કેવી તૈયારી? / કોરોના કેસમાં ઉછાળા મામલે હર્ષ સંઘવીનું પ્રથમ નિવેદન, 'નંબર વધ્યા પણ...'

• કોરોનાના કેસ અંગે ગૃહ રાજ્યમંત્રી હર્ષ સંઘવીનું નિવેદન
• સરકારની તમામ શહેરો પર નજર-સંઘવી
• કેસ વધ્યા,હોસ્પિટલાઇઝેશન ઓછું-સંઘવી

ગુજરાતમાં કોરોના કેસનો રાફડો ફાટ્યો છે આજે 3350 નવા કેસ સામે આવતા સરકાર, તંત્ર, અને લોકોના શ્વાસ અધ્ધર થઈ ગયા છે. ગુજરાત સરકારનું આરોગ્ય વિભાગ તમામ તૈયારીઓમાં જોતરાઈ ગયું છે. ત્યારે કોરોનાના વધતા કેસ અંગે ગૃહ રાજ્યમંત્રી હર્ષ સંઘવીએ નિવેદન આપતા કહ્યું છે કે કોરોનાના વધતા આંકડાઓથી સરકાર તમામ રીતે વાકેફ છે. 

નંબર વધ્યા પણ હોસ્પિટલાઇઝેશન નહીવત
હર્ષ સંઘવીએ વધુમાં કહ્યું હતું કે તમામ શહેરો પર ચાંપતી નજર રાખવામાં આવી રહી છે. નંબર વધી રહ્યા છે પરંતુ હોસ્પિટલાઇઝેશન ઓછું છે પણ છતાંય તૈયારીના ભાગરૂપે સરકારે તમામ વ્યવસ્થા ઉભી કરી રાખી છે. મહત્વનું છે કે ગૃહ રાજ્ય અને રમત-ગમત મંત્રી હર્ષ સંઘવી આજે ટ્રાન્સસ્ટેડિયામાં ગુજરાતના ખેલાડીઓ સાથે સંવાદ કરી રહ્યા હતા જે બાદ મીડિયાને કરેલા સંબોધનમાં તેમણે કોરોના અંગે પણ નિવેદન આપી સરકાર બધી જ રીતે તૈયાર હોવાની વાત કહી હતી 

બુધવારના કોરોના કેસોના આંકડા ચિંતા જનક
ગુજરાતમાં કોરોના સંક્રમણ દિવસેને દિવસે વધી રહ્યું છે. છેલ્લા 24 કલાકમાં 3350 કેસ સામે આવતા ત્રીજી લહેરના સુનામી મોજા શરૂ થઈ ચૂક્યા છે આજે સૌથી વધુ અમદાવાદમાં 1660 કેસ સામે આવ્યા છે જ્યારે સુરતમાં 690 કેસ તો વડોદરામાં 181, કેસ અને રાજકોટમાં 159 કેસ સામે આવ્યા છે. રાજ્યમાં આજે કોરોનાથી 1 દર્દીનુ મૃત્યુ નીપજ્યું છે જ્યારે વેન્ટિલેટર પર 32 દર્દીઓ સારવાર લઈ રહ્યા છે તો 236 દર્દીઓ સાજા થઈ ઘરે પરત ફરતા હવે રાજ્યમાં 10,994 કોરોના એક્ટિવ કેસ થઈ ગયા છે. આજે કુલ 5.26 લાખ લોકોમાંથી 2.80 લાખ બાળકોને વેક્સિન અપાઈ છે. કુલ 9.18 કરોડ વેક્સિન ડોઝ અત્યાર સુધી આપી દેવામાં આવ્યા છે.

અત્યાર સુધીમાં ઓમિક્રોનની બેવડી સદી
ગુજરાતમાં કોરોનાની વકરતી સ્થિતિમાં અત્યાર સુધીના સૌથી વધુ  ઓમિક્રોન વેરિયન્ટના કેસ નોંધાય છે. એક દિવસમાં 50 કેસ ઓમિક્રોન પોઝિટિવ આવતા લોકો સહિત તંત્રના શ્વાસ અધ્ધર થઈ ગયા છે. ઓમિક્રોનને માત આપીને આજે 16 દર્દી ડિસ્ચાર્જ થતાં સાજા થવાનો આંકડો 112 પર પહોંચ્યો છે. અત્યાર સુધી રાજ્યમાં ઓમિક્રોનના કુલ 204 કેસ સામે આવતા હવેના આવનાર દિવસોમાં ભયંકર સ્થિતિ સામનો કરવો પડશે તેવુ દેખાઈ રહ્યું છે.  કોરોના કેસ બાદ ઓમિક્રોન કેસમાં અમદાવાદ નંબર 1ની સ્થતિએ હોટસ્પોટ સાબિત થયું છે. અમદાવાદમાં ઓમિક્રોનના 34 કેસ, આણંદમાં 3 કેસ,ખેડામાં 4 કેસ, વડોદરામાં ઓમિક્રોનના 5 કેસ, સુરતમાં 3 કેસ, કચ્છમાં આજે વધુ એક કેસ ઓમિક્રોનનો નોંધાયો છે.