ગુજરાતમાં જેની સૌથી વધુ ખેતી થાય છે તે ખેતી ચીને ચંદ્ર પર કરી બતાવી

પૃથ્વી પર એવી કેટલીય જગ્યા છે કે જ્યાં પાક મેળવવો મુશ્કેલ છે. ત્યારે ચીને એક કમાલ કરી દીધી છે. ચીને ચંદ્ર પર કપાસ ઉગાડ્યું છે. ચંદ્ર પર કપાસનાં બીજ અંકુરિત કરવામાં ચીનને સફળતા મળી છે. ચીને ચાંદ પર મોકલેલા રોવર પર કપાસનાં બીજ અંકુરિત થયાં છે. આ પહેલી એવી ઘટના છે કે ચંદ્ર પર કોઈ છોડ ઉગ્યો હોય. ત્યારે હવે ચીનને ચંદ્ર પર બટાટા ઉગાડવાની આશા છે.

ચોંગકિંગ વિશ્વવિદ્યાલયનાં એડવાન્સ્ડ ટેક્નોલોજી રિસર્ચ ઈન્સ્ટિટ્યૂટે આ તસ્વીરો પણ જાહેર કરી છે. ચાંગ ઈ-4 આ મહિનાની ત્રીજી જાન્યુઆરીએ મોકલવામાં આવ્યું હતું. આ પ્રયોગની ડિઝાઈનની આગેવાની કરી રહેલા શાઈ ગેંગશિને કહ્યું કે આ પહેલી એવી ઘટના છે કે જ્યાં ચંદ્ર પર છોડ ઉગાડવાનો પ્રયોગ કરવામાં આવ્યો.



મહત્વની વાત એ છે કે આ યાનને ચંદ્રનાં એવા ભાગમાં મોકલવામાં આવ્યું કે જે ભાગને અત્યાર સુધી કોઈએ જોયો પણ નથી. જેથી આ યાન વિશ્વનું પહેલું અંતરિક્ષયાન બન્યું છે. ચોંગકિંગ યુનિવર્સિટીનાં વૈજ્ઞાનિકોએ વાયુ જળ અને માટીયુક્ત 18 સેન્ટીમીટરનો એક ડબ્બો મોકલ્યો હતો.

જેની અંદર કપાસ બટાટા અને સરસો પ્રજાતિનાં એક એક છોડનાં બીજ મોકલવામાં આવ્યાં હતાં. યુનિવર્સિટીનાં જણાવ્યાં મુજબ અંતરિક્ષયાનથી મોકલવામાં આવેલી તસ્વીરોમાં જોવાં મળે છે કે કપાસનાં બીજ વિકસીત થઈ રહ્યાં છે. પરંતુ અન્ય છોડનાં બીજ અંકુરિત થયાનાં સમાચાર સામે આવ્યાં નથી.