આવા ગંભીર આક્ષેપથી માત્ર મારી જ નહીં પરંતુ શિંદે અને ફડણવીસની છબીને બદનામ કરવામાં આવી રહી છે: બચ્ચુ કડુ
એકનાથ શિંદેની સરકાર પર સંકટના વાદળો ઘેરાયા
શિંદેના બે સમર્થકો રવિ રાણા અને બચ્ચુ કડુ વચ્ચે તણાવ
કડુએ શિંદેને સમર્થન આપવા માટે પૈસા લીધા હોવાનો આરોપ
મહારાષ્ટ્રમાં મુખ્યમંત્રી એકનાથ શિંદેની સરકાર પર સંકટના વાદળો ઘેરાયા છે. શિંદેના બે સમર્થકો રવિ રાણા અને બચ્ચુ કડુ વચ્ચે તણાવ ચાલુ છે. એવું કહેવામાં આવી રહ્યું છે કે, કડુ દ્વારા ચેતવણી આપવામાં આવી છે કે, તેઓ ટૂંક સમયમાં 'નિર્ણય' લઈ શકે છે. તેમજ એવા સમાચાર છે કે તે કોર્ટમાં જવાની તૈયારી કરી રહ્યા છે.
વાત જાણે એમ છે કે, બડનેરાના અપક્ષ ધારાસભ્ય રાણા દાવો કરી રહ્યા છે કે, પ્રહાર જનશક્તિ પાર્ટી (PJP)ના કડુએ શિંદેને સમર્થન આપવા માટે પૈસા લીધા છે. હવે કડુએ ચેતવણી આપી છે કે, જો સીએમ શિંદે અને ડેપ્યુટી સીએમ દેવેન્દ્ર ફડણવીસ રાણાના આરોપો પર જવાબ નહીં આપે અથવા સાબિત નહીં કરે તો તેઓ અન્ય 8 ધારાસભ્યો સાથે મળીને નિર્ણય લેશે.
આ સાથે કડુએ કહ્યું હતું કે, “તે અંગત હુમલાઓ કરીને દાવો કરી રહ્યો છે કે હું પૈસા લઈને ગુવાહાટી ગયો હતો. માત્ર હું જ ગુવાહાટી ગયો ન હતો, 50 વધુ ધારાસભ્યો હતા. શિંદે અને ફડણવીસે આ મુદ્દા પર ધ્યાન આપવું જોઈએ, કારણ કે જો તમને સમર્થન આપવા બદલ તમારા જ સમર્થક ધારાસભ્ય વતી આવા પ્રશ્નો ઉઠાવવામાં આવે છે તો તે દુર્ભાગ્યપૂર્ણ છે.
તો વળી કડુએ દાવો કર્યો છે કે, આના દ્વારા માત્ર તેમની જ નહીં પરંતુ શિંદે અને ફડણવીસની છબીને બદનામ કરવામાં આવી રહી છે. તેમણે કહ્યું, 'માત્ર મારી છબી કલંકિત નથી થઈ રહી, લોકો પૂછશે કે મને સીએમ અને ડેપ્યુટી સીએમએ કેટલા પૈસા આપ્યા. વિકાસના મુદ્દે શિંદે સાથે 50 ધારાસભ્યો જોડાયેલા હતા અને તે એવો સવાલ ઉઠાવી રહ્યા છે કે, અમે જોડાવા માટે પૈસા લીધા હતા. આ અંગે સ્પષ્ટતા કરવી જરૂરી છે. જો તેમ નહીં થાય તો 1 નવેમ્બર સુધીમાં અમે અલગ નિર્ણય લઈશું.