- બોડેલી સભામાં કેજરીવાલના રાજ્ય સરકાર પર પ્રહાર
- ગુજરાતમાં અમે 10 લાખ નોકરીઓનું સર્જન કરીશું
- નોકરીઓમાં આદિવાસીઓને મનો પૂરો કોટા મળશે
અરવિંદ કેજરીવાલ ગુજરાત પ્રવાસે છે. ત્યારે તેઓએ છોટાઉદેપુરના બોડેલીમાં આજે જાહેરસભા સંબોધી હતી. એ દરમ્યાન તેઓએ સરકાર પર પ્રહાર કરતા જણાવ્યું કે, 'ગુજરાતમાં પરીક્ષાઓના પેપર ફૂટી રહ્યાં છે. શું આ લોકો સરકાર ચલાવી રહ્યાં છે કે પછી ધર્મશાળા? આ લોકો માત્ર પેપર નથી સાચવી શકતા તો પછી આવા લોકોએ રાજીનામું આપી દેવું જોઇએ. અમે દિલ્હીમાં 12 લાખ યુવાનોને રોજગાર અપાવી છે. મને નોકરી અપાવતા આવડે છે. હું લોકોના ઘરમાં ખુશીઓ જોવા માંગુ છું. અમે ગુજરાતના યુવાઓને વાયદો આપ્યો છે જો અમારી સરકાર બનશે તો દર બેરોજગાર યુવકને 5 વર્ષમાં રોજગાર અપાવીશું. જ્યાં સુધી તેઓને રોજગાર નહીં મળે ત્યાં સુધી મહિનાના હિસાબથી તેઓને 3 હજાર રૂપિયાનું બેરોજગારી ભથ્થું મળશે.'
વધુમાં કેજરીવાલે કહ્યું કે, 'ગુજરાતમાં અમે 10 લાખ નોકરીઓનું સર્જન કરીશું. આ નોકરીઓમાં આદિવાસીઓને પૂરો હક મળશે, તેમનો પૂરો કોટા મળશે. દરેક ગામમાં સારી શાળાઓ હશે. દરેક ગામમાં મોહલ્લા ક્લિનિક બનાવીશું. દરેક ગામોને પાકી સડક સાથે જોડવામાં આવશે.
વધુમાં કેજરીવાલે કહ્યું કે, 'ગુજરાતમાં ઝેરી દારૂ પીવાથી અનેક લોકોના મૃત્યુ થયા છે. પણ હવે ગુજરાતમાં બદલાવ આવશે. ગુજરાતમાં ખુલ્લેઆમ દારૂ વેચાય છે. લઠ્ઠાકાંડ બાદ દર્દીઓને મુખ્યમંત્રી મળવા ન ગયા. દુઃખના સમયે કામ ન આવે તે શું કામનું. ગુજરાતમાં ગલીગલીએ દારૂ મળે છે. જો દારૂબંધી છે તો કરોડો રૂપિયાનો દારૂ કોણે વેચે છે.'
અમે લોકોએ દિલ્હીમાં સારી શાળાઓ આપી છે, લોકોને રોજગાર આપ્યો છે. દિલ્હીમાં લોકોને વીજળીનું ઝીરો બીલ આવે છે. પંજાબમાં સરકાર બન્યાના 3 મહિનામાં વીજ બીલ ઝીરો કર્યાં. પંજાબમાં 51 લાખ પરિવારના વીજ બીલ ઝીરો આવશે. મારી પાસે અને મારી પાર્ટી પાસે રૂપિયા નથી. ગુજરાતમાં AAPની સરકાર બનતા જ 3 મહિનામાં વીજબીલ ઝીરો કરીશું.'
