્રથમ કરાર છે. અહીં ઉલ્લેખનીય છે કે, યુક્રેન પર હુમલા બાદ અમેરિકા સહિત કેટલાય પશ્ચિમી દેશોએ રશિયા પર આકરાં પ્રતિબંધો લાગૂ કરી દીધા છે. ત્યાં સુધી કે અમેરિકાએ રશિયાના ક્રૂડ ઓયલ પર રોક લગાવી દીધી હતી.
દુનિયાનો ત્રીજો સૌથી મોટો ગ્રાહક છે ભારત
દુનિયામાં ત્રીજા નંબરના સૌથી મોટા તેલ ગ્રાહક અને આયાતકાર દેશ તરીકે ભારતનું નામ નોંધાયેલુ છે. અહીં પોતાની જરૂરિયાતના લગભગ 85 ટકા તેલ બહારથી આવે છે. તેમાં અત્યાર સુધીમાં રશિયામાંથી ફક્ત 2થી 3 ટકા જ ખરીદી થતી હતી. હવે યુક્રેન સંકટ બાદ દુનિયામાં ક્રૂડ ઓયલની કિંમતોમાં 40 ટકાનો વધારો થયો છે. સાથે રશિયા પણ હવે ક્રૂડ ઓયલ સસ્તા ભાવે વેચવા મજબૂર થયું છે. આ તમામની વચ્ચે ભારત સરકાર ઈચ્છે છે કે, યુક્રેન સંકટના કારણે ક્રૂડ ઓયલની વધેલી કિંમતોમાં તેની અસર તેના પર ન પડે.
યુરોપિય સંઘના પ્રતિબંધો
આજે સંસદમાં રામેશ્વર ચેલીએ એક લેખિત જવાબમાં જણાવ્યું હતું કે, ભારત સરકાર બજારની અસ્થિરતાને ઘટાડવા અને ક્રૂડ ઓયલની કિમંતોમાં વધારાને રોકવા માટે તમામ ઉચિત પગલા લેવા તૈયાર છે. ગત મહિને સરકારે કહ્યું હતું કે, તે વધુમાં વધુ ક્રૂડ ઓયલ લાવવાની તૈયારીમાં છે. ત્યારે હવે યુરોપિય સંઘના એક સૂત્રના હવાલેથી વિગતો મળી છે કે, સંઘ સાથે જોડાયેલ દેશ રશિયાની મુખ્ય તેલ કંપનીઓ રોસનેફ્ટ, ટ્રાંસનેફ્ટ અને ગરપ્રોમ નેફ્ટ વિરુદ્ધ નવા પ્રતિબંધો લગાવવા તૈયાર છે પણ તેની પાસેથી તેલ ખરીદવાનું ચાલુ રાખશે. આપને જણાવી દઈએ કે, રશિયા પાસેથી ક્રૂડ છેલ્લે ઈંડિયન ઓયલ દ્વારા એપ્રિલ 2020માં પારાદીપ બંદર પર આયાત કરવામાં આવ્યું હતું.
