Video / રશિયન રાજદ્વારીને યુક્રેનિયન સાંસદે માર્યો મુક્કો, આંતરરાષ્ટ્રિય સ્ટેજ પર જોવા મળ્યું રશિયા અને યુક્રેન વચ્ચે યુદ્ધ, મચી ગયો ખળભળાટ

• તુર્કીની રાજધાની અંકારામાં બની ચોંકાવનારી ઘટના
• રશિયા અને યુક્રેનના પ્રતિનિધિઓ વચ્ચે ઝપાઝપી થઈ 
• રશિયન પ્રતિનિધિએ યુક્રેનનો ધ્વજ ફાડી નાખ્યો 
• યુક્રેનિયન પ્રતિનિધિએ રશિયન પ્રતિનિધિને માર્યો મુક્કો

તુર્કીની રાજધાની અંકારામાં એક ઘટના જોવા મળી હતી જે દર્શાવે છે કે રશિયા અને યુક્રેન વચ્ચેનો તણાવ કઈ હદ સુધી પહોંચી ગયો છે. રશિયા અને યુક્રેનના પ્રતિનિધિઓ વચ્ચે ઝપાઝપી થઈ હતી. અંકારામાં બ્લેક સી ઈકોનોમિક કોમ્યુનિટીની બેઠકમાં પહેલા રશિયન પ્રતિનિધિએ ત્યાં લગાવેલ યુક્રેનનો ધ્વજ ફાડી નાખ્યો અને પછી બંને દેશોના પ્રતિનિધિઓ વચ્ચે અથડામણ થઈ.

ઝપાઝપીનો એક વીડિયો પણ સોશિયલ મીડિયા પર વાયરલ

યુક્રેન અને રશિયાના પ્રતિનિધિઓ વચ્ચેની આ ઝપાઝપીનો એક વીડિયો પણ સોશિયલ મીડિયા પર વાયરલ થઈ રહ્યો છે. વીડિયોમાં યુક્રેનિયન સાંસદ ઓલેક્ઝાન્ડર મેરીકોવ્સ્કી પોતાના દેશના ધ્વજ સાથે ઉભા જોવા મળે છે. દરમિયાન, એક રશિયન પ્રતિનિધિ પાછળથી આવે છે અને યુક્રેનિયન ધ્વજ લઈ જાય છે. આ જોઈને, યુક્રેનિયન પ્રતિનિધિ ગુસ્સામાં રશિયન પ્રતિનિધિની પાછળ જાય છે અને તેના ચહેરા પર મુક્કો મારે છે.

🥊 In Ankara 🇹🇷, during the events of the Parliamentary Assembly of the Black Sea Economic Community, the representative of Russia 🇷🇺 tore the flag of Ukraine 🇺🇦 from the hands of a 🇺🇦 Member of Parliament.

The 🇺🇦 MP then punched the Russian in the face. pic.twitter.com/zUM8oK4IyN

— Jason Jay Smart (@officejjsmart) May 4, 2023

તમારા હાથ અમારા ધ્વજથી દૂર રાખો

આ પછી કેટલાક અન્ય અધિકારીઓ દ્વારા રશિયન પ્રતિનિધિને રોકી દેવામાં આવે છે. જો કે, આ સમય દરમિયાન યુક્રેનિયન પ્રતિનિધિઓએ તેમનો ધ્વજ પાછો ખેંચી લીધો. ફેસબુક પર આ ઘટનાનો વીડિયો શેર કરતાં તેણે યુક્રેનિયનમાં લખ્યું: તમારા હાથ અમારા ધ્વજથી દૂર રાખો. ઘટનાસ્થળે હાજર અન્ય લોકો ઘટનાનો વીડિયો બનાવતા જોવા મળ્યા હતા.

યુક્રેન અને રશિયા વચ્ચે તણાવ ચરમસીમાએ પહોંચી ગયો

તમને જણાવી દઈએ કે આ ઘટનાના એક દિવસ પહેલા ક્રેમલિનમાં રાષ્ટ્રપતિ વ્લાદિમીર પુતિન પર ડ્રોન હુમલો થયો હતો, જે બાદ યુક્રેન અને રશિયા વચ્ચે તણાવ ચરમસીમાએ પહોંચી ગયો હતો. જો કે યુક્રેને ડ્રોન હુમલાની ઘટનાને નકારી કાઢી હતી. તમને જણાવી દઈએ કે બ્લેક સી ઈકોનોમિક કોમ્યુનિટીની રચના 30 વર્ષ પહેલા થઈ હતી અને રશિયા અને યુક્રેન બંને તેના સભ્યો છે. તેનો ઉદ્દેશ્ય "કાળો સમુદ્ર પ્રદેશમાં શાંતિ, સ્થિરતા અને સમૃદ્ધિ તરફ કામ કરવાનો" છે. જો કે તેનાથી વિપરીત તેમાં માત્ર રશિયા અને યુક્રેનના પ્રતિનિધિઓ જ હિંસા કરતા જોવા મળ્યા હતા.