એક તરફ ગુજરાતમાં રૂપાણી સરકાર દારૂબંધીના નિયમોની વાતો કરી રહી છે ત્યારે હાલમાં જ સુરતમાં દારૂબંધીને લઈને એક અલગ જ વાત જોવા મળી છે. અહીં પ્રજા નહીં પણ ભાજપના નગરસેવક પિયુષ શિવશક્તિવાળા પણ દારૂની મહેફિલ માણી રહ્યાં છે. હવે રૂપાણી સરકારનો કાયદો ક્યાં? સુરતના નારગોલમાં પિયુષ શિવશક્તિવાળાએ દારૂના નશામાં ડાન્સ કર્યો. આ મહેફિલમાં 12 લોકોમાં પુત્ર-પિતા-કાકા પણ નશામાં સામેલ હતા.
દારૂબંધીના નિયમના ઉડાડ્યા લીરેલીરા
સુરતના ભાજપ નગરસેવકની દારૂની મહેફિલ
પિયુષ શિવશક્તિવાળાએ દારૂના નશામાં કર્યો હતો ડાન્સ
હાલમાં જ સુરતના સગરામપુરા વિસ્તારમાં ભાજપના નગરસેવકે પિયુષ શિવશક્તિવાળાની દારૂની મહેફિલ માણવાનો વીડિયો સામે આવ્યો છે. નગરજનો તો ઠીક પણ નગરસેવકનો આ વીડિયો વાયરલ થાય તે રૂપાણી સરકાર માટે શરમજનક છે. 2થી 5 જાન્યુઆરીની વચ્ચે આ મહેફિલ યોજાઈ હતી. મહેફિલમાં નગરસેવકે દારૂના નશામાં ડાન્સ પણ કર્યો હતો. આ માટે નારગોલમાં પારસી પંચાયતનું મકાન ભાડે રાખીને પાર્ટી કરી હતી.
દારૂ પીવાની વાતને કરી સ્વીકાર
ઉલ્લેખનીય છે કે જે જગ્યાએ પાર્ટી યોજાઈ હતી તેમાં 12 વ્યક્તિનું ગ્રૂપ હતું. આ ગ્રૂપમાં પુત્ર-પિતા અને કાકા પણ સામેલ હતા. દારૂ પીવા મુદ્દે નગરસેવક પિયુષ શિવશક્તિવાળાએ કહ્યું કે મારા માટે દારૂ પીવો એ મોટી વાત નથી. અમારા સમાજમાં પ્રસંગોપાત દારૂ પીવો એ પરંપરા છે. પિયુષભાઈ સુરતના વોર્ડ નંબર 19ના નગરસેવક છે અન 3 વાર નગરસેવક બન્યાં છે. તેઓ આ કામ કરે ત્યારે પ્રશ્ન સર્જાય તે સ્વાભાવિક છે.
ભાજપના શહેર પ્રમુખ નીતિન ભજીયાવાલાએ આપી પ્રતિક્રિયા
સુરતમાં કોર્પોરેટરનો દારૂની મહેફિલ માણવાનો વીડિયો વાયરલ થયો છે. ત્યારે હવે આ મામલે ભાજપના શહેર પ્રમુખ નીતિન ભજીયાવાલાએ પ્રતિક્રિયા આપી છે કે આવી કોઈ પણ વસ્તુ ચલાવવામાં નહી આવે. દારૂ બંધી પર સરકાર દ્વારા કામગીરી કરવામાં આવી રહી છે. ભાજપના નેતા હોય કે કાર્યકર્તા તમામ સામે સસ્પેન્શન સુધીના કાર્યવાહી કરાશે. ભાજપની છબી ખરડાય તેવી એક પણ પ્રવૃતિ ચલાવી લેવામાં નહી આવે. સાથે જ તેમણે લોકોને આ પ્રકારની ઘટનાઓને ઉજાગર કરવા માટે અપીલ પણ કરી હતી.