VTV ANALYSIS / ગુજરાતના રાજકારણમાં અપક્ષ ઉમેદવારોનો દબદબો: 1962થી 2017 સુધીમાં ક્યારેય વિધાનસભામાં ખુરશી ખાલી નથી રહી

• ગુજરાતની ચૂંટણીના ઈતિહાસમાં 91 અપક્ષ ઉમેદવારો વિજેતા થયા
• સૌથી વધુ 1995માં 16 અપક્ષ ઉમેદવારો જીત્યા 
• સૌથી ઓછા 2012માં માત્ર એક જ અપક્ષ ઉમેદવાર જીત્યો

ગુજરાત વિધાનસભાની ચૂંટણીને ગણતરીના દિવસો જ બાકી રહ્યા છે. ગુજરાત વિધાનસભાની ચૂંટણીના પ્રથમ તબક્કાની 89 બેઠકોમાં કુલ 788 ઉમેદવારો મેદાનમાં છે, જ્યારે બીજા તબક્કામાં કુલ 93 બેઠકો પર 833 ઉમેદવારો પોતાનું નસીબ અજમાવી રહ્યા છે. આમ કુલ 182 બેઠક પર 1621 ઉમેદવારો વચ્ચે બરાબરનો જંગ જામશે. 1621 પૈકી 624 અપક્ષ ઉમેદવાર મેદાનમાં છે. આપને જણાવી દઈએ કે, અત્યાર સુધીની ચૂંટણીના ઈતિહાસમાં 91 અપક્ષ ઉમેદવારોનો વિજય થયો છે. 

વિધાનસભા ગૃહમાં ક્યારેય ખાલી નથી રહી અપક્ષ ઉમેદવારની ખુરશી
અત્યાર સુધીમાં યોજાયેલી ગુજરાત વિધાનસભાની ચૂંટણીમાં એવું ક્યારેય નથી બન્યું કે કોઈ અપક્ષ ઉમેદવાર ચૂંટણીના મેદાનમાં ન હોય. સાથે જ આજ સુધીની રાજ્યની તમામ વિધાનસભાની ચૂંટણીઓમાં અપક્ષ ઉમેદવાર ધારાસભ્ય બન્યો ન હોય તેવો એક પણ કિસ્સો નથી. એટલે કે વર્ષ 1962થી 2017 સુધીની એક પણ એવી ચૂંટણી નથી, જેમાં અપક્ષ ઉમેદવાર જીત્યો ન હોય. એટલે કે આજદિન સુધી ગૃહમાં ક્યારેય  અપક્ષ ઉમેદવારની ખુરશી ખાલી રહી નથી. 

1995માં જીત્યા હતા સૌથી વધુ 16 અપક્ષ ઉમેદવારો
અત્યાર સુધીમાં યોજાયેલી ગુજરાત વિધાનસભાની 13 ચૂંટણીમાં 1995માં સૌથી વધુ અપક્ષ ઉમેદવાર 1619 મેદાનમાં હતા. જેમાં 16 અપક્ષ ઉમેદવારોનો વિજય થયો હતો. જે અત્યાર સુધીનો સૌથી વધુ આંકડો છે. જ્યારે વર્ષ 2012માં માત્ર એક જ અપક્ષ ઉમેદવાર જીત્યા હતા. જે અત્યાર સુધીનો સૌથી ઓછો આંકડો છે.

આ વર્ષે કુલ 624 ઉમેદવારો ચૂંટણીના મેદાનમાં
આપને જણાવી દઈએ કે, આ વર્ષે કુલ 624 ઉમેદવારો ચૂંટણીના મેદાનમાં છે. તો અત્યાર સુધીમાં કુલ અપક્ષ ઉમેદવારોની સંખ્યા 7931 થાય છે. ગત વિધાનસભાની ચૂંટણીની વાત કરીએ તો વર્ષ 2017માં કુલ 794 અપક્ષ ઉમેદવારોએ મેદાન ઝંપલાવ્યું હતું. જેમાંથી 3 ઉમેદવારો જીત્યા હતા. આમ ગુજરાતના રાજકારણમાં અપક્ષોનો ચૂંટણીમાં જીતવાનો સિલસિલો હજુ પણ ચાલી રહ્યો છે. આ વખતની ચૂંટણીમાં 624 અપક્ષ ઉમેદવારોમાંથી કેટલાને સફળતા મળશે તે આગામી 8 ડિસેમ્બરે ચૂંટણીના પરિણામ બાદ જ ખબર પડશે.

છેલ્લી 6 ચૂંટણીમાં 4320 અપક્ષ ઉમેદવારોમાંથી 27 જીત્યા