ગોળીબારી / તાબડતોબ ફાયરિંગથી થરથર્યું મેક્સિકો: સિટી હૉલમાં ખેલાયો ખૂની ખેલ, અંધાધૂંધ ફાયરિંગ થતા મેયર સહિત 18 લોકોના મોત

• અમેરિકાના પડોશી દેશ મેક્સિકોમાં અંધાધૂંધ ફાયરિંગ
• સિટી હોલમાં બંદૂકધારીઓએ અંધાધૂંધ ગોળીબાર કર્યો
• મેયર સહિત 18 લોકોના મોત 

અમેરિકામાં બનતી ગોળીબારની ઘટનાઓની અસર હવે તેના પડોશી દેશોમાં પણ જોવા મળી રહી છે. ગુરુવારે અમેરિકાના પડોશી દેશ મેક્સિકોમાંથી ફાયરિંગની ઘટના સામે આવી છે. મેક્સિકો સિટી હોલમાં બંદૂકધારીઓએ અંધાધૂંધ ગોળીબાર કર્યો, જેમાં મેયર સહિત 18 લોકોના મોત થયા છે.

ઘટનાસ્થળ પર હાજર લોકોના જણાવ્યા અનુસાર, બપોરના સમયે અચાનક બંદૂકધારીઓ ગુરેરો રાજ્યના સેન મિગુએલ તોતોલાપનના સિટી હોલમાં પહોંચ્યા અને લોકો પર ગોળીબાર શરૂ કર્યો હતો. ફાયરિંગની ઘટનામાં માર્યા ગયેલા લોકોમાં મેયર કૉનરાડો મેન્ડોઝા, તેમના પિતા અને પૂર્વ મેયર જુઆન મેન્ડોઝાની સાથે 7 પોલીસકર્મીઓનો સમાવેશ થાય છે.

આરોપીઓને પકડવા પોલીસે કરી નાકાબંધી
ફાયરિંગની ઘટના બાદ પોલીસે આરોપીઓને પકડવા માટે આખા શહેરમાં નાકાબંધી કરી દીધી છે. જોકે, હજુ સુધી તેઓ પોલીસની પકડમાં આવ્યા નથી. ફાયરિંગની ઘટનાની કેટલીક તસવીરો પણ સામે આવી છે, જેમાં સિટી હોલની દિવાલો પર ગોળીઓના નિશાન દેખાઈ રહ્યા છે. હોલની બારીના કાચ પણ તૂટેલા છે.

મેક્સિકોમાં ફાયરિંગની ઘટના
ઉલ્લેખનીય છે કે, અમેરિકામાં માસ ફાયરિંગની ઘટનાઓ બનતી રહે છે. હવે મેક્સિકોમાં પણ આવી ઘટનાઓ બનવા લાગી છે. જો કે, મેક્સિકોમાં બનતી ઘટનાઓ મોટાભાગે ડ્રગ્સ તસ્કરોની વચ્ચે ફાયરિંગ અથવા ગેંગ વોર સાથે સંબંધિત હોય છે. આપને જણાવી દઈએ કે, અમેરિકાના ઈન્ડિયાનામાં 18 જુલાઈના રોજ ગ્રીનવુડ પાર્ક મોલમાં ફાયરિંગની ઘટના બની હતી. માસ શૂટિંગમાં 3 લોકોના મોત થયા હતા. આ ઉપરાંત 11 જુલાઈના રોજ કેલિફોર્નિયાના દક્ષિણ ભાગમાં એક હાઉસ પાર્ટી દરમિયાન હુમલાખોરે અંધાધૂંધ ગોળીબાર કર્યો હતો. આ ઘટનામાં એક મહિલા સહિત 5 લોકોને ગોળી વાગી હતી, જેમાંથી 3 લોકોએ જીવ ગુમાવ્યો હતો.