રાજકોટના લાતી પ્લોટ વિસ્તારમાં અજાણ્યા શખ્સે ધર્મેશ પટેલ નામના શખ્સ પર એસિડ અટેક કર્યો છે. એસિડથી હુમલો થતા ધર્મેશના મોઢા હાથ પગમાં ગંભીર ઈજા થઈ છે. આ ઘટના સર્જાતા ઈજાગ્રસ્ત યુવકને સારવાર માટે હોસ્પિટલ ખસેડાયો છે. ત્યારે હવે આ મામલે અજાણ્યા વ્યક્તિઓ સામે ફરિયાદ પણ નોંધવામાં આવી છે.
આ ઘટના અંગે મળતી માહિતી પ્રમાણે રાજકોટ શહેરના લાતી પ્લોટમાં રોયલ પોલીટેક નામનું ઇમિટેશનનું કારખાનું ધરાવતા ધર્મેશ લલિતભાઇ સંઘાણી જ્યારે ગઇ કાલે રાત્રે કારખાના નજીક પોતાની કારમાંથી બહાર નીકળી રહ્યાં હતાં ત્યારે બુકાનીધારી એક વ્યક્તિએ એસિડ ફેંક્યો હતો.
જો કે આ ઘટનામાં ધર્મેશ પટેલને ગંભીર ઇજાઓ પણ પહોંચી હતી. જેને લઇ બાદમાં તેનાં કારખાનામાં કામ કરતા લોકોએ તેને સારવાર અર્થે સિવિલ હોસ્પિટલ ખાતે ખસેડવામાં આવ્યો હતો જ્યાં તેને પ્રાથમિક સારવાર બાદ વધુ સારવાર માટે નજીકની ખાનગી હોસ્પિટલ ખાતે ખસેડવામાં આવેલ. આ ઘટના અંગેની તપાસ શહેરની B-ડિવીઝન પોલીસ ચલાવી રહી છે.