- આકાશને JIOની કમાન આપ્યા બાદ હવે ઈશા અંબાણીને મળશે જવાબદારી
- ઈશાના રાજ્યાભિષેકની તૈયારીઓ, ટૂંક સમયમાં થઈ શકે છે એલાન
- ઈશાને ટૂંક સમયમાં રિલાયન્સ રિટેલની ચેરપર્સન બનાવવામાં આવી શકે છે
વિશ્વના સૌથી ધનાઢ્ય ઉદ્યોગપતિઓમાંના એક મુકેશ અંબાણી હાલમાં તેમની સફળતાની યોજના પર કામ કરી રહ્યા છે. રિલાયન્સ જિયોની કમાન પુત્ર આકાશને સોંપ્યા બાદ હવે તેમની પુત્રી ઈશાના રાજ્યાભિષેકની તૈયારીઓ ચાલી રહી છે. એક રિપોર્ટ્સ અનુસાર, ઈશા અંબાણીને ટૂંક સમયમાં રિલાયન્સ રિટેલની ચેરપર્સન બનાવવામાં આવી શકે છે. તે રિટેલ બિઝનેસનું ધ્યાન રાખશે. બ્લૂમબર્ગે પોતાના એક રિપોર્ટમાં આ દાવો કર્યો છે.
ઈશા અંબાણીને મોટી જવાબદારી મળશે
બ્લૂમબર્ગના એક રિપોર્ટમાં પરિવારના નજીકના સૂત્રોને ટાંકીને દાવો કરવામાં આવ્યો છે કે, ઈશા અંબાણીના અધ્યક્ષ બનવાની જાહેરાત બુધવારે થઈ શકે છે. ઈશા અંબાણી હાલમાં રિલાયન્સ રિટેલ વેન્ચર્સ લિમિટેડના ડિરેક્ટર છે.
સ્ટેનફોર્ડ યુનિવર્સિટી અભ્યાસ કર્યો છે ઈશા અંબાણીએ
ઈશા અંબાણીએ યેલ અને સ્ટેનફોર્ડ યુનિવર્સિટીમાં અભ્યાસ કર્યો છે. 2015માં તે ફેમિલી બિઝનેસમાં જોડાઈ. તે Jio Platforms, Jio Limitedના બોર્ડમાં પણ છે. તેના લગ્ન ડિસેમ્બર 2018માં બિઝનેસમેન અજય પીરામલના પુત્ર આનંદ પીરામલ સાથે થયા હતા. તમને જણાવી દઈએ કે 27 જૂને જિયોની બોર્ડ મીટિંગમાં જ જિયો ઈન્ફોકોમ લિમિટેડના બોર્ડ દ્વારા આકાશ અંબાણીને અધ્યક્ષ બનાવવામાં આવ્યા હતા.
રિલાયન્સ જિઓની કમાન હવે યુવા આકાશ અંબાણીના હાથમાં
રિલાયન્સ જિઓની કમાન હવે અંબાણીના 30 વર્ષીય પુત્ર આકાશી અંબાણીના હાથમાં આવી છે. રિલાયન્સ બોર્ડ ઓફ ડિરેક્ટર્સની બેઠકમાં રિલાયન્સ જિઓના નવા ચેરમેન પદે આકાશ અંબાણીની વરણીને લીલીઝંડી આપી છે. મુકેશ અંબાણીએ જિઓના ચેરમેન પદેથી રાજીનામું આપી દીધું છે. રિલાયન્સ ઇન્ડસ્ટ્રીઝની ડિજિટલ શાખા, રિલાયન્સ જિયો ઇન્ફોકોમ લિમિટેડે મંગળવારે જાહેરાત કરી હતી કે, અંબાણીએ 27 જૂનથી કંપનીના ડિરેક્ટર પદેથી રાજીનામું આપ્યું છે.
