વિકાસ? / વિધાનસભામાં ગુજરાત સરકારની કબૂલાતઃ અમદાવાદ ગુજરાતનું ‘રેપ કેપિટલ’!

• ગુજરાત સરકારની વિધાનસભામાં કબુલાત
• સૌથી વધુ કિસ્સા અમદાવાદ શહેરમાં નોંધાયા
• અમદાવાદમાં દર બે દિવસે એક બળાત્કારની ફરિયાદ

ગુજરાત સરકારે ગુજરાતમાં છેલ્લા પાંચ વર્ષમાં ઘટેલી દુષ્કર્મની ઘટનાઓના આંકડા વિધાનસભાના શિયાળુ સત્ર દરમિયાન રજૂ કર્યા. જેમાં ખુદ ગુજરાત સરકારના આંકડા ગુજરાત સલામતની વાતોનો છેદ ઉડાડે છે. બેચરાજીના કોંગ્રેસના ધારાસભ્ય ભરતજી ઠાકોરે પૂછેલા પ્રશ્નના જવાબમાં સરકાર તરફથી આ જવાબ રજૂ કરવામાં આવ્યો હતો. 

શું કહે છે સરકારી આંકડા

ગુજરાતમાં દર 7 કલાકે 1 દુષ્કર્મની ઘટના ઘટે છે. છેલ્લા 5 વર્ષમાં 6.116 કેસ નોંધાયા છે. જેમાં સૌથી વધુ કિસ્સા અમદાવાદ શહેરમાં નોંધાયા છે. અમદાવાદમાં દર બે દિવસે એક બળાત્કારની ફરિયાદ થાય છે. 

ગુજરાતનું અમદાવાદ રેપસિટી? 

દુષ્કર્મની ઘટનામાં સૌથી મોખરે અમદાવાદની આર્થિક રાજધાની ગણાતુ અમદાવાદ છે. એકલા અમદાવાદમાં જ દુષ્કર્મની 860 ઘટનાઓ ઘટી છે જેમાં ગ્રામ્ય વિસ્તારની 184 ઘટનાનો ઉમેરો કરીએ એટલે આ આંકડો 1046 પહોંચે છે.  દર બે દિવસે એકવાર અમદાવાદમાં દુષ્કર્મની ઘટના ઘટે છે. વિધાનસભામાં અમદાવાદ સિટી માટેના જુન-જુલાઈનું એક વર્ષ ગણીને જે આંકડા રજૂ થયા તે ખરેખર ચોંકાવનારા હતા. 

અમદાવાદમાં છેલ્લા પાંચ વર્ષના દુષ્કર્મના આંકડા

• 2014-15માં 147  
• 2015-16માં 128
• 2016-17માં 193
• 2017-18માં 177
• 2018-19માં 215

બાકીના શહેરો પણ બાકાત નથી. 

રાજકોટ જિલ્લામાં દુષ્કર્મના 261 કેસ નોંધાયા છે જ્યારે વડોદરામાં પણ 131 મહિલાઓ યૌન ઉત્પિડનનો ભોગ બની હતી અને સુરતમાં 759 ફરિયાદો સામે આવી હતી. 

દુષ્કર્મની ઘટનામાં વધારો નોંધાયો 

છેલ્લા પાંચ વર્ષમાં દુષ્કર્મની સંખ્યામાં વધારો નોંધાયો છે. વર્ષ 2014-15માં દુષ્કર્મના 1097 કેસ નોંધાયા હતા જે 2015-16માં વધીને 1103 થયા. વર્ષ 2016-17માં 1167 દુષ્કર્મની ફરિયાદો સામે આવી જેને પગલે વર્ષ 2017-18માં આ આંકડો વધીને 1272 પહોંચ્યો અને 2018-19માં દુષ્કર્મની 1477 ઘટના સામે આવી છે.