દૂરસંચારમાં ક્રાંતિ / ભારતનું સ્વદેશી 4G નેટવર્ક તૈયાર, 5G વર્ષના અંતમાં કરીશું લૉન્ચ : કેન્દ્ર સરકારની જાહેરાત

• દેશમાં ટૂંક સમયમાં શરુ થશે સ્વદેશી 4G Network
• 2022ના અંતમાં શરુ થઈ જશે 5G Network
• લોકસભામાં ટેલિકોમ મિનિસ્ટર અશ્વીની વૈષ્ણવે કરી જાહેરાત

દેશના પહેલા સ્વદેશી 4જી નેટવર્કને લઈને ટેલિકોમ મિનિસ્ટર અશ્વીની વૈષ્ણવે એક જાહેરાત કરી છે. લોકસભામાં બોલતા ટેલિકોમ મિનિસ્ટરે કહ્યું કે દેશનું પહેલું સ્વદેશી 4જી નેટવર્ક ટૂંક સમયમાં શરુ થઈ જશે અને 2022ના અંતમાં દેશમાં 5જી નેટવર્ક ચાલુ થઈ જશે. 

ભારતે પોતાનું સ્વદેશી 4જી નેટવર્ક તૈયાર કરી દીધું 
અશ્વીની વૈષ્ણવે કહ્યું કે ભારતીય એન્જિનિયર્સે દેશના પહેલા 4જી નેટવર્કની તૈયારી કરી દીધી છે જે ટૂંક સમયમાં જાહેર થશે. તેમણે કહ્યું કે ભારતે ટૂંક સમયમાં સ્વદેશી 4જી નેટવર્ક તૈયાર કરી દીધું છે તેનાથી વિશ્વને ખૂબ નવાઈ લાગી છે. તેમણે કહ્યું કે 4જી નેટવર્ક પર 5જી નેટવર્ક બાંધવામાં આવશે. 

2022ના અંતમાં શરુ થશે 5જી નેટવર્ક 
ટેલિકોમ મંત્રીએ એવું પણ કહ્યું કે વૈજ્ઞાનિકોએ એવી આગાહી કરી છે કે ભારતનું પહેલું સ્વદેશી 5જી નેટવર્ક ચાલુ વર્ષના અંતમાં શરુ થઈ જશે. 

 9,000 મોબાઈલ ટાવર ઊભા કરવામાં આવશે
દેશના ઘણા વિસ્તારોમાં અપૂરતી કનેક્ટીવિટીના મુદ્દે જવાબ આપતા મંત્રીએ કહ્યું કે મોબાઈલ નેટવર્કને સુધારવા માટે સરકાર દ્વારા નવ યોજના શરુ કરવામાં આવી છે જેમાં નોર્થઈસ્ટના વિસ્તારો તથા બીજા જિલ્લાઓમાં 9,000 ટાવર ઊભા કરવામાં આવશે. તે ઉપરાંત  દેશના 60,200 ગામડાઓમાં મોબાઈલ ઈન્ફ્રાસ્ટ્રક્ચરમાં સુધારો લાવવા 6446 કરોડ ખર્ચવામાં આવી રહ્યાં છે. 

BSNLને ચાલુ વર્ષમાં આપ્યાં રુ.44,720 કરોડ
ટેલિકોમ મિનિસ્ટરે લોકસભામાં એવું પણ કહ્યું કે 2019માં સરકારે બીએસએનએલ માટે 69,000 કરોડનું બજેટ જાહેર કર્યું હતું ત્યારથી તે કંપની સ્થિર બની છે. ચાલુ વર્ષના બજેટમાં પણ સરકારે બીએસએનએલ માટે 44,720 કરોડની જોગવાઈ રાખી છે.