અમેરિકાના નિષ્ણાંત ડૉ. એન્થોની ફાઉચીએ ફરી વાર ચેતવણી આપતા જણાવ્યું કે, 'કોરોના હજુ ગયો નથી. પરંતુ કોરોનાનો નવો વેરિઅન્ટ BA.2 ફરી વાર વિશ્વમાં તબાહી મચાવી શકે તેવી શક્યતા છે.'
અમેરિકાના નિષ્ણાંત ડૉ. એન્થોની ફાઉચીની ચેતવણી
કોરોનાના નવા વેરિઅન્ટ BA.2 ના કારણે અમેરિકામાં કેસો વધી શકે છે
ચીન અને હોંગકોંગમાં કોરોનાથી સ્થિતિ અત્યંત ખરાબ
અમેરિકાના ટોચના સંક્રમણ રોગનાં નિષ્ણાંત ડૉ. એન્થોની ફાઉચીએ ચેતવણી આપી છે કે, કોરોનાના નવા વેરિઅન્ટ BA.2 ના કારણે ટૂંક સમયમાં જ અમેરિકામાં કોરોનાનાં કેસોમાં વધારો કરી શકે છે. મળતી માહિતી અનુસાર, વ્હાઇટ હાઉસના મુખ્ય તબીબી સલાહકાર ફાઉચીએ જણાવ્યું કે, US માં સામે આવેલા નવા કેસોમાંથી લગભગ 30 ટકા વેરિઅન્ટ સાથે સંબંધિત હોવાની આશંકા છે. તેઓએ કહ્યું કે, BA.2 ઓમિક્રોનની તુલનામાં લગભગ 60 ટકા વધારે સંક્રમિત હોય છે, પરંતુ તે વધુ ગંભીર નથી લાગતું.
ફાઉચીએ રવિવારનાં રોજ જણાવ્યું કે, "તેમાં એક વધેલી સંક્રમણ ક્ષમતા છે." તેઓએ જણાવ્યું કે, "જો કે, જ્યારે તમે આનાં મામલાને જુઓ છો ત્યારે તે વધારે ગંભીર પ્રકૃતિના નથી લાગતા." તેઓએ કહ્યું કે, "વાયરસથી ગંભીર રીતે બીમાર થવાથી બચવા માટે રસી અને બૂસ્ટર ડોઝ એ શ્રેષ્ઠ સંસાધન છે. આ પેટર્નના કારણે ચીન અને યુરોપના કેટલાંક ભાગોમાં સંક્રમણના કેસોમાં સતત વધારો થઈ રહ્યો છે.
'કોવિડ-19 મહામારી હજુ ગઇ નથી'
ભારતીય-અમેરિકન સર્જન જનરલ વિવેક મૂર્તિએ રવિવારે કોરોના વાયરસ મહામારી સામે લડવા માટે ભંડોળની અછતને લઇને ચિંતા વ્યક્ત કરી હતી. તેઓએ એક ન્યુઝ ચેનલને આપેલાં ઈન્ટરવ્યુમાં કહ્યું કે, 'જ્યારે આપણે જોઈએ છીએ કે વિશ્વભરમાં શું થઈ રહ્યું છે અને છેલ્લાં બે વર્ષમાં જ્યારે વિશ્વના એક ભાગમાં કેસોમાં વધારો થયો છે. ત્યારે ઘણી વાર વિશ્વનાં અન્ય ભાગોમાં કેસોમાં વધારો થાય છે. આપણે સાવચેત રહેવું જોઈએ કારણ કે, COVID-19 મહામારી હજી સમાપ્ત થઇ નથી. ”
"યુએસ સેન્ટર્સ ફોર ડિસીઝ કંટ્રોલ એન્ડ પ્રિવેન્શન" અનુસાર, શનિવારે દેશમાં કોવિડ મહામારીનાં 31,200 નવા કેસ નોંધાયા હતાં અને કોરોના સંક્રમણનાં કારણે 958 લોકોએ જીવ ગુમાવ્યો હતો.
ચીન અને હોંગકોંગમાં કોરોનાથી સ્થિતિ અત્યંત ખરાબ
અત્રે તમને જણાવી દઇએ કે, ચીન અને હોંગકોંગમાં કોરોનાથી સ્થિતિ બગડ્યા બાદ વિશ્વનાં અનેક દેશોમાં કોરોનાનાં નવા કેસોએ ફરી એક વાર ભારે ખળભળાટ મચાવી દીધો છે. વર્લ્ડોમીટર અનુસાર, સમગ્ર વિશ્વમાં છેલ્લાં 24 કલાકમાં 11 લાખથી વધુ નવા કોરોનાનાં દર્દીઓ નોંધાયા તો કોરોનાના કારણે 2,917 લોકોના મોત થયા છે. બીજી તરફ ચીનના અનેક રાજ્યોમાં કરોડો લોકો લોકડાઉનમાં જીવી રહ્યાં છે.
છેલ્લાં 24 કલાકમાં દક્ષિણ કોરિયામાં 3.34 લાખ નવા કેસ સામે આવ્યાં
વિશ્વનાં દેશોમાં કોરોના સતત ઝડપથી ફેલાઈ રહ્યો છે જેમાં ચીન, હોંગકોંગ, જાપાન અને દક્ષિણ કોરિયાનો સમાવેશ થાય છે. જેમાં છેલ્લાં 24 કલાકમાં દક્ષિણ કોરિયામાં 3.34 લાખ નવા કેસ સામે આવ્યાં છે. છેલ્લાં 3 દિવસમાં 11 લાખથી વધુ કોરોનાના કેસો મળી આવ્યાં છે. ચીનમાં તો કોરોનાનાં કેસો વધતા અનેક જગ્યાએ નવા નિયંત્રણો પણ લાદવામાં આવ્યાં છે.