ગ્રીષ્માની અંતિમયાત્રા સમયે વચન આપ્યું હતું -સંઘવી
ગ્રીષ્માના હત્યારા ફેનિલને ફાંસીની સજા ફટકારવામાં આવતા ગ્રીષ્માને યાદમાં પરિવારે રામધૂનનું આયોજન કર્યુ છે. ભાજપના નેતાઓ સહિત ગૃહ રાજ્યમંત્રીએ પરિવાર સાથે મુલાકાત કરી છે. ગૃહમંત્રી સાથે રેન્જ IG સહિતના ઉચ્ચપોલીસ અધિકારીઓ પણ હાજર રહ્યા હતા. પૂર્વ ધારાસભ્ય પ્રફુલ પાનસેરિયા સહિત મોટી સંખ્યામાં સ્વજનો અને આસપાસના લોકો પણ ધૂનમાં જોડાયા હતા.ગ્રીષ્માના પરિવારને ઘટનાના માત્ર 81 દિવસમાં ન્યાય આપી દેવામાં આવ્યો છે. ત્યારે હર્ષ સંઘવી ગ્રીષ્માના પરિવારને મળવા પહોંચ્યા છે.ગ્રીષ્માનો પરિવાર હર્ષ સંઘવીને જોતા જ ડૂસકે ને ડૂસકે રડી પડ્યો હતો. હર્ષ સંઘવી પણ થોડી ક્ષણો માટે ભાવુક થઈ ગયા હતા. ગ્રીષ્માની માતાએ બે હાથ જોડી હર્ષ સંઘવીનો આભાર માન્યો હતો. હર્ષ સંઘવીએ પરિવારને દિલાસો આપ્યો હતો.
કોઈ ટપોરી બહેન-દીકરી સામે આંખ ઊંચી કરશે તો પોલીસ છોડશે નહિ-સંઘવી
ગ્રીષ્મા સાથે જે કઈ બન્યું તેનું દૂખ છે પણ તે બાદ પરિવારને ન્યાય અપાવા અને હત્યારાને કડક સજા કરવા પોલીસે દિવસ રાત એક કર્યા છે. 5 દિવસમાં 2500 પાનાની ચાર્જસીટ દાખલ કરી હતી. વકીલોએ કઈ કાચું ન કાપતા તેમણે પણ આ કેસમાં ખૂબ જ મહેનત કરી ન્યાય અપાવવામાં મદદ કરી છે. હર્ષ સંઘવીએ કહ્યું ગુજરાતમાં નવો ઈતિહાસ રચાયો છે. હત્યા કેસમાં પરિવારને સૌથી ઝડપી ન્યાય મળ્યો છે. કોર્ટના આ ચુકાદાથી આવી માનસિકતા ધરાવતા આરોપીઓ ફફડશે, તેમનામાં ડર બેસસે. વધુમાં તેમણે કહ્યું હતું કે દેશના ઇતિહાસમાં એવો દાખલો બેસાડીશું કે કોઈ પણ દીકરી સામે કોઇ આંખ ઊંચી કરી જુવે નહીં.
પોલીસ તમારી મિત્ર છે પોલીસ સુધી પહોંચો -સંઘવી
આવા ગુનેગારો સામે લાલ આંખ કરી વધુ મજબૂતાઈથી પગલાં ભરાશે તેવી હામ ભરતા ગૃહરાજ્યમંત્રીએ કહ્યું હતું કે મેં વચન આપ્યું હતું ન્યાય અપાવ્યા પછી આવીશ. ગુજરાત પોલીસ હંમેશા તમારી સાથે છે. બહેનોને તકલીફ હોય પોલીસ પાસે આવો, પોલીસ તમારા નામ જાહેર નહીં કરે, સમસ્યા લઇને આવતી બહેનોની વિગતો ગુપ્ત રખાશે. કોઈ ટપોરી બહેન-દીકરી સામે આંખ ઊંચી કરશે તો પોલીસ છોડશે નહિ. જે મા-બાપને દીકરા હોય તો ચિંતા કરો અને દિકરો ખોટી દિશામાં જતો હોય ગુજરાત પોલીસને સોપો અમે તેને સીધો કરીશું.
મારા માથા ઉપર ખૂબ મોટો ભાર હતો-સંઘવી
હર્ષ સંઘવીએ કહ્યું કે ન્યાય આપ્યાનો સંતોષ છે ખુશી નથી દીકરી ગુમાવી છે. સમાજમાં કોણ શુ કહેશે તેનો ડર રાખ્યા વગર પોલીસ પાસે જાઓ. પોલીસ તમારી મિત્ર છે પોલીસ સુધી પહોંચો
ગ્રીષ્માની આત્માને શાંતિ મળી હશે. પરિવાર સહિત માતા પિતાને વંદન જેમણે અમારી ઉપર વિશ્વાસ રાખ્યો. મારા માથા ઉપર ખૂબ મોટો ભાર હતો જે આજે ઉતાર્યો.
ગુજરાતમાં આવા અનેક કેસો મારા રડાર માં છે. ડે ટુ ડે ફોલોઅપ લઈએ છીએ. જલદી ન્યાય મળે તેવું દાખલો ઉભો કરીશું. આવા કેસોની પાછળ પડી અમે રાત-દિવસ મહેનત કરી રહ્યા છીએ. આવા કિસ્સા ભવિષ્યમાં ન બને તેવું આયોજન પણ કરી રહ્યા છીએ. પોલીસ અને વકીલને આશીર્વાદ આપવા લોકોને અપીલ કરતાં કહ્યું હતું કોઈ પણ તકલીફ હોય તો પહેલા જ પોલીસ પાસે પહોંચી જાઓ.