- ઈંગ્લેન્ડ સામે ભારતીય ટીમનો રેકોર્ડ પ્રભાવશાળી
- ઈંગ્લેન્ડમાં ચાર ટી-20 શ્રેણી રમાઈ
- ભારતીય ટીમને એક પણ શ્રેણીમાં પરાજય મળ્યો નથી
ભારત-ઈંગ્લેન્ડ વચ્ચે આજથી ટી-20 શ્રેણીની શરૂઆત
ભારત અને ઈંગ્લેન્ડ વચ્ચે ગુરૂવારથી ત્રણ મેચની ટી-20 શ્રેણીની શરૂઆત થઇ રહી છે. પહેલી મેચ સાઉથેમ્પટનમાં ભારતીય સમય મુજબ રાત્રે 10.30 વાગ્યે શરૂ થશે. એજબેસ્ટન ટેસ્ટમાં હાર બાદ ભારતીય ટીમ ટી-20માં સકારાત્મક શરૂઆત કરવા વિચારશે. નિયમિત કેપ્ટન રોહિત શર્માની વાપસીથી ભારતીય ટીમ મજબૂત થઇ છે.
સિનિયર ખેલાડીઓ બીજી ટી-20 મેચમાં ટીમની સાથે જોડાશે
જો કે, વિરાટ કોહલી, જસપ્રીત બુમરાહ, રવિન્દ્ર જાડેજા, શ્રેયસ ઐયર અને રિષભ પંત સહિત ઈંગ્લેન્ડ સામે ટેસ્ટ ટીમમાં સામેલ રહેલા ક્રિકેટર બીજી ટી-20 મેચમાં ટીમની સાથે જોડાશે. પહેલી ટી-20માં મોટાભાગના ખેલાડી એવા છે, જે આયરલેન્ડ પ્રવાસ વખતે ભારતીય ટીમમાં હતા. એવામાં રોહિત શર્માની સામે યોગ્ય પ્લેઈંગ-11 પસંદ કરવાનો પડકાર હશે.
સિનિયર ખેલાડીઓ ઉપસ્થિત નહીં રહે
ઘણા સિનિયર ખેલાડીઓની ગેરહાજરીમાં ઋતુરાજ ગાયકવાડ અને સંજુ સેમસન જેવા ખેલાડીઓને ઓસ્ટ્રેલિયામાં યોજાનારા ટી-20 વિશ્વ કપની ટીમ માટે પોતાની ક્ષમતા સાબિત કરવાની વધુ એક તક મળશે.
આંકડામાં ભારત-ઈંગ્લેન્ડ ટી-20 શ્રેણી
ભારતીય ટીમે અત્યાર સુધી ઈંગ્લેન્ડમાં બે અથવા તેનાથી વધુ મેચની ચાર ટી-20 શ્રેણી રમી છે. જેમાંથી ભારતીય ટીમને એક પણ શ્રેણીમાં હાર મળી નથી. ત્રણમાંથી તેને જીત અને એક શ્રેણી ડ્રો રહી છે. ભારતીય ટીમે ઈંગ્લેન્ડ સામે છેલ્લાં છ વર્ષોમાં ત્રણ ટી-20 શ્રેણી રમી છે, જેમાં દરેક શ્રેણીમાં જીત પ્રાપ્ત કરી છે.
