ગુજરાતના પોલીસ વડા (DGP) આશિષ ભાટીયા 31 જુલાઈએ નિવૃત્ત થઇ રહ્યા છે. તેમનો 2 મહિના કાર્યકાળ લંબાવાયો હતો જે હવે જુલાઇમાં પૂર્ણ થશે. ત્યારે રાજ્યને નવા DGP મળશે.
ગુજરાતના નવા DGPના નામની ચર્ચા
અમદાવાદ પોલીસ કમિશનર DGPની રેસમાં પ્રથમ
જુલાઈમાં DGP આશિષ ભાટિયા નિવૃત્ત થશે
31 જુલાઈ 2020ના રોજ ગુજરાત રાજ્યના પોલીસ વડાપદેથી શિવાનંદ ઝાની નિવૃત્ત બાદ તેમના સ્થાને આશિષ ભાટિયાની નિમણૂંક કરાઈ હતી. ત્યારે હવે 31 જુલાઈ 2022ના રોજ DGP આશિષ ભાટીયાનો કાર્યકાળ પૂર્ણ થતા તેઓ નિવૃત્ત થઇ રહ્યા છે. તેમની જગ્યાએ હવે નવા પોલીસ વડાની નિમણૂંક કરવાની કામગીરી શરૂ થઇ ચૂકી છે. નવા ડીજીપી માટે પેનલ નામ મોકલવાની તૈયારી થઇ રહી છે. જેમાં ટોપ પર અમદાવાદ શહેર પોલીસ કમિશનર સંજય શ્રીવાસ્તવનું નામ છે. 1987ના બેચના સંજય શ્રીવાસ્તવને DGP બનાવવાની પૂર્ણ શક્યતાઓ છે.
અમદાવાદ પોલીસ કમિશનર તરીકે ત્રણ અધિકારીના નામ ચર્ચામાં
અમદાવાદ પોલીસ કમિશનર સંજય શ્રીવાસ્તવ DGP બને તો તેમની જગ્યાએ અમદાવાદ પોલીસ કમિશ્નર તરીકે ત્રણ અધિકારીના નામ ચર્ચામાં છે. જેમાં અતુલ કરવાલ, વિકાસ સહાય અને અજય તોમરનું નામ ચર્ચામાં છે. ત્રણમાંથી કોઈ એકને પોલીસ કમિશનર બનાવવામાં આવે તેવી શક્યતાઓ છે, જેમાં વિકાસ સહાયનું નામ મોખરે છે. અજય તોમરને અમદાવાદ પોલીસ કમિશનર બનાવવામાં આવે તો તેમને ડીજી રેન્કનું પ્રમોશન આપવું પડશે.
રાજકોટ અને સુરત પોલીસ કમિશનર તરીકે જાણો કયા અધિકારી ચર્ચામાં
રાજકોટ પોલીસ કમિશનરની પોસ્ટ છેલ્લા ઘણા સમયથી ઈન્ચાર્જ દ્વારા ચાલી રહી છે, જેને ચૂંટણી પહેલાં કાયમી કરવામાં આવશે. જેને લઇને રાજકોટ પોલીસ કમિશનર પદ પર રાજુ ભાર્ગવનું નામ નક્કી માનવામાં આવે છે. તો સુરત પોલીસ કમિશનર તરીકે નરસિમ્હા કોમર અને રાજકુમાર પાંડિયનનાં નામ ચર્ચામાં છે.
DGP તરીકે 2 વર્ષનો કાર્યકાળ ફરજિયાત
2 વર્ષ પહેલાં એક નિયમ બનાવવામાં આવ્યો હતો, જેમાં ગુજરાતના પોલીસવડા માટે હવે 2 વર્ષનો કાર્યકાળ ફરજિયાત કરવામાં આવ્યો હતો. તેના આધારે ઉત્તરપ્રદેશ, મધ્યપ્રદેશ, કેરળ, તામિલનાડુ સહિતનાં રાજ્યોમાં પણ બે વર્ષમાં સમય ખૂટતો હોય તેવા રાજ્ય પોલીસવડાને એક્સટેન્શન આપવામાં આવ્યા છે. આમ હવે તમામ રાજ્યના પોલીસવડાઓને બે વર્ષમાં જેટલો સમય ખૂટતો હશે એ નિયમ પ્રમાણે પૂર્ણ કરવામાં આવશે.