- શ્રીલંકાએ ચીનને ઝટકો આપતા ભારતના વાંધાને ગંભીરતાથી લીધો
- ચીનના જાસૂસી જહાજને હંબનટોટા બંદરે પહોંચવાની તારીખ લંબાવવા માટે કહ્યું
- ભારતે ચીનના જહાજના શ્રીલંકામાં રોકાવા સામે વાંધો ઉઠાવ્યો હતો
ભારતના પાડોશી દેશ શ્રીલંકાને આપણે તેમના મુસીબતના સમયમાં મદદ કરી છે. તેવામાં હવે શ્રીલંકાએ ચીનને ઝટકો આપતા ભારતના વાંધાને ગંભીરતાથી લીધો છે. કોલંબોએ ચીનના જાસૂસી જહાજ યુઆન વાંગ-5ને હંબનટોટા બંદરે પહોંચવાની તારીખ લંબાવવા માટે કહ્યું છે. ભારતે ચીનના જહાજના શ્રીલંકામાં રોકાવા સામે વાંધો ઉઠાવ્યો હતો. તેથી આ નિર્ણયને ચીન માટે આંચકા તરીકે જોવામાં આવી રહ્યો છે.
શું છે મામલો ?
વાસ્તવમાં ચીનનું જાસૂસી જહાજ યુઆન વાંગ 5 ઓગસ્ટે હંબનટોટા બંદર પહોંચવાનું હતું. આ જહાજ 17 ઓગસ્ટ સુધી અહીં જ રોકાત. ત્રીજી પેઢીનું આ આધુનિક જાસૂસી જહાજ શ્રીલંકામાં રોકાયા બાદ ભારતે તેને પોતાની સુરક્ષા માટે ખતરો માનીને વિરોધ નોંધાવ્યો હતો.
ભારતીય વિદેશ મંત્રાલયે શું કહ્યું હતું ?
ભારતીય વિદેશ મંત્રાલયે ગયા અઠવાડિયે કહ્યું હતું કે, તેઓ ઘટનાક્રમ પર નજીકથી નજર રાખી રહ્યા છે. આનાથી ભારતની સુરક્ષા અને આર્થિક હિતો પર કોઈ અસર પડશે કે કેમ તેનું મૂલ્યાંકન કરવામાં આવી રહ્યું છે. જરૂર પડ્યે સુરક્ષા માટે તમામ જરૂરી પગલાં લેવામાં આવશે.
આ તરફ શ્રીલંકાના વિદેશ મંત્રાલયે કોલંબોમાં ચીની દૂતાવાસને પત્ર લખીને આગળના પરામર્શ સુધી જહાજના આગમનની તારીખ સ્થગિત કરવા વિનંતી કરી છે. તમને જણાવી દઈએ કે, શ્રીલંકાએ ચીનના જાસૂસી જહાજને 12 જુલાઈ 2022ના રોજ હમ્બનટોટા બંદરે આવવાની પરવાનગી આપી હતી.
અવાર-નવાર શ્રીલંકાને મદદ કરે છે ભારત
ભારતના પાડોશી દેશ શ્રીલંકામાં આ દિવસોમાં સ્થિતિ ખૂબ જ ખરાબ છે. આર્થિક સંકટના કારણે લોકો માટે અહીં રોજબરોજની વસ્તુઓ એકઠી કરવી મુશ્કેલ બની ગઈ છે. લોકો પેટ્રોલ-ડીઝલ અને ખાદ્યપદાર્થો માટે પણ તલપાપડ છે. શ્રીલંકાની મદદ માટે માત્ર ભારત જ ખુલ્લેઆમ આગળ આવ્યું છે. આવી સ્થિતિમાં ચીનના જહાજને હંબનટોટા પોર્ટ પર રોકવાની મંજૂરી આપવી એ ભારત માટે મોટો આંચકો હતો. જોકે શ્રીલંકાના નવા નિર્ણયથી એવું લાગી રહ્યું છે કે તે વર્તમાન સમયે ભારતને નારાજ કરવા માંગતું નથી.
