અમદાવાદ સહિત રાજ્યભરમાં લર્નિંગ લાઇસન્સ કઢાવવા માટે બે-બે મહિના કે તેથી વધુ સમય માટેનું વેઈટિંગ હોવાની પરિસ્થિતિ અત્યાર સુધી બની રહેલી છે. કામનું ભારણ ઓછું કરવા અને અરજદારોની સરળતા ખાતર આરટીઓ પાસેથી આઈટીઆઈમાં લર્નિંગ લાઇસન્સની કામગીરી સોંપવામાં આવી છે છતાં વેઇટિંગની પરિસ્થિતિમાં ખાસ કોઈ ફરક પડ્યો નથી.
રાજ્યના વાહન વ્યવહાર વિભાગ તરફથી એક મોટો અને મહત્ત્વનો નિર્ણય લેવામાં આવ્યો છે, જેમાં એપોઇન્ટમેન્ટનું વેઈટિંગ ઓછું કરવા અને અરજદારોને ઝડપથી લર્નિંગ લાઇસન્સ મળી રહે તે માટે હવે આઈટીઆઈના ટાઈમિંગ સ્લોટમાં વધારો કર્યો છે.
અત્યાર સુધી આઈટીઆઈમાં બપોરના ૧થી પ.૩૦ સુધી જ લર્નિંગ લાઇસન્સની કમ્પ્યૂટર ટેસ્ટ અરજદારો આપી શકતા હતા, પરંતુ હવે સવારના ૯ થી ૧ અને ૧.૩૦ થી પ.૩૦ એમ બે સ્લોટમાં લર્નિંગ લાઇસન્સની કામગીરી કરવામાં આવશે, જેનો સોમવારથી અમલ કરી દેવામાં આવ્યો છે.
આ નિર્ણયના કારણે વાહનચાલકોને ફાયદો થશે. હવેથી લર્નિંગ લાઇસન્સના ટેસ્ટ માટે લાંબા સમયની અેપોઈન્ટમેન્ટમાંથી રાહત મળી શકશે. હાલ જ્યાં લર્નિંગ લાઈસન્સના ટેસ્ટ લેવાય છે તે આઈટીઆઈમાં એપોઈન્ટમેન્ટ વધારવાની અને સમય વધારવાની જાહેરાત કરી છે તે મુજબ હવે શહેરમાં આઈટીઆઈએ અેપોઈન્ટમેન્ટ ખુલ્લી મૂક્તાં ફટાફટ કામ થશે.
હવે નજીકની આઈટીઆઈમાં સવારના ૯ વાગ્યાથી સાંજના પ.૩૦ વાગ્યા સુધીમાં અરજદારો આ ટેસ્ટ આપી શકશે. આ આયોજનથી અરજદારોના ધક્કા ઓછા થશે અને સમયની પણ બચત થશે. વધુ ને વધુ અરજદારો એકસાથે ટેસ્ટ આપી શકે એ માટે ખાસ વ્યવસ્થા કરવામાં આવી છે. લોકડાઉન દરમિયાન લાઇસન્સ કાઢવાની કામગીરી બંધ રહી હોવાથી હવે વધુ ભીડ રહે છે.