અહેવાલ / પતિના વેતન પર પત્નીના અધિકારને લઇને હાઇકોર્ટનો ઐતિહાસિક ચુકાદો, જાણો શું છે આ નિર્ણય

• પંજાબ એન્ડ હરીયાણા હાઈ કોર્ટનો મહત્વનો નિર્ણય 
• પતિનું વેતન વધે તો પત્ની પણ ખાધાખોરાકી વધારવાની હકદાર
• ફેમીલી કોર્ટના આદેશને હાઈકોર્ટમાં અપાયો હતો પડકાર

પંજાબ એન્ડ હરીયાણા હાઈકોર્ટે એક મહત્વનો ચુકાદો આપ્યો છે. જેમાં એક ચોખવટ કરી દીધી છે કે લગ્ન જીવનમાં ઉભા થતા વિવાદો પછી જે પરિસ્થતિ ઉભી થાય છે તેમાં બન્નેએ અલગ અલગ રહેવાનો વારો આવે છે. જેના કારણે પતિએ પત્નીને ખાધાખોરાકી આપવાની રહેતી હોય છે. તે દરમિયાન જો પતિની આવકમાં એકાએક વધારો થાય છે. તો પત્નીની નક્કી થયેલા ખાધાખોરાકીના ભથ્થામાં પણ વધારો કરવો પડશે એવો પંજાબ એન્ડ હરીયાણા હાઈ કોર્ટે  ચુકાદો આપ્યો છે.

ફેમિલી કોર્ટે આપ્યો હતો આદેશ

પતિનુ વેતન વધ્યા બાદ પત્નીની ખાધાખોરાકી  20 હજાર રુપિયાથી વધારીને 28000 કરી દેવામાં આવે, તેવો આદેશ પંચકુલાના નિવાસી વરુણ જગોટાને પંચકુલા ફેમિલી કોર્ટે આદેશ આપ્યો હતો પરંતુ પતિ વરુણ જગોટાએ ફેમિલી કોર્ટના આ આદેશને હાઈકોર્ટમાં પડકાર્યો હતો. હાઈ કોર્ટના એચ.એસ.મદાને પતિ દ્વારા  દાખલ કરેલી અરજી નામંજૂર કરતા ફેમિલી  કોર્ટના આદેશને યોગ્ય ઠેરવીને દખલ કરવાની ના પાડી દીધી હતી. હાઈકોર્ટે ચોખ્ખા શબ્દોમાં કહી દીધું હતુ કે જો પતિની આવકમાં વધારો થાય છે તો પત્ની પણ તેની ખાધાખોરાકીમા વધારો થવાનો હક ધરાવે છે. 

પતિએ શું કરી દલીલો

અરજી કરનાર પતિએ હાઈ કોર્ટમાં દલીલો કરતા કહ્યું હતુ કે,  5 માર્ચ 2020થી મારી આવક 95 હજાર રુપિયાથી વધીને હવે 1 લાખ 14 હજાર માસિક થઈ ગઈ છે. બધા કપાત બાદ મને 92 હજાર 175 રુપિયા આવક મળે છે અને આવામાં ફેમિલી કોર્ટે 28 હજાર રુપિયા ખાધાખોરાકી આપવાનો આદેશ આપ્યો છે તો તે કેવી રીતે આપી શકાય ? હાઈકોર્ટે ફરિયાદી પતિની દલીલોને ફગાવતાં કહ્યું કે હાઈકોર્ટ આ બાબતોમાં ત્યારે જ હસ્તક્ષેપ કરી શકે જ્યારે આદેશ કાયદાની વિરુદ્ધમા અથવા તો પક્ષપાતી હોય. 

હાઈકોર્ટે કરી આ વાત

હાઈકોર્ટે ફરિયાદી પતિની દલીલોને નામંજૂર કરતા કહ્યું  કે, રિવિઝન અરજીમાં હાઈકોર્ટની દખલગીરીની શક્યતાઓ ઘટી જાય છે. ચુકાદામાં ફેરફાર કરવાનું ત્યારે જ શક્ય બને જ્યારે નિર્ણય કાયદાની વિરુદ્ધમાં હોય કે કોઈની તરફેણ કરવામાં હોય. અને આ કેસમાં એવું ક્યાંય જોવા મળી નથી રહ્યું. એક તરફ પતિની આવકમાં વધારો થયો છે તો બીજી તરફ પત્નીના ઘરના ભાડામાં પણ 1500 રુપિયાનો વધારો થયો છે. આવામાં ફેમિલી કોર્ટે પોતાનો નિર્ણય આપતાં બધા જ તથ્યોને તપાસ્યાં છે અને બાદમાં જ આ નિર્ણય જાહેર કર્યો છે. આ રીતે હાઈકોર્ટે ફરિયાદીને કોઈપણ પ્રકારની છુટછાટ કે રાહત આપ્યા સિવાય તેની અરજીને ફગાવીને ફેમિલી કોર્ટેના નિર્ણયને યોગ્ય ઠેરવ્યો છે.