OMG / અંધવિશ્વાસની પરાકાષ્ઠા: ભારે વરસાદ વચ્ચે ખાસ પૂજનવિધિથી ગંગાકિનારે થઇ રહી છે 'કોરોના માઈ'ની પૂજા

• ગંગા સ્નાન બાદ કોરોનાની પૂજા 
• બક્સરમાં ભારે વરસાદ વચ્ચે મહિલાઓએ કરી કોરોનાની પૂજા 
• મહિલાઓએ માનવું છે કે વિશેષ પૂજાથી દૂર થશે કોરોના 

કોરોનાની પૂજા કરવા મહિલાઓના ધાડેધાડા 

બિહારના બક્સરમાં કોરોના વાયરસ બીમારીને લઈને વિચિત્ર ઘટના સામે આવી છે. કોરોના વાયરસ બીમારીની પૂજા કરવા માટે મહિલાઓના ધાડેધાડા ઉતરી આવ્યા. કોરોના બીમારીને આ મહિલાઓએ કોરોના માતા તરીકે બતાવી. જાણકારી અનુસાર ગંગા સ્નાન બાદ મહિલાઓએ 9 લાડુ, 9 ફૂલ, 9 લવિંગ અને 9 અગરબત્તીથી પૂજા કરી જે જોઇને ત્યાના ઘણા બધા લોકો આશ્ચર્યચકિત થઇ ગયા.  

ભારે વરસાદમાં ગંગા કિનારે 'કોરોના માઈ'ની પૂજા 

બિહારનાં બક્સરમાં ભારે વરસાદ છતાં અચાનક જ મહિલાઓનું ટોળું ગંગા કિનારે સ્નાન કરવા આવી અને તે બાદ પૂજા પાઠમાં લાગી ગઈ. લાડવા અને ફૂલ સાથે પૂજા બાદ જ્યારે લોકોને આ પૂજાનું કારણ સમજાયું તો આશ્ચર્યચકિત થઇ ગયા. એક તરફ ચક્રવાતનાં કારણે બિહારમાં જોરદાર વરસાદ વરસી રહ્યો છે ત્યાં આ મહિલાઓ કોરોના બીમારી દૂર કરવા માટે કોરોના માતાની પૂજામાં લાગેલી છે. ભારે વરસાદમાં ગંગા કિનારે 'કોરોના માઈ'ની પૂજા થઇ રહી છે. 

ક્યાંથી ફેલાય છે આવી માહિતી 

એક તરફ દેશમાં કોરોના વાયરસથી દેશને નુકસાન થઇ રહ્યું છે ત્યારે દેશમાંથી અંધવિશ્વાસ નામક વાયરસ આ દેશથી ક્યારે દૂર થશે તે એક સવાલ છે. ગામડાઓની આ મહિલાઓને આવી માહિતીઓ ક્યાંથી આપવામાં આવે છે ? પૂજા કરવા આવેલ કુસુમ દેવીએ કહ્યું કે એક વીડિયોના માધ્યમથી તેમને જાણકારી મળી કે કોરોના વાયરસથી રાહત મેળવવી છે તો લાડુ, ફૂલ અને તલથી તેમની પૂજા કરવી જોઈએ જે બાદ કોરોનાનો પ્રકોપ ઓછો થઇ જશે. 

બક્સરમાં ફેલાઈ રહી છે અંધભક્તિ 

આ વિસ્તારમાં અંધવિશ્વાસ એટલી હદે છે કે કોરોના માતાની પૂજા માટે દિવસ પણ નક્કી કરી દેવામાં આવ્યા છે, સોમવાર અને શુક્ર્વાર. એવામાં શુક્રવારે ભારે વરસાદ છતાં મહિલાઓ કોરોનાની પૂજા કરવા નીકળી હતી. મહિલાઓનું માનવું છે કે બધા ગમે તો કહે પરંતુ પતિ અને પુત્રની રક્ષા માટે આ પૂજા કરવી આવશ્યક છે. એક વીડિયોનાં કારણે શરુ થયેલ અંધભક્તિ આખા બક્સરમાં ફેલાઈ રહી છે.