અમદાવાદીઓ કોઇ પણ તહેવારોની ઉજવણી ધામધૂમથી કરતા હોય છે અને જ્યારે તહેવારોની વચ્ચે પડતર દિવસ આવે ત્યારે સોનામાં સુગંધ ભળે તેવું થઇ જાય છે. પડતર દિવસને પણ તહેવારમાં બદલી નાખે તેવા અમદાવાદીઓ આજે અને કાલે એમ સળંગ બે દિવસ ધુળેટી ધામધૂમથી ઊજવશે. હોળીના બીજા દિવસે ધુળેટી હોય તેવું માનનારો વર્ગ આજે રંગોત્સવ મનાવાશે જ્યારે ખરેખર ધુળેટી આવતી કાલે હોવાથી મોટાભાગના લોકો ધુળેટીનો તહેવાર કાલે પણ મનાવશે.
હોળી અને ધુળેટી વચ્ચે પડતર દિવસ હોવાથી અમદાવાદીઓ મોજમાં આવી ગયા છે. આવતી કાલે ધુળેટીનું પર્વ હોવાથી શેરીથી લઇને ક્લબો સુધીમાં રંગોત્સવનું આયોજન પુરજોશમાં કરી દેવામાં આવ્યું છે. ક્લબોમાં રેઇન ડાન્સનું સ્પેશિયલ આયોજન કરવામાં આવ્યું છે ત્યારે ઠેરઠેર ડી.જે પણ રાખવામાં આવ્યું છે. રિવરફ્રન્ટ, તેમજ ફરવા લાયક સ્થળો પર લોકો ધુળેટી ઊજવશે જ્યારે શેરી, સોસાયટી, ફ્લેટોમાં પણ ધુળેટી ઊજવવાનું સ્પેશિયલ આયોજન કરવામાં આવ્યું છે. ઠંડાઇ, નાસ્તા તેમજ વિવિધ પ્રકારની વાનગીઓના ઓર્ડર લોકોએ આપી દીધા છે.
આવતી કાલે શહેરમાં આવેલાં કૃષ્ણનાં તમામ મંદિરોમાં ધજા ચઢાવવામાં આવશે.
ધુળેટીના દિવસે જાહેરમાં કોઇ ચેનચાળા કરે નહીં તે માટે પોલીસ પણ એલર્ટ મોડ પર આવી ગઇ છે. આવતી કાલે સરકારી કચેરીઓ, સ્કૂલ તેમજ કોલેજોમાં જાહેર રજા હોવાથી લોકો જોરશોરથી ધુળેટીનો પર્વ મનાવશે. કેટલાક લોકો ધુળેટીનું પર્વ મનાવવા માટે રાજસ્થાનની રિસોર્ટ, દમણ, દિવ સહિતની જગ્યા પર પરિવાર સાથે પહોંચી ગયા છે. ગઇ કાલે હોળિકાદહન સમયે શહેરમાં ગાજવીજ સાથે વરસાદ વરસ્યો હતો ત્યારે હવે બે દિવસ પણ અમદાવાદમાં કુદરત રેઇન ડાન્સ કરાવે તેવી શક્યતા છે. ધૂળેટીના પર્વમાં જો કોઈ રાહદારી પર કલર કે પાણી ભરેલા ફુગ્ગા ફેંકશે તો પોલીસ તેમની ધરપકડ કરી લોકઅપમાં પૂરી દેશે.