નવી સરકારમાં ગૃહ રાજ્યમંત્રીનું પદ સંભાળતાની સાથે જ હર્ષ સંઘવીએ રાજ્યમાં કેફી અને નશાકારક દ્રવ્યોના વેપારને નાથવા અંગે વાત કરી હતી. ત્યારે રાજકોટની મહિલાની ડ્રગ પેડલર અંગે ફરિયાદ મામલે પીડિતની માતા, પોલીસ કમિશર અને ગૃહ રાજ્યમંત્રી હર્ષ સંઘવીએ નિવેદન આપ્યું હતું.
રાજકોટ શહેરમાં ડ્રગ્સ માફિયાઓ બેફામ
ડ્રગ્સ માફિયાને લઈને ક્રિકેટર અને તેની માતા પરેશાન
મહિલાએ જે પેડલર સામે આક્ષેપ કર્યા હતા તેને પોલીસે ઝડપી પાડ્યોઃ હર્ષ સંઘવી
રાજકોટ શહેરમાં ડ્રગ્સ માફિયાઓ બેફામ બન્યા છે. ત્યારે ડ્રગ્સ માફિયાને લઈને ક્રિકેટર અને તેની માતા પરેશાન છે. ક્રિકેટર યુવક ડ્રગ્સના રવાડે ચડ્યો છે, જે અંગે માતાએ પોલીસને અરજી કરી હતી. અગાઉ રાજકોટ પોલીસે કોઇ કાર્યવાહી ન કરી હતી. જોકે બાદમાં રાજકોટ પોલીસે તપાસ શરૂ કરી દીધી હતી. રાજકોટ પોલીસે યુવકની માતાનો સંપર્ક કર્યો હતો. યુવકની માતાને પોલીસ સ્ટેશન લઇ જવાયા હતા. ત્યારે હવે પીડિતની માતાએ ડ્રગ્સ પેડલરને લઇને મોટા દાવા કર્યા છે.
રાજકોટના ડ્રગ્સ મામલે પીડિત માતાની માતાએ નિવેદન આપ્યું હતું કે, ડ્રગ્સ પેડલરોને કારણે યુવાનો ડ્રગ્સના રવાડે ચડે છે. મારો 23 વર્ષનો પુત્ર ડ્રગ્સના રવાડે ચડ્યો છે. અન્ય આરોપીઓની ધરપકડ થાય તેવી માગ છે. સુદ્ધા ધામેલીયા નામની આરોપીની SOG પોલીસે ધરપકડ કરી હતી. જૂન મહિનામાં અરજી પર ડ્રગ્સ પેડલર મહિલાની ધરપકડ કરી હતી. મારો પુત્ર આજે 2:30 વાગ્યે ઘરે ચિઠ્ઠી મૂકી જતો રહ્યો હતો. મારો પુત્ર સલામત સ્થળે હોવાની પોલીસે માહિતી આપી છે. રાજકોટના રૈયાધારમાં મારો પુત્ર ડ્રગ્સ લેવા જતો. અનેક વિસ્તારોમાં ડ્રગ્સ વેચાતું હોવાનો મોટો દાવો કર્યો છે.
તમામ પેડલરને તાત્કાલિક અરેસ્ટ કરવા આદેશ આપ્યો છેઃ હર્ષ સંઘવી
આ અંગે હર્ષ સંઘવીએ જણાવ્યું હતું કે, મહિલાએ ફરિયાદ કરી હતી. મહિલાનો આક્ષેપ હતો કે પોલીસ સાંભળતી નથી. મહિલાએ જે પેડલર સામે આક્ષેપ કર્યા હતા તેને પોલીસે ઝડપી પાડી છે. ફરિયાદ બાદ પોલીસે કડક એક્શન લીધા હતા. તમામ પેડલરને તાત્કાલિક અરેસ્ટ કરવા આદેશ આપવામાં આવ્યા છે. ગુજરાત સરકાર ડ્રગ્સ બાબતે કોઈ બાંધછોડ નહીં કરે. રાજ્યમાં દુષણને ડામવા માટે પોલીસ સક્ષમ છે. ડ્રગ્સના વેચાણ અંગે લોકોને માહિતી આપવા અપીલ કરી છે.
ડ્રગ્સ પેડલર મહિલાની ધરપકડ થઇ ચૂકી છે, હાલ તે જેલમાં છેઃ મનોજ અગ્રવાલ
રાજકોટ પોલીસ કમિશનર મનોજ અગ્રવાલે નિવેદન આપ્યું હતું કે, અગાઉ આ મહિલાની અરજી મળી હતી. મહિલાએ આરોપ કર્યો કે પુત્ર-પુત્રવધુ MD ડ્રગ્સના રવાડે ચડ્યા હતા. અરજી મળતા SOG પોલીસે ગુનો નોંધી તપાસ કરી ડ્રગ્સ પેડલર મહિલાની ધરપકડ કરી છે. હાલ આ ડ્રગ્સ પેડલર મહિલા જેલમાં છે જેનો કોર્ટમાં કેસ ચાલી રહ્યો છે. ત્રણ વર્ષમાં રાજકોટ પોલીસે નાર્કોટિક હેઠળના 50 કેસ નોંધેલા છે. રાજકોટમાં ડ્રગ્સ સહિતના નશીલા પદાર્થનું વેંચાણ ન થાય તેને લઈને પોલીસ સતર્ક છે. ક્રિકેટર યુવક ગુમ છે તેને શોધવા ટીમો કામ કરી રહી છે.
કેફી દ્રવ્યો અંગે માહિતી આપનારને મળશે ઇનામઃ હર્ષ સંઘવી
થોડા દિવસ અગાઉ ગૃહ રાજ્યમંત્રી સંઘવીએ જણાવ્યું હતું કે, નશાબંધીને લગતા ગુન્હાઓને નેસ્તનાબુદ કરવા એ રાજ્ય સરકારની પ્રાથમિક અગ્રિમતા છે. રાજ્યનું યુવાધન માદક દ્રવ્યોના નશાની ચૂંગાલમાં ન ફસાય તે માટે આવી પ્રવૃતિઓને અટકાવવા માટે પોલીસ તરફથી થતા પ્રયત્નોમાં જોડાયેલા કર્મચારી/અધિકારીઓ તેમજ આ કેફી દ્રવ્યો અંગેની માહિતી આપનાર બાતમીદારના જોખમને ધ્યાને લેતાં તેઓને ઇનામ તરીકે આકર્ષક રકમ આપવામાં આવે તો તેઓનો ઉત્સાહ જળવાઈ રહે અને ખંતથી કામ કરે તેમજ આ પ્રવૃતિ નેસ્તનાબુદ કરવાની સરકારની યોજના સફળ થઈ શકે. તે આશયથી રાજ્યમાં સૌ પ્રથમવાર નાર્કો રીવોર્ડ પોલિસીનો અમલ કરવાનો રાજ્ય સરકારે મહત્વનો નિર્ણય કર્યો છે.
મંત્રી હર્ષ સંઘવીએ કહ્યું હતું કે, બાતમીદારો તેમજ રાજય પોલીસના કર્મચારીઓ/અધિકારીઓ માટે ખાસ ઇનામી યોજના બનાવવાની બાબત રાજ્ય સરકારની વિચારણા હેઠળ હતી. ભારત સરકારના નાણા મંત્રાલયના તા:- 10/10/2017 તેમજ ગૃહ મંત્રાલયના તા:- 25/06/2020 ના પત્રને ધ્યાને રાખીને કેફી દ્રવ્યોના ગુન્હાઓમાં બાતમીદાર તથા રાજય સેવકોને પ્રોત્સાહીત કરવા સારૂ ગુજરાત રાજયમાં રીવોર્ડ પોલિસી તૈયાર કરવામાં આવી છે.
હર્ષ સંઘવીએ નવી રીવોર્ડ પોલિસીની વિગતો આપતા કહ્યું હતું કે, આ રીવોર્ડ સંપૂર્ણપણે Ex-Gratia/ઇનામ તરીકે ચુકવાશે અને સક્ષમ સત્તાતંત્ર આવા રીવોર્ડને મંજુર કરી શકશે. બાતમીદારે આપેલ બાતમીના આધારે કરવામાં આવેલ જપ્તીના સંદર્ભમાં માહિતીની વિશિષ્ટતા અને ચોક્ક્સાઇ, લેવામાં આવેલ જોખમ, તકલીફો, બાતમીદારે કરેલ મદદ અને તેનું પ્રમાણ, માહિતી/બાતમી, એન.ડી.પી.એસ. એક્ટ હેઠળના પદાર્થોની હેરાફેરીમાં સંકળાયેલ વ્યક્તિઓ અને ટોળકીઓની કડી આપે છે કે કેમ? વિગેરે બાબતો પણ રીવોર્ડની રકમ નક્કી કરતી વખતે ધ્યાને લેવાની રહેશે.