- અમરેલીમાં 15 દિવસ પહેલા ખુલ્લા મુકવામાં આવેલા પુલમાં ગાબડા
- ભાવનગર-સોમનાથ નેશનલ હાઇવે પરના પુલ પર ગાબડા
- રાજુલાના હિંડોરણા પાસે બનાવેલો છે પુલ
બ્રિજની કામગીરીને લઈ સરકાર વર્ષોથી બદનામીનો માર ભોગવી રહી છે. ભૂતકાળમાં અનેક બ્રિજમાં તિરાડો તો અનેક બ્રિજ જમીનદોસ્ત થયા હોવાના કિસ્સાઓ સામે છે. આવી સ્થિતિ વચ્ચે રાજ્યમાં વધુ એક બ્રિજની કામગીરી ચર્ચાના ચકડોળે ચડી છે. અમરેલીમાં 15 દિવસ પહેલા ખુલ્લો મુકવામાં આવેલા પુલમાં ગાબડા હોવાનું સામે આવતા તંત્ર દોડતું થયું છે. બીજી બાજુ નવાનકોર બ્રિજમાં તિરાડ દેખાતા કામગીરી સામેં પણ સવાલો ઉઠ્યા છે.
ગાબડા પડતા વાહન વ્યવહાર બંધ કરાયો
ભાવનગર-સોમનાથ નેશનલ હાઇવે પરના પુલ પર ગાબડા પાડયા હોવાનું ઉઘાડું પડ્યું છે. મહત્વનું છે કે તાજેતરમાં જ રાજુલાના હિંડોરણા પાસે પુલનું નિર્માણ કરાયું છે. જેમાં ગાબડા પડતા વાહન વ્યવહાર બંધ કરાયો છે. સ્થાનિક વ્યક્તિએ વીડિયો વાયરલ ગંભીર આક્ષેપ કરતા હાલ તંત્ર દોડતું થયું છે. તો સલામતીના ભાગરૂપે આ પુલ પરના વાહનવ્યવહાર પર રોક લગાવી દઇ જૂના પુલ પર ફરી વાહન વ્યવહારને ડાયવર્ટ કરવામાં આવ્યો છે.
લોકોમાં પણ રોષ જોવા મળી રહ્યો છે
લાખો કરોડો રૂપિયાના ખર્ચે બ્રિજનું નિર્માણ કરાયું હતું. જો કે તેમાં કામગીરીમાં છીંડા રહી ગયા હોય અને ગેરરીતિ આચરવામાં આવી હોવાના આક્ષેપ થઈ રહ્યા છે. બીજી બાજુ 15 દિવસમાં ગાબડા અને તિરાડ પડી જતા લાખો રૂપિયા પાણીમાં ગયા હોવાનું બહાર આવ્યુ છે. ખાસ વાત એ છે કે તંત્રએ કોન્ટ્રાકટરનો કાન આંબળવાને બદલે બચવા માટે કેમિકલ નાંખી પાપ ઢાંકવાની કોશિશ કરી હોવાના પણ આરોપ લાગી રહ્યા છે. બીજી તરફ લોકો આ કિસ્સાને ભ્રષ્ટાચારનો પુરાવો ગણી રહ્યા છે. આટલી મોટી ગંભીરતા છતાં આ મામલે જવાબદારો સામે કડક પગલા લેવામાં કોઈ સબંધિત અધિકારી આગળ ન આવતા લોકોમાં પણ રોષ જોવા મળી રહ્યો છે.
