બિહારમાં હાલમાં ચાની દુકાન ખોલવાનો નવો ટ્રેંડ ચાલું થયો છે. પટનામાં ગ્રેજ્યુએટ ચાવાળી બાદ હવે આત્મનિર્ભર ચાવાળી સામે આવી છે.
બિહારમાં ચાની કિટલી ખોલવાનો ટ્રેંડ લાગ્યો
બીસીએ કરેલી છોકરીએ ટી સ્ટોલ ખોલ્યો
એક જ દિવસમાં 1 હજારથી વધારેની કમાણી કરી
બિહારમાં હાલમાં ચાની દુકાન ખોલવાનો નવો ટ્રેંડ ચાલું થયો છે. પટનામાં ગ્રેજ્યુએટ ચાવાળી બાદ હવે આત્મનિર્ભર ચાવાળી સામે આવી છે. તેને લગ્ન કરવા ન પડે એટલા માટે ચાની દુકાન ખોલી છે. પણ આત્મનિર્ભર ચાવાળીની ટી સ્ટોલ પર ભારે ભીડ લાગી રહી છે. ખાસ વાત એ છે કે, બિહારમાં બંને છોકરીઓ પ્રધાનમંત્રી મોદીના આત્મનિર્ભર ભારથી પ્રેરિત છે. બંને ચાવાળીએ ઉચ્ચ શિક્ષણ મેળવેલું છે. સાથે કડકડાટ અંગ્રેજી પણ બોલી રહી છે. મળૂ તો સમસ્તીપુર જિલ્લાની નિવાસી આત્મનિર્ભર ચાવાળી મોના પટેલના પિતા કુંદન પટેલ એક પ્રાઈવેટ સ્કૂલમાં શિક્ષક છે.
સારી નોકરી ન મળતા પરિવાર લગ્ન કરાવવા માગતો
પટનાની જેડી વુમન્સ કોલેજમાંથી વર્ષ 2021માં બીસીએ કર્યા બાદ ફક્ત 15 હજારની નોકરી મળી તો, મોનાને તે ન ગમ્યું. બાદમાં ક્યાંય નોકરી ન મળતા પટના વુમન્સ કોલેજ પાસે ગ્રેજ્યુએટ ચાવાળીની સફળતાની કહાણી સાંભળીને મોનાએ પણ આવું જ કર્યું. પણ આત્મનિર્ભર ચાવાળીની કહાણી ગ્રેજ્યુએટ ચાવાળી પ્રિયંકા ગુપ્તાથી અલગ છે. ગરીબીના કારણે જ્યારે પરિવારના લોકોએ તેના લગ્ન કરવાનું નક્કી કર્યું તો, મોના પટેલે ચાનો સ્ટોલ ખોલી નાખ્યો. મોનાએ નોકરી છોકરી પરિવારને કહ્યા વગર પટનાના ગાંધી મેદાન પાસે ચા વેચવાનું શરૂ કરી દીધું. મોના પટેલે જણાવ્યું હતું કે, આર્થિક સ્થિતિ સારી ન હોવાથી પિતા લગ્ન કરાવી દેવાનું કહેતા હતા. પણ હું હાલમાં લગ્ન કરવા નથી માગતી.
એક જ દિવસમાં બપોર સુધીમાં 1 હજારની કમાણી કરી
મારી આર્થિક સ્થિતિ સારી નથી. તેના કારણે મારે કોઈને કોઈ કામ કરવાનું હતું. અને હવે હું પ્રાઈવેટ જોબ પણ કરવા નથી માગતી. ત્યારે આવા સમયે મેં યુટ્યૂબ પર પ્રિયંકા ગુપ્તાને જોઈ અને તેનામાંથી પ્રેરણા લીધી. ત્યાર બાદ મેં પણ ટી સ્ટોલ ખોલવાનો નિર્ણય લીધો. મોનાએ જણાવ્યું હતું કે, સ્ટોલ તો હું પહેલા પણ ખોલી લેતી, પણ મને પ્રિયંકામાંથી પ્રેરણા મળી છે. મોનાએ જણાવ્યું હતું કે, શનિવારે સવારે 6 વાગ્યાથી તેણે ચાનો સ્ટોલ ખોલ્યો, અને બપોરના એક વાગ્યા સુધીમાં 1 હજાર રૂપિયાની કમાણી કરી લીધી હતી. મોનાએ કહ્યુ કે, જો મારો આ સ્ટોલ સારી રીતે ચાલશે, તો આગળ તેને બ્રાંડ બનાવાની કોશિશ કરશે અને બ્રાંચ ખોલશે. તો વળી પટનાના ગાંધી મેદાન પાસે મોનાનો આત્મનિર્ભર ટી સ્ટોલ આકર્ષણનું કેન્દ્ર બન્યો છે.
તેની મસાલા ચા, કુલ્હડવાળી ચા, પાન ચા ગ્રાહકોને ખૂબ પસંદ આવે છે. પોતાની ચારથી પાંચ પ્રકારની ચા તે 10થી 20 રૂપિયા સુધીમાં વેચે છે અને દરરોજના હજારો રૂપિયાની કમાણી કરે છે.