- પાટણમાં એક યુવકના મોતનો મામલો
- પાટણ B ડિવિઝન પોલીસને મળી મોટી સફળતા
- જ્યોના વ્યસનમુક્તિ કેન્દ્રમાં એક યુવકનું થયેલુ મોત હત્યામાં ફેરવાયુ
તાજેતરમાં પાટણમાં આવેલ જ્યોના વ્યસનમુક્તિ કેન્દ્રમાં એક યુવકનું સહસ્યમય સંજોગોમાં મોત નીપજ્યું હતું. જે. મામલે પોલીસ તપાસમા સનસનાટી મચાવતી હકીકત સામે આવી છે. પાટણમાં 17 ફેબ્રુઆરીના રોજ યુવકનું મોત થયું હોવાનું સામે આવ્યું હતું. ત્યારબાદ આ અંગે પોલીસને શંકા જતા તપાસ તેજ બનાવી હતી. જેમાં યુવકના હાથ પગ બાંધી ઢોર માર મારવામાં આવ્યો હોવાને લીધે તેનું કમકમાટીભર્યું મોત નીપજ્યું હોવાની ઘટનાનો પર્દાફાશ થયો છે. આમ વ્યસનના બદલે યુવાનનો જીવ જ છૂટી છતાં પરિવારજનોમાં કાળો કલ્પાંત ફેલાયો છે. બીજી બાજુ હત્યાને કુદરતી મોતમાં ખપાવી દેવાના કારસાને લઈને સમગ્ર પંથકમા ચકચાર મચી જવા પામી છે.
યુવાનની હત્યાને કુદરતી મોતમાં ખપાવવાનો આરોપીઓનો હતો પ્રયાસ
17 ફેબ્રુઆરીના રોજ જ્યોના નશા મુક્તિ કેન્દ્રમાં હાર્દિક સુથાર નામના યુવાનું મોત નીપજ્યું હતું. જે પ્રકરણમાં પાટણ બી ડિવીઝન પોલીસને યુવકના મોતનું રહસ્ય ઉકેલી નાખવામા સફળતા સાંપડી છે અને યુવાનની હત્યાને કુદરતી મોતમાં ખપાવવાના આરોપીઓના પ્રયાસ પણ પોલીસે પાણીઢોળ કર્યું છે. બી ડિવીઝન પોલીસને મોટી સફળતા મળતા આ મામલે ધગધગતા ખુલાસા થયા છે. યુવક જ્યોના વ્યસનમુકિત કેન્દ્રમાં સારવાર લઇ રહ્યો હતો. જેને લત છોડાવવા માટે યુવકના હાથ પગ બાંધી ઢોર માર મારવામાં આવ્યો હતો. જે માર જીવલેણ નિવડતા યુવાન પરલોક પામ્યો હતો.
B ડિવિઝન પોલીસે 7 આરોપીઓની કરી ધરપકડ
બાદમાં જેલવાસના ડરને લઈને પાટણના સરદાર કોમ્પલેક્ષમાં આવેલ જ્યોના વ્યસનમુકિત કેન્દ્રના ભેજાબાજ આરોપીઓએ કરામત વાપરી આ હત્યાને કુદરતી મોતમાં ખપાવી દેવા સમગ્ર કાર્યક્રમ ઘડી કાઢ્યો હતો. જોકે પોલીસે આ પ્રયાસને નાકામ કરી હાર્દિક સુથારની હત્યા પ્રકરણમાં સંડોવાયેલ આરોપીઓ 7 આરોપીઓ સામે ગુન્હો નોંધી પોલીસે સાતેય આરોપીઓને દબોચી લઈ તપાસ આગળ ધપાવી છે.
