કહેર / બ્લેક ફંગસના કેસમાં ફરી ઉછાળો : આંધ્રમાં આઠ દિવસમાં 200 નવા કેસ

• મ્યૂકરમાઈકોસિસની બિમારીએ આંધ્ર પ્રદેશમાં ફરી તરખાટ મચાવ્યો
• છેલ્લાં આઠ દિવસમાં જ બ્લેક ફંગસના નવા 200 કેસ સામે આવ્યાં
• આંધ્ર પ્રદેશમાં બ્લેક ફંગસના કુલ કેસની સંખ્યા 4819 થઈ

આંધ્ર પ્રદેશમાં છેલ્લાં આઠ દિવસમાં જ બ્લેક ફંગસના નવા 200 કેસ સામે આવતાં રાજ્યના આરોગ્ય તંત્રની ચિંતા વધી ગઈ છે.  આ નવા 200 કેસ સાથે આંધ્ર પ્રદેશમાં બ્લેક ફંગસના કુલ કેસની સંખ્યા 4819 થઈ ગઈ છે.

બ્લેક ફંગસના કારણે 12 લોકોનાં મોત

આરોગ્ય વિભાગના સત્તાવાર આંકડા અનુસાર, છેલ્લા આઠ દિવસમાં રાજ્યમાં બ્લેક ફંગસના કારણે 12 લોકોનાં મોત પણ થયાં છે અને આ સાથે બ્લેક ફંગસનો કુલ મૃત્યુઆંક 448 થયો છે. અહેવાલો અનુસાર 3978 સંક્રમિતો બ્લેક ફંગસમાંથી મુક્ત પણ થયા છ અને આ સાથે આંધ્રપ્રદેશમાં બ્લેક ફંગસના 463 એક્ટિવ કેસ છે. આંધ્ર પ્રદેશમાં કુલ 782 કેસ અને 100 મૃત્યુ સાથે ચિત્તૂર જિલ્લો સૌથી આગળ છે. ગુંતુર જિલ્લો બ્લેક ફંગસના 740 કેસ સાથે બીજા ક્રમે છે અને અહીં મૃત્યુઆંક માત્ર 20 છે.

બ્લેક ફંગસથી સંક્રમિત 2687 દર્દીઓની સર્જરી કરાઈ

પશ્ચિમ ગોદાવરીમાં શૂન્ય કેસ છે, જ્યારે વિજયનગરમમાં માત્ર એક કેસ નોંધાયો છે. આરોગ્ય વિભાગના રિપોર્ટ અનુસાર, રાજ્યમાં બ્લેક ફંગસથી સંક્રમિત 2687 દર્દીઓની સર્જરી કરવામાં આવી છે.  આ દરમ્યાન વૈજ્ઞાનિકોએ બ્લેક ફંગસના કેસનું નિદાન કરવા એક અસરકારક ટેકનિક શોધી કાઢી છે. ઈઆઈ ટેકનિકની મદદથી એક ઈકોનોમિકલ ડિવાઈસ તૈયાર કરવામાં આવ્યું છે, જે બ્લેક ફંગસનું તત્કાળ નિદાન કરશે અને તેના દ્વારા બ્લેક ફંગસના કેસનું સતત મોનિટરિંગ પણ કરી શકાશે. એસ.એન. મેડિકલ કોલેજ, આગ્રાના એસોસિએટ પ્રોફેસર ડો. શૈલેન્દ્ર ચૌધરીએ બ્લેક ફંગસ અંગે જણાવ્યું કે,  દુનિયાભરમાં તેના નિદાન અને સારવાર પર સંશોધન ચાલી રહ્યું છે, પરંતુ ભારતીય વૈજ્ઞાનિકો હવે તેમાં બાજી મારી ગયા છે.