એલર્ટ / આ તારીખથી ગુજરાતમાં ચોમાસાનું આગમન, ગરમીને લઇને પણ હવામાન વિભાગે કરી આગાહી

• અમદાવાદને હવામાન વિભાગે ઓરેંજ એલર્ટ કર્યુ જાહેર
• આવતીકાલથી અમદાવાદમાં ગરમીનો પારો 45 ડીગ્રીએ રહેશે
• ગુજરાતમાં 21 જૂને ચોમાસાનું આગમન, હવામાન વિભાગની આગાહી

રાજ્યમાં કોરોનાના કહેર વચ્ચે જાહેર કરાયેલા લોકડાઉનમાં ઘરમાં રહેલા લોકો માટે માંઠા સમાચાર આવી રહ્યાં છે. અમદાવાદ શહેરમાં ગરમીને લઇને હવામાન વિભાગે ઓરેન્જ એલર્ટ જાહેર કર્યું છે. શહેરમાં ગરમીનો પારો 45 ડિગ્રીએ પહોંચશે તેવી આગાહી કરી છે. 

હવામાન વિભાગની આગાહી મુજબ રાજ્યના મોટા ભાગના શહેરોમાં ગરમીનો પારો 41 ડિગ્રીને પાર જોવા મળશે. આમ રાજ્યના અનેક શહેરોમાં લોકોને ગરમીનો સામનો કરવો પડશે. 

જ્યારે બીજી તરફ રાજ્યમાં 17 અને 18મેથી દક્ષિણ ગુજરાત અને સૌરાષ્ટ્રમાં માવઠાની આગાહી કરવામાં આવી છે. જેમાં તાપી, વલસાડ, નર્મદામાં કમોસમી વરસાદની શક્યતાઓ દર્શાવી છે. આ સાથે સૌરાષ્ટ્રના સુરેન્દ્રનગર, અમરેલી, જામનગર અને ભાવનગરમાં કમોસી વરસાદની સંભાવના છે. 
 

ગુજરાતમાં 21 જૂને ચોમાસાનું આગમન થશે
કાગડોળે રાહ જોઈ રહેલા ખેડૂત માટે સારા સમાચાર હવામાન વિભાગે આપ્યા છે. આગામી 21 જૂને વરસાદનું આગમન ગુજરાત માં થશે ત્યારે 5 જૂને કેરળ માં ચોમાસા નું આગામન થશે. મહત્વનું છે કે આ વર્ષે ચોમાસુ સારું રહે તેવું હવામાને પૂર્વાનુમાન કર્યું છે.

મે મહિનાના અંતમાં ભારતના દક્ષિણ - પશ્ચિમ છેડાથી ચોમાસાની શરૂઆત થશે જે જૂનથી સપ્ટેમ્બર વચ્ચે ભારતનાં 70% વિસ્તારમાં પહોંચશે. હવામાન વિભાગની આગાહી મુજબ આ વર્ષે સરેરાશ 96% વરસાદ રહેવાની સંભાવના છે.