હવામાન / હજુ 3 દિવસ સુધી હવામાન વિભાગની આગાહીઃ રાજ્યના 77 તાલુકામાં વરસ્યો વરસાદ, જાણો ક્યાં કેટલો?

રાજ્યના અનેક જિલ્લાઓમાં પવન સાથે ધોધમાર વરસાદ વરસ્યો છે. ત્યારે આગામી 3 દિવસ સુધી રાજ્યમાં વરસાદી માહોલ યથાવત રહેશે. દક્ષિણ ગુજરાતમાં આવતીકાલે ભારે વરસાદ થઈ શકે છે. જેમાં સુરત અને નવસારી, વલસાડમાં ભારે વરસાદની શક્યતા છે. જ્યારે છોટાઉદેપુર, દાહોદ, પંચમહાલમાં પણ ભારે વરસાદ થઈ શકે છે. મધ્ય ગુજરાત અને કચ્છમાં પણ સામાન્ય વરસાદ યથાવત રહેશે. સૌરાષ્ટ્રના દરિયાઈ જિલ્લાઓમાં પણ વરસાદની શક્યતા છે. દ્વારકા, જૂનાગઢ, પોરબંદરમાં રહેશે વરસાદી માહોલ યથાવત છે. ઉત્તરગુજરાત અને કચ્છના વિસ્તારોમાં સામાન્ય વરસાદ થશે.

રાજ્યના 77 તાલુકામાં વરસ્યો વરસાદ

રાજ્યના 77 તાલુકામાં સારો એવો વરસાદ વરસ્યો છે. સૌથી વધુ નવસારીના ખેરગામમાં 7.5 ઈંચ વરસાદ થયો છે. તો વઘઇમાં પણ 7.5 ઈંચ અને ચીખલીમાં 5 ઈંચ વરસાદ છયો છે. વાસંદમાં 5 ઈંચ, મહુવામાં 4.5 ઈંચ, ગરુડેશ્વરમાં 4.5 ઈંચ, કપરાડામાં 4 ઈંચ, ધરમપુરમાં 4 ઈંચ, પલસાણામાં 3.5 ઈંચ વરસાદ થયો છે. તો સુબીરમાં 3.5 ઈંચ, કામરેજમાં 3 ઈંચ, વાલોદમાં 3 ઈંચ, તીલકવાડામાં 3 ઈંચ, વડોદરામાં 3 ઈંચ, નવસારીમાં 2.5 ઈંચ વરસાદ થયો છે. તેમજ છોટાઉદેપુરમાં 2.5 ઈંચ, ડાંગમાં 2.5 ઈંચ, ગણદેવીમાં 2.5 ઈંચ, બારડોલીમાં 2.5 ઈંચ, પારડીમાં સવા 2 ઈંચ, જેતપુર પાવીમાં 2 ઈંચ, ઉચ્છલમાં 2 ઈંચ, ડોલવણમાં પોણા 2 ઈંચ વરસાદ થયો છે.

દ.ગુજરાતના કેટલાક ગામોને કરાયા અલર્ટ

નવસારીમાં સતત ધોધમાર વરસાદ વરસી રહ્યો છે. જિલ્લામાં સૌથી વધુ ખેરગામ તાલુકામાં વરસાદ વરસ્યો છે. ખેરગામ તાલુકાની ઔરંગા નદી ગાંડીતૂર થઈ છે. ગરગડીયાનો પુલ પાણીમાં ગરકાવ થતા અનેક ગામો સંપર્ક વિહોણા થયા છે. તો સાપુતારામાં વહેલી સવારથી વરસાદ પડી રહ્યો છે. ત્યારે વરસાદ પડતા પ્રવાસીઓમાં આનંદ જોવા મળ્યો છે. હાલ સાપુતારામાં ધીમીધારે વરસાદ ચાલું છે. નવસારીમાં છેલ્લા 24 કલાકથી ધોધમાર વરસાદ વરસી રહ્યો છે. ભારે વરસાદના કારણે તંત્રએ ગણદેવી તાલુકાના 8 ગામોને અલર્ટ કર્યા છે. અંબિકા નદીના કાંઠે ગામોને એલર્ટ કરવામાં આવ્યા છે. તંત્રએ નદી કાંઠે ન જવા માટે સ્થાનિકોને અપીલ કરી છે.

વલસાડમાં ધોધમાર વરસાદ

વલસાડ જિલ્લામાં સતત ધોધમાર વરસાદ વરસી રહ્યો છે. ભારે વરસાદના કારણે જિલ્લાના મોટભાગના નદી નાળાઓ છલકાયા છે. ભારે વરસાદના કારણે નદીઓમાં નવા નીર આવ્યા છે. કોલક અને દમણગંગા નદીમાં નીરની આવક થઈ છે. જ્યારે મધુબન ડેમમાં 12 હજાર ક્યુસેક પાણીની આવક થઈ છે. તો વલસાડમાં સતત ધોધમાર વરસાદ વરસી રહ્યો છે.. ધરમપુર અને કપરાડામાં ભારે વરસાદના કારણે અનેક વિસ્તારોમાં પાણી ભરાયા છે. ભારે વરસાદના કારણે નદી પરનું કોઝ-વે પર પાણી ફરી વળ્યુ છે. પાણી ભરાતા વાહન ચાલકો મુશ્કેલીમાં મુકાયા છે. તો વલસાડ જિલ્લામાં ભારે વરસાદના કારણે જનજીવન પ્રભાવિત થયું છે. પહેલા વરસાદમાં જ નગરપાલિકાની પ્રિ-મોન્સૂન કામગીરીની પોલી ખૂલી ગઇ છે. વલસાડના ધરમપુરના મુખ્ય માર્ગ પર પાણી ભરાઇ ગયા. જેના કારણે રાહદારીઓ અને વાહનચાલકો મુશ્કેલીમાં મુકાયા છે.

રાજકોટમા ધીમી ધારે વરસાદ

રાજકોટમાં ભારે પવન સાથે ધીમી ધારે વરસાદ શરૂ થયો છે. યાજ્ઞીક રોડ, કાલાવડ રોડ, નાના મૌવા વિસ્તારમાં વરસાદ થયો છે. મવડી વિસ્તારમા ભારે પવન સાથે વરસાદ થયો છે. આમ શહેરના અનેક વિસ્તારોમાં વરસાદ થયો છે. વરસાદ શરૂ થતા વાતાવરણમા ઠંડક પ્રસરી છે.

છોટા ઉદેયપુરની મેરિયા નદીમાં નવા નીર આવ્યા છે. ઉપરવાસના વરસાદના કારણે મેરિયા નદીમાં પુર આવ્યુ છે. મેરીયા નદીમાં પુર આવતા રસ્તા પર પાણી ફરી વળ્યું છે. કોઝ-વે પરથી સ્થાનિકોએ જીવના જોખમે રસ્તો પસાર કરે છે.