- 31 ઓગસ્ટે દેશભરમાં જોવા મળશે સુપર મૂન
- ખગોળ જાણકાર અંબાલાલ પટેલનુ નિવેદન
- સુપર મૂન થતા સમુદ્રમાં ભારે ભરતી રહેશેઃ અંબાલાલ
ચંદ્રયાન-3ની સફળતાએ અવકાશમાં લોકોની ઉત્સુકતાને વધારી દીધી છે. સમગ્ર વિશ્વમાં ભારતની આ સફળતાની પ્રશંસા કરવામાં આવી રહી છે. આ દરમિયાન અવકાશમાં એક એવી ખગોળીય ઘટના બનવાની છે, જેને દુર્લભ માનવામાં આવે છે. વાસ્તવમાં આ મહિનાના અંતમાં શનિ ગ્રહ પૃથ્વીની ખૂબ નજીક આવવાનો છે. આ સમય દરમિયાન લોકો પૃથ્વી પરથી કોઈપણ સાધનની મદદ વગર જ શનિ ગ્રહને જોઈ શકશે. આ અંગે ખગોળ શાસ્ત્રના જાણકાર અંબાલાલ પટેલનું પણ નિવેદન સામે આવ્યું છે. તેઓએ જણાવ્યું છે કે, 31 ઓગસ્ટે દેશભરમાં સુપર મૂન જોવા મળશે.
27 ઓગસ્ટે આ ખગોળીય જોઇ શકાશે: અંબાલાલ
અંબાલાલ પટેલે જણાવ્યું કે, 26-27 ઓગસ્ટે સૂર્ય શનિનો પ્રતિયોગ થશે. આ વખતે પૃથ્વી પરથી શનિના વલયો પણ સ્પષ્ટ દેખાશે. પૃથ્વીની ભ્રમણ કક્ષામા શનિ અને સૂર્યની વચ્ચે પૃથ્વી આવે છે. 2023માં 26-27 ઓગસ્ટ દરમિયાન આ ઘટના દેખાશે. આ ઘટના દર વર્ષે એકવાર થાય છે. 2022માં 14મી ઓગસ્ટે આ ખગોળીય ઘટના બની હતી.
આ ગ્રહ ફેબ્રુઆરી 2024 સુધી દેખાશે
નેશનલ એરોનોટિક્સ એન્ડ સ્પેસ એડમિનિસ્ટ્રેશન (NASA)એ શુક્રવારે કહ્યું હતું કે, શનિ આકાશમાં મોટો અને ચમકતો જોવા મળશે. આવું એટલા માટે થશે કારણ કે આ ગ્રહ 26-27 ઓગસ્ટના રોજ સૂર્યના સીધા વિરોધમાં હશે. સૂર્યપ્રકાશના કારણે શનિ ગ્રહ પહેલા અને ત્યાર પછીના અઠવાડિયામાં આકાશમાં સૌથી મોટો અને સૌથી ચમકતો જોવા મળશે. આ ગ્રહ ફેબ્રુઆરી 2024 સુધી દેખાશે. આ દરમિયાન કોઈપણ વ્યક્તિ આકાશમાં દેખાતા શનિ ગ્રહને સરળતાથી ઓળખી શકે છે.
સૂર્યોદય સુધી પીળા તારાને જોઈ શકાશે
નાસાએ કહ્યું હતું કે, શનિ પૃથ્વીથી સૌથી દૂર આવેલા ગ્રહોમાંથી એક છે. પરંતુ ઓગસ્ટના છેલ્લા અઠવાડિયામાં તેને લોકો કોઈપણ સાધનની મદદ વગર સરળતાથી જોઈ શકશે. નાસાના જણાવ્યા અનુસાર, તે સૂર્યાસ્ત સમયે દક્ષિણપૂર્વીય ક્ષિતિજ પર દેખાશે અને કોઈપણ સૂર્યોદય સુધી આખી રાત તેજસ્વી પીળા તારાને જોઈ શકશે. કદમાં મોટો અને ચમકદાર હોવાને કારણે શનિ ગ્રહને ઓળખવામાં ખૂબ જ સરળતા રહેશે.
