- ભારતીય ટીમ પાકિસ્તાનના પ્રવાસે જવા માંગતી નથી
- બીજી રમતોમાં આ દેશ એકબીજા સાથે રમી રહી છે
- 21 જૂને ભારત અને પાકિસ્તાન વચ્ચે મુકાબલો
ભારત અને પાકિસ્તાન વચ્ચે લાંબા સમયથી દ્વિપક્ષીય ક્રિકેટ સિરીઝ ચાલી રહી નથી. નોંધનીય છે કે ટીમ ઈન્ડિયા પાકિસ્તાનની ટીમ સામે આઈસીસી ટૂર્નામેન્ટ કે એશિયા કપમાં જ રમે છે. આ સાથે જ ભારતીય ટીમ પાકિસ્તાનના પ્રવાસે જવા માંગતી નથી અને તેની સામે પાકિસ્તાન પણ ભારત આવવા માંગતું નથી. જોકે આવું માત્ર ક્રિકેટમાં જોવા મળી રહ્યું છે. બંને દેશોના ક્રિકેટ બોર્ડે આ વર્ષના એશિયા કપ અને વર્લ્ડ કપ માટે તેમની ટીમોને સરહદ પાર મોકલવાનો ઇનકાર કર્યો છે પણ આ સાથે જ બીજી રમતોમાં આ દેશ એકબીજા સાથે રમી રહી છે.
21 જૂને ભારત અને પાકિસ્તાન વચ્ચે મુકાબલો
આવતા મહિને યોજાનારી સાઉથ એશિયન ફૂટબોલ (SAF) ચેમ્પિયનશિપને લઈને મહત્વની જાહેરાત કરવામાં આવી છે અને હાલ મળતી માહિતી મુજબ પાકિસ્તાનની ટીમ બેંગ્લોર જશે. જણાવી દઈએ કે ભારત અને પાકિસ્તાનની ટીમો એક જ ગ્રુપમાં છે. 21 જૂને બંને વચ્ચે મુકાબલો થશે. પાકિસ્તાની ટીમને આ ટૂર્નામેન્ટ માટે પરવાનગી પણ મળી ગઈ છે.
હોકીમાં પણ બંને ટીમો આમને-સામને
માત્ર ફૂટબોલ જ નહીં પરંતુ હોકીમાં પણ બંને ટીમો આમને-સામને થવાની છે. જણાવી દઈએ કે પાકિસ્તાને ઓગસ્ટમાં યોજાનારી એશિયન ચેમ્પિયન્સ ટ્રોફી માટે પોતાની ટીમ ચેન્નાઈ મોકલવાનું મન બનાવી લીધું છે. સાથે જ એમ પણ માહિતી સામે આવી છે કે પાકિસ્તાનની ટીમને ફંડિંગ મળી રહેશે તો એ હોકી ટીમ આ વર્ષે ભારતનો પ્રવાસ કરશે.
જણાવી દઈએ કે પાકિસ્તાન હોકી ફેડરેશને કહ્યું હતું કે તેના સેક્રેટરી જનરલ હૈદર હુસૈને દેશના સ્પોર્ટ્સ બોર્ડને પત્ર લખ્યો હતો, જેમાં તેને ભારત પ્રવાસ માટે એનઓસીની માંગ કરી હતી. આ સાથે જ એક વીડિયો પણ સામે આવ્યો હતો કેમાં હુસૈને કહ્યું હતું કે, 'પાકિસ્તાન ચોક્કસપણે ચેન્નાઈ જશે.'
ફૂટબોલ ટુર્નામેન્ટ સાઉથ એશિયન ફૂટબોલ ફેડરેશન (SAFF કપ)માં ભારત અને પાકિસ્તાન વચ્ચે ટક્કર થશે. બંને દેશોની ફૂટબોલ ટીમો લગભગ 5 વર્ષ પછી એકબીજા સાથે ટકરાતી જોવા મળશે. બેંગલુરુમાં 21 જૂનથી 4 જુલાઈ દરમિયાન યોજાનાર SAFF કપ માટે બંને પાડોશી દેશોને એક જ ગ્રુપમાં રાખવામાં આવ્યા છે. 14મી SAFF કપ ટુર્નામેન્ટનો ડ્રો બુધવારે અહીં યોજાયો હતો જેમાં ડિફેન્ડિંગ ચેમ્પિયન ભારત, પાકિસ્તાન, કુવૈત અને નેપાળને ગ્રુપ Aમાં રાખવામાં આવ્યા છે, જ્યારે લેબનોન, માલદીવ્સ, બાંગ્લાદેશ અને ભૂટાનને ગ્રુપ Bમાં રાખવામાં આવ્યા છે.
