દુનિયાની દિગ્ગજ સોશિયલ મીડિયા કંપની ફેસબુક હવે ક્રિપ્ટોકરન્સી આધારિત પેમેન્ટ સિસ્ટમ બનાવવાની યોજના તૈયાર કરી રહી છે અને ફેસબુક હવે પોતાની જ બિટકોઇન કરન્સી લાવવા વિચારણા કરી રહી છે.
દુનિયાની દિગ્ગજ સોશિયલ મીડિયા કંપની ફેસબુક હવે ક્રિપ્ટોકરન્સી આધારિત પેમેન્ટ સિસ્ટમ બનાવવાની યોજના તૈયાર કરી રહી છે અને ફેસબુક હવે પોતાની જ બિટકોઇન કરન્સી લાવવા વિચારણા કરી રહી છે. ફેસબુક દુનિયાભરના કરોડો યુઝર્સ માટે પોતાની ડિજિટલ કરન્સી શરૂ કરવા જઇ રહી છે. વોલસ્ટ્રીટ જર્નલે એક રિપોર્ટમાં તેની જાણકારી આપી છે.
આ સિસ્ટમ દ્વારા બિટકોઇનની જેમ જ ડિજિટલ કોઇનનો ઉપયોગ કરી શકાશે, જોકે તેનાથી અલગ ફેસબુકનું લક્ષ્ય એવું રહેશે કે કોઇનની વેલ્યૂ સ્થિર રાખવામાં આવે. અત્રે ઉલ્લેખનીય છે કે બિટકોઇન અને તેના જેવી ક્રિપ્ટોકરન્સીની વેલ્યૂમાં સતત ઉતાર-ચઢાવ આવતા રહે છે. આ સિસ્ટમ આવવાથી ક્રેડિટકાર્ડનું ચલણ ધીમે-ધીમે ઓછું થઇ શકે છે, સાથે જ તેનાથી રેવન્યૂમાં પણ વધારો થઇ શકે છે. વોલસ્ટ્રીટ જર્નલે પોતાના રિપોર્ટમાં આ મામલા સાથે સંકળાયેલા કેટલાક લોકોને ટાંકીને આ અહેવાલ રજૂ કર્યો છે.
અહેવાલમાં જણાવાયું છે કે ફેસબુક પોતાની ક્રિપ્ટોકરન્સી લાવવા માટે દુનિયાભરની ફાઇનાન્શિયલ ફર્મ અને ઓનલાઇન મર્ચન્ટ્સની ભરતી કરી રહ્યું છે. ફેસબુકની યોજના એવા યુઝર્સને રિવોર્ડ આપવાની છે, જેઓ વિજ્ઞાપન અને અન્ય ફીચર્સ દ્વારા ફેસબુક સાથે જોડાયેલા છે. ફેસબુકનું કહેવું છે કે ક્રિપ્ટોકરન્સી ટેક્નોલોજી માટે તે કેટલીય સારી એપ્લિકેશન્સની શોધખોળ કરી રહી છે. ક્રિપ્ટોકરન્સી કમ્પ્યૂટર અલ્ગોરિધમ પર આધારિત હોય છે. તે એક સ્વતંત્ર કરન્સી હોય છે, જેનું કોઇ માલિક હોતું નથી.