ભીંસમાં સરકાર / ગુજરાતમાં ઉગ્ર બન્યા આંદોલનો: આરોગ્યકર્મી-LRD ઉમેદવારોની અટકાયત, ઠેર ઠેર ઘર્ષણના દ્રશ્યો

• હજુ પણ કેટલાક આંદોલનો પાટનગરમાં યથાવત
• સરકારની જાહેરાત બાદ પણ આંદોલન આરોગ્યકર્મીઓની હડતાલ યથાવત
• LRD વેઇટિંગના મુદ્દાને લઇ મહિલા ઉમેદવારોમાં રોષ

ગુજરાતમાં ચૂંટણી પહેલા વિવિધ કર્મચારી મંડળ પોતાની પડતર માગોને લઇને સરકાર સામે મેદાને પડ્યા છે. આશાવાદ એવો છે કે આ જ સમય છે જ્યારે સરકાર તેમની માગોને સ્વીકારશે અથવા તો પોતાના તરફી સમાધાન લાવશે. ગુજરાતનું પાટનગર જાણે આંદોલનની નગરી બની ગઈ હોય તેવું લાગે છે. વિવિધ સંગઠનો, સરકારી કર્મચારીઓએ રાજ્ય સરકાર સામે બાંયો ચડાવી છે. તો ગુજરાતમાં એક દિવસમાં  4 આંદોલનોનો અંત લાવવામાં ભૂપેન્દ્ર પટેલ સરકારને સફળતા મળી છે. વિધાનસભાની ચૂંટણી પહેલા પૂર્વ સૈનિકો, એસ.ટી વિભાગ, વનરક્ષક અને આશા વર્કર મહિલાઓનું આંદોલન સમેટાયું છે. ઉપરાંત વિધાનસભાના ટૂંકા સત્રના પ્રથમ દિવસે જ ઢોર નિયંત્રણ બિલ સર્વાનુમતે પરત ખેંચવામાં આવતા માલધારી સમાજમાં ખુશીનો માહોલ સર્જાયો છે. ત્યારે હજું પણ કેટલાક આંદોલનો પાટનગર ખાતે ચાલી રહ્યા છે. 

VCE કર્મચારીની હડતાળનો 16મો દિવસ

ગાંધીનગરમાં VCEની હડતાળ યથાવત છે. સત્યાગ્રહ છાવણી ખાતે VCE કર્મીઓની હડતાળ પણ 16માં દિવસમાં પ્રવેશી છે, પોતાની માગણીઓના ઉલ્લેખ સાથેના બેનર હાથમાં લહેરાવતા વીસીઈ આજે થોડા વધારે આક્રમક દેખાઈ રહ્યા છે. આ કર્મચારીઓની માગણીઓનું લિસ્ટ થોડું મોટું છે. જેના પર એક નજર કરીએ તો કમિશન પ્રથા પોલિસી હટાવી ફિક્સ વેતનથી નિમણૂક, સરકારી લાભો સાથે સમાન કામ સમાન વેતન, પરિવારને આરોગ્ય સુવિધા અને વીમા કવચ, VCEની કામગીરીનો જોબ ચાર્ટ નક્કી કરવો, VCEને વર્ગ-3ના દરજ્જાના કર્મચારી ગણવા, ઈ-ગ્રામ પોલિસી હટાવી સરકારી પગાર ધોરણ લાગુ કરવું અને નોકરીની સુરક્ષા આપવાની માંગ VCE કર્મચારીઓ દ્વારા કરવામાં આવી રહી છે. 

સરકારની જાહેરાત બાદ પણ આરોગ્યકર્મીઓનું આંદોલન યથાવત

આંદોલન પર ઉતરેલા આરોગ્યકર્મીઓને લઇ રાજ્ય સરકારે ગઈકાલે ગુરુવારે મહત્વનો નિર્ણય કર્યો હતો. આ અંગે સરકારના પ્રવક્તા મંત્રી જીતુ વાઘાણીએ જાહેરાત કરતાં કહ્યું હતું કે, આરોગ્યકર્મીઓને રૂ.4 હજારનો ઉચ્ચક પગાર વધારો મળશે. ટ્રાવેલ્સ એલાઉન્સ અને 130 દિવસના રજા પગાર અપાશે. બે દિવસમાં રાજ્ય સરકાર માંગણી સ્વીકારવાનો ઠરાવ કરશે.આ જાહેરાત કરતાં સરકારે આરોગ્ય કર્મચારીઓને સેવા પર પરત ફરવા વિનંતી કરી છે. પણ આરોગ્ય કર્મીઓ ગ્રેડ પે વધારાની માંગ પર અડગ છે. ગ્રેડ-પે 1 હજાર 900થી વધારી 2 હજાર 800 કરવાની માંગ હજુ યથાવત છે. ગાંધીનગરમાં સેન્ટ્રલ વિસ્ટા ગાર્ડન પાસે વિરોધ કરી રહેલા આરોગ્યકર્મીઓની અટકાયત કરાઈ છે. 

ગુજરાતના 33 જિલ્લાના આરોગ્યના મલ્ટીપર્પઝ હેલ્થ વર્કર, ફિમેલ હેલ્થ વર્કર, મલ્ટીપર્પઝ હેલ્થ સુપરવાઇઝર, ફિમેલ હેલ્થ સુપરવાઇઝર, THS, THV અને જિલ્લા કક્ષાના સુપરવાઇઝર જેવા પંચાયતના આરોગ્યલક્ષી તમામ કર્મી તેમજ ફિલ્ડ કર્મચારીઓ  હડતાળમાં જોડાયા છે.

બેનર સાથે દેખાવ કરતી LRD મહિલા ઉમેદવારોની અટકાયત

ગાંધીનગરમાં છેલ્લા ઘણા દિવસથી LRD ભરતીમાં 20 ટકા પ્રતીક્ષાયાદી જાહેર કરવાની માગ સાથે મહિલા ઉમેદવારો સરકાર સામે આંદોલન કરી રહી છે. ત્યારે આજ રોજ ગાંધીનગરમાં બેનર સાથે દેખાવ કરતી મહિલા ઉમેદવારોની પોલીસે અટકાયત કરી છે. આપને જણાવી દઈએ કે, ગતરોજ પણ મહિલા ઉમેદવારોની પોલીસે અટકાયત કરી હતી. LRD મહિલા ઉમેદવારોએ સામૂહિક મુંડન કરાવવાની ચીમકી ઉચ્ચારી હતી, છતાં સરકાર દ્વારા વેઈટિંગ લિસ્ટ જાહેર કરવામાં ન આવતા મોટી સંખ્યામાં મહિલા ઉમેદવારો ગતરોજ વિધાનસભાના ગેટ નંબર એક ખાતે એકઠી થઈ હતી. જોકે, મુંડન કરાવે એ પહેલાં જ તેમની અટકાયત કરવામાં આવી હતી. આ દરમિયાન મહિલા ઉમેદવારો અને પોલીસ વચ્ચે ઘર્ષણ સર્જાયું હતું. 

વાસ્તવમાં 16 જુલાઈ 2022ના રોજ LRD 2018 ભરતીનું વેઇટિંગ લિસ્ટ જાહેર કરવામાં આવ્યું હતું. જેમાં 1327 પુરૂષ અને 1112 મહિલા ઉમેદવારોની વેઇટિંગ લિસ્ટ જાહેર કરાઈ હતી. આ 1112 મહિલા ઉમેદવારોને બદલે 101 ઉમેદવારોને જ ઓર્ડર અપાતા અન્ય મહિલા ઉમેદવારોમાં રોષ જોવા મળી રહ્યો છે. સરકારની જાહેરાત છતાં ઓર્ડર ન મળતા LRD મહિલા ઉમેદવારોમાં રોષ જોવા મળી રહ્યો છે. 

વિદ્યાસહાયક ભરતીને લઇ ગાંધીનગરમાં રજૂઆત

ભરતીમાં નો રિપિટેશન નિયમ લાવવા અને મહેકમ મુજભ ભરતી કરવાની માંગ સાથે ઉમેદવારો દ્વારા ગાંધીનગરમાં રજૂઆત કરવામાં આવી. 19 હજાર જગ્યાઓ ખાલી છે તે તાત્કાલિક ભરવા રજૂઆત ઉમેદાવારો દ્વારા કરવામાં આવી છે. ભરતી માટે ઉમેદવારોએ આંદોલનનું ઉગામ્યું છે.