બબાલ / અમદાવાદમાં સોસાયટી ખરીદવાના બિલ્ડર અને રહીશોના ઝઘડામાં 'JCB' બન્યું શિકાર

• અમદાવાદમાં બિલ્ડર અને રહીશો આમને-સામને
• બિલ્ડર સોસાયટી ખરીદવા ઉતાવળો
• રહીશો પોતાના ઘર વેચવા તૈયાર નહીં

અમદાવાદમાં એક સોસાયટીના રહીશો અને એક બિલ્ડર વચ્ચે વિવાદ એટલો ઉગ્ર થઈ ગયો કે રહીશોએ પથ્થર મારો કર્યો. આ પથ્થરોનો શિકાર બન્યું આ JCB. લોકોના ટોળાએ એક JCBને ઘેરી તેના પર પથ્થરોનો વરસાદ કરી રહ્યું છે. તો એક જીપ ડાલુ પણ લોકોના રોષનું ભોગ બન્યું હતું. લોકો તેના પર પણ એટલા પથ્થરો વરસાવ્યા કે તેનો આગળનો કાચ સંપૂર્ણ તુટી ગયો. ડાલા ચાલકે ત્યાંથી ભાગવું પડ્યું.

ઘટના એવી હતી કે અમદાવાદમાં સેટેલાઇટના કેશવબાગ પાર્ટી પ્લોટ સામે આવેલા આનંદવિહાર ફ્લેટના રિડેવલપમેન્ટ મામલે વિવાદ વકર્યો હતો. ફ્લેટના રહીશોનો આક્ષેપ લગાવ્યો કે હાઉસિંગ બોર્ડનાં આ મકાનો 35 વર્ષ જૂનાં છે અને રિડેવલપમેન્ટના નામે કેટલાક બિલ્ડરો આ મોકાની જમીન પડાવી લેવા પેરવી કરી રહ્યા છે. ગુરુવારે રાત્રે પોલીસે આવીને રહીશોને મૌખિક રીતે મકાન ખાલી કરવા કહ્યું. ફ્લેટના લોકો પોતાના મકાન આપવા તૈયાર નથી. તેમને રિડેવલપમેન્ટ નથી જોઈતું. સ્થાનિકોનો આક્ષેપ છે કે હાઉસિંગ બોર્ડ અને બિલ્ડરનું ફુલ સેટિંગ છે. જેના કારણે બારોબાર સહી કરીને આ મોકાની જગ્યા બથાવવાનો પ્રયાસ કરવામાં આવી રહ્યો છે.

હવે જ્યારે સ્થાનિકોએ JCB પર પથ્થરમારો કરતાં ઝોન DCP પ્રેમસુખ ડેલુ ઘટનાસ્થળે દોડી આવ્યા હતા. સ્થાનિકોને સમજાવટથી મામલો પતાવ્યો હતો. પરંતુ પત્રકારો સાથેની વાતચીતમાં તેમણે ખુલાસો કર્યો કે જેના પર સ્થાનિકોએ પથ્થમારો કર્યો તે JCB બિલ્ડરનું નહીં પણ રોડ બનાવવા માટે આવ્યું હતું.

આનંદવિહાર ફ્લેટ એ 36 વર્ષ જૂના ફ્લેટ છે. જે હાઉસિંગ બોર્ડના ફલેટ ધરાવતી સોસાયટી છે. આ અમદાવાદના પોશ વિસ્તારમાં આવેલી મોકાની જગ્યા છે. આ મોકાની જગ્યા પર શોપિંગ કોમ્પ્લેક્ષથી માંડી રેસિડન્ટ મકાનો ખુબ જ ઉંચા ભાવે વેચાઈ શકે છે. જેના કારણે શહેરના અનેક મોટા મોટા બિલ્ડરો આ જગ્યા પર નજર રાખીને બેઠા છે. પરંતુ રહીશો આને પોતાના મકાનો બિલ્ડરને આપવા માટે તૈયાર નથી.