રાજકારણ / ગુજરાત કોંગ્રેસને લઈને મોટા સમાચાર, આવતીકાલે થઈ શકે છે પ્રદેશ પ્રમુખના નામની જાહેરાત 

• કોંગ્રેસના નવા ગુજરાત પ્રદેશ પ્રમુખ થઇ શકે છે જાહેર
• આવતીકાલે કોંગ્રેસને મળી શકે છે નવા પ્રદેશ પ્રમુખ
• વિપક્ષ નેતાના નામની પણ થઇ શકે છે જાહેરાત

ગુજરાત કોંગ્રેસને લઈને મહત્વના સમાચાર સામે આવી રહ્યા છે, આવતી કાલે ગુજરાત પ્રદેશ પ્રમુખનું નામ જાહેર થઈ શકે છે, મહત્વનું છે કે ઘણા સમયથી કોંગ્રેસ પ્રદેશ અધ્યક્ષનું કોકડું ગુચવાયેલું છે જેને લઈ દિલ્હી ખાતે કોંગ્રેસના નેતાઓની મહત્વનું બેઠક મળી હતી જેમાં કોંગ્રેસના દિગ્ગજ નેતાઓ અને ગુજરાત કોંગ્રેસના સિનિયર નેતાઓએ પણ હાજરી આપી હતી. 

આવતીકાલે કોંગ્રેસને મળી શકે છે નવા પ્રદેશ પ્રમુખ

દિલ્હીમાં ચાલેલા મહામંથન બાદ કોંગ્રેસ નેતા રાહુલ ગાંધીએ પણ મોટો નેતાઓ તેમજ ગુજરાત કોંગ્રેસ નેતાઓ સાથે વન ટુ વન ચર્ચા કરી હતી. જોકે હજુ સુધી ગુજરાતના પ્રદેશ પ્રમુખની કમાન કોને સોંપવામાં આવશે, તેને લઈને અનેક અટકળો તેજ થઈ ગઈ છે. મહત્વનું છે કે ગુજરાતમાં કોંગ્રેસ પોતાની છબી સુધારવાના પ્રયાસમાં  છે એકબાદ એક પછડાટ મળ્યા બાદ હવે કોંગ્રેસ માટે કપરા ચઢાણ છે, તો બીજી તરફ ગુજરાત વિધાનસભાની ચૂંટણીને લઈને પણ કોંગ્રેસ દ્વારા અત્યારથી જ તૈયારીઓ આરંભી દેવામાં આવી છે. 

વિપક્ષ નેતાના નામની પણ થઇ શકે છે જાહેરાત

મહત્વનું છે કે દિલ્હીમાં વિપક્ષ નેતા અને કોંગ્રેસ પ્રદેશ પ્રમુખ માટેની ચર્ચા બાદ હવે ગુજરાત કોંગ્રેસને નવા પ્રદેસ પ્રમુખ મળી શકે છે તેવું મનાઈ રહ્યું છે, ગઈ કાલે જ કોંગ્રેસ પ્રભારી રઘુ શર્માએ રાહુલ ગાંધી સાથે મુલાકાત કરી હતી. અહીં ઉલ્લેખનિય છે કે કોંગ્રેસ પ્રદેશ પ્રમુખ માટે હાર્દિક પટેલનું નામ આગળ આવ્યુ પરતું હાર્દિક પટેલે અધ્યક્ષ પદ માટે પોતે દાવેદાર હોવાનો ઈન્કાર કરી દીધો છે. જો કે અધ્યક્ષ પદ માટે શક્તિસિંહ ગોહિલનું નામ પણ ચર્ચામાં હોવાનું સામે આવ્યું જે બાદ શક્તિસિંહ ગોહિલે પણ પ્રદેશ પ્રમુખનું પદ સ્વીકારવાનો ઈન્કાર કર્યો હતો, હવે પ્રદેશ અધ્યક્ષ માટે કોના નામ પર આખરી મહોર વાગે છે તે જોવાનું રહ્યું ?