પિતા સમાન કાકા ભાઈ-ભાભીના નિધન બાદ તેના સંતાનોને સાચવવાની જગ્યાએ તેનો સૌદો કરી રહ્યો હતો. માતા પિતાનો આધાર ગુમાવી ચૂકેલી 14 વર્ષની ભત્રીજીને તેનાથી 4 વર્ષ મોટા યુવક સાથે પૈસાની લાલચે પરણાવી દીધી. એટલાથી અટકતું નહોતું તે સગીરાને સાસરે ન મોકલી આ રીતે પૈસા પડાવવાના કાવતરા કરતો રહેતો હતો. અંતે કંટાળેલી ભત્રીજીએ મહિલા હેલ્પલાઈન 181ની મદદ માંગતા આ સમગ્ર ભાંડો ફુટ્યો હતો.
મને મદદ કરો મારા કાકા મારી નાંખશે
કાકાએ સગીર ભત્રીજીને પૈસાની લાલચે પરણાવી દીધી
દ્રષ્ટિને સખી વન સ્ટોપ સેન્ટરમાં મુકી છે
ખેડા જિલ્લાના નડિયાદ તાલુકાના નવા કુવા ગામમાં રહેતી 23 વર્ષીય દ્રષ્ટિએ મહિલા હેલ્પલાઈનની મદદ માંગી કહ્યું કે બેન મને મદદ કરો મારા કાકા મારી નાંખશે. આ ફોન આવતાની સાથે મહિલા હેલ્પલાઈનના કાઉન્સિલર રીટાબેન તેની મદદે પહોંચ્યા હતા. જ્યાં તેને જાણવા મળ્યું હતું કે દ્રષ્ટિ 13 વર્ષની હતી ત્યારે તેના માતા પિતા ગુજરી ગયા હતા. માતા પિતાના નિધનથી 13 વર્ષની દ્રષ્ટિના માથે 1 વર્ષના નાના ભાઈ અને 5 વર્ષની નાની બેનની જવાબદારી આવી પડી હતી. દ્રષ્ટિ લોકોના ઘરના કામ કરી ભાઈ બેન અને તેના દાદીનું પુરુ કરતી હતી. તેના કાકા તરફથી કોઈ મદદ નહોતી મળતી.
દ્રષ્ટિ જ્યારે 14 વર્ષની થઈ ત્યારે 18 વર્ષીય નયન પાસેથી દ્રષ્ટિના કાકાએ 2 લાખ અને દાગીના લીધા હતા. દ્રષ્ટિને તેના કાકાએ કહ્યું કે, નયન પૈસા વાળો છે તું તેની સાથે લગ્ન કરીશ તો તારું અને તારા ભાઈ -બહેનનું પુરુ કરશે. દ્રષ્ટિ તેમની વાતમાં ભોળવાઈ ગઈ અને નયન સાથે લગ્ન કરી લીધા. પણ કાકાના મનમાં લાલચનું તાંડવ હતું. તેણે નયનના પરિવારને દ્રષ્ટિ 18 વર્ષની થાય ત્યારે મોકલીશું કહીને તેને સાસરે ન મોકલી. દ્રષ્ટિ 23 વર્ષની થઈ પણ કાકા તેને સાસરે નહોતા મોકલી રહ્યા. જો કે એક બે વાર દ્રષ્ટિ તેના સાસરે ગઈ ત્યારે નયને તેને કહ્યું કે, ‘મારે તને નથી રાખવી. તુ મને નથી ગમતી. મને છુટાછેડા આપી દે’. નિર્દોષ દ્રષ્ટિએ પેટ છુટી વાત કાકાને કરી. કાકાએ નયનને કહ્યું કે ‘તમારે છુટાછેડા જોઈતા હોય તો 10 લાખ આપવા પડશે.’
નયનના પરિવારજનો 10 લાખ આપી શકે તેમ નહોતા. જેથી તેમણે કહ્યું કે, ‘અમારે છુટુ નથી આપવું અને દ્રષ્ટિને લઈ પણ નથી જવી.’ આ દરમિયાન દ્રષ્ટિને તેના ગામના સમીર સાથે પ્રેમ થતાં તેણે કાકાને કહ્યુ કે, ‘મને છુટાછેડા અપાવીને સમીર સાથે લગ્ન કરાવો.’ જોકે લાલચુ કાકાએ દ્રષ્ટિના લગ્ન માટે બીજો યુવક શોધ્યો હતો. જે દ્રષ્ટિ સાથે લગ્ન કરવા કાકાએ માંગેલા પૈસા આપવા તૈયાર હતો. કાકાએ દ્રષ્ટિને ધમકી આપી કે,‘તારા લગ્ન હું કહું ત્યાં જ થશે. જો તું સમીર સાથે લગ્ન કરીશ તો તને અને તારા નાના ભાઈ બહેનને મારી નાંખીશ.’
આ ધમકીથી ડરેલી દ્રષ્ટિ જ્યારે એંકાતવાળી જગ્યાએ રડી રહી હતી તે જોઈ ગયેલા ગામના એક જાગૃત નાગરિકે તેને સાંભળી 181 અંગે જણાવ્યું હતુ. દ્રષ્ટિની મદદે પહોંચેલા રીટાબહેને કાકાને કાયદો સમજાવતા કહ્યું હતું કે,‘તમે દ્રષ્ટ્રિના બાળ લગ્ન કરાવ્યા છે. બીજુ કે તેના લગ્ન માટે પૈસા લેતા ફરો છો અને તેને મારવાની ધમકી બદલ તમારી સામે ગુનો બની શકે છે.’ રીટાબેનની આ વાતથી કાકા દ્રષ્ટિના લગ્ન સમીર સાથે કરાવવા તૈયાર તો થયા પણ તેમણે સમીર પાસેથી પણ પૈસાની માંગણી કરી હતી. અંતે મહિલા હેલ્પલાઈને કાયદેસરની કાર્યવાહી કરી છે અને દ્રષ્ટિને સખી વન સ્ટોપ સેન્ટરમાં મુકી છે.