- વડોદરાના શખ્સે નકલી IAS બનીને કરી છેતરપિંડી
- રાજકોટના કારખાનેદાર પાસેથી પડાવ્યા 1.22 કરોડ
- IBના ડેપ્યુટી ડાયરેક્ટર હોવાનું કહી રોકડી કરી
મહાઠગ કિરણ પટેલ વિરૂદ્ધ વધુ એક ફરિયાદમાં ક્રાઈમ બ્રાન્ચે કસ્ટડી મેળવી છે. જેમાં G 20 સમિટનાં બેનર હેઠળ હોટલ હયાતમાં ઈવેન્ટ યોજી હતી. જેમાં ઈવેન્ટનું ભાડું, ફ્લાઈટની ટિકિટ મળી કુલ રૂા. 3.51 લાખની છેંતરપિંડી કરી હતી. જે છેતરપિંડીના કેસમાં ક્રાઈમ બ્રાન્ચે કિરણ પટેલની કસ્ટડી મેળવી છે. કિરણ પટેલની સામે હજુ કાર્યવાહી ચાલી રહી છે, પૂછપરછમાં અનેક ચોંકાવનારા ખુલાસા થઈ રહ્યા છે. ત્યારે રાજકોટ ક્રાઈમ બ્રાન્ચમાં વધુ એક ઠગની સામે ફરિયાદ નોંધાઈ છે. જેણે કિરણ પટેલની જેમ જ રાજકોટના કારખાનેદાર સાથે છેતરપિંડી આચરી છે.
કારખાનેદાર બન્યા છેતરપિંડીનો ભોગ
રાજકોટના સત્યસાંઈ હાર્ટ હોસ્પિટલ રોડ પર આવેલી ઈન્દ્રલોક રેસીડેન્સીમાં રહેતા અને કોપર વાયરનું કારખાનું ધરાવતા અલ્પેશ બાવનજીભાઈ નારીયાએ વડોદરાના માંજલપુર વિસ્તારમાં આવેલી શાંતિકુજ સોસાયટીમાં રહેતા અને પોતાને બોટાદમાં ડે.કલેક્ટર અને IBમાં ડેપ્યુટી ડાયરેક્ટર તરીકે ઓળખ આપનાર હિતેશ ઠાકર સામે છેતરપિંડીની ફરિયાદ નોંધાવી છે.
1.22 કરોડની છેતરપિંડી
ફરિયાદમાં અલ્પેશ નારીયાએ જણાવ્યું છે કે, બે વર્ષ પહેલા તેમના ભાઈ વિજય નારીયાની ઓળખાણ વડોદરાના હિતેશ સાથે થઈ હતી. હિતેશ પોતે બોટાદમાં ડે.કલેક્ટર અને IBમાં ડેપ્યુટી ડાયરેક્ટર હોવાની ઓળખાણ આપી હતી. જે બાદ તેણે વિજયભાઈને કારખાના માટે સસ્તામાં સરકારી જમીન અપાવવાની અને ડિફેન્સમાં કોપર વાયરનો કોન્ટ્રાક્ટ અપાવાની લાલચ આપી હતી. જેના બદલામાં તેણે અલ્પેશભાઈ અને તેમના ભાઈ વિજયભાઈ પાસેથી 1.22 કરોડ રૂપિયા લીધા હતા.
ખોટા કેસમાં ફસાવી દેવાની આપી ધમકી
લાંબો સમય થવા છતા હિતેશ ઠાકરે જમીન પણ અપાવી ન હતી તેમજ ડિફેન્સ વિભાગમાં કોપર વાયરનો ઓર્ડર પણ અપાવ્યો ન હતો. જ્યારે નકલી IAS પાસે અલ્પેશભાઈએ પૈસા પરત માંગતા તેણે ખોટા કેસમાં ફસાવી દેવાની અને ઇન્કમટેક્સની રેડ પડાવવાની ધમકી આપી હતી.
ક્રાઈમ બ્રાન્ચે શરૂ કરી તપાસ
જે બાદ છેતરપિંડીનો ભોગ બનેલા બંને ભાઈએ આ અંગે રાજકોટ કમિશરનો સંપર્ક કર્યો હતો અને સમગ્ર હકીકત જણાવી હતી. ત્યારે હવે આ કેસની તપાસ ક્રાઈમ બ્રાન્ચને સોપાઈ છે. ફરિયાદ બાદ ગઠીયાને પોલીસે ઝડપી લીધો છે. તેની પૂછપરછમાં હજુ પણ મોટા ખુલાસા થાય તેવી શક્યતા છે.
